Read Maru 1SAMUELA 10 Bible Online

1SAMUELA 10 - Maru bible

1SAMUELA 10

¹Ailao" Samuela wa zhanlun xau am pau" yu: yu yang: aire Sholu nho: au: dao mae vhe' sheim: mung: bobaug baug- yang: ASANG wa yao" Israel byumyu" re eib: ra" kho:kham khyo" nao re xau gyad byid' ra". Nao wa yao" byumyu" re eib mung: yao: bam: gyevo alhab' mae" yao: bam re gug: gam byid' li" nae".

²Ana" ba nao ngo mae" to" thug' lo" lao"- Benyamin mug: myid mae" Zelza mae jo; ra" Rakhela nho: lab nhae mae byu shid' yaug we' nao qhug' li" nae". Yao: shid' yaug wa nao qho: qin" ra" loze jham re qho: myao mung:- ni" pho" wa aijham: qhid' mae" gaung yug mayug lo:ngad: ra". Ngadqere: ni" khyo re gaung yug yug: na mung:- yao: wa nga" zo" khyo we' sin: yang: ngo pe" kad' zai i? ga: mano: lo: myid' na: ra" ga: nao re ta" kyo" li" genae".

³Nao wa Tabo mae jo; ra" gyang" lho" sag' gae khyo joe" ye: sho'- aitau mae" xo' ye" lo" li" nae". Aimae Bethela jo, qo mae Mao"So re xeim: ngaui" ye ngaui" byid: nae" qhid' mae" ye" lo" na ko" ra" byu sam yaug we' yeqhug' li" nae". Yao: bam mae" dayaug wa cad' be, nau" sam dau: re she: ra". Amung: gatau dayaug wa mug sam khai" re ci mung:- Sam yaug ein: yaug wa sabyi qang: byang" sho' bo: ra" shoqid thaung dathaung re vo; ra".

⁴Yao: bam wa nao re bang" lham se" mung: mug shid' khai" nao re byid' li" genae". Aire nao khae: yu nae" ngad: ra".

⁵Ai: thao nao wa Philisti byu qe: jamu dalam: jo; ra" Gilbea mae" Mao"So: bug gaung khyo do, ye: nae" ngad: ra". Ai: vogaung: kham: dung: mae lapa qe daphung: wa- tang: be, zang be,- khalhao: mad, tang she she mung: bug gaung mae jo; ra" phan mae" gyo" lo: na: ako". Yao: bam go" nhan" ru we' hug' na: li" genae".

⁶nyag din taung" ASANG: byo wa nao re jaung" mung:- nao wa yao: bam: caung:pa" thung" go" nhan" rumae ye bobo mung: hug' ru we' nao wa aibam we' madau: ra" byu dayaug boe" lo: li" nae".

⁷Ceru: boe" lao"- Mao"So: yang nao re jhui" kad' ru pe" rere: kad' wa,.

⁸Gilgala jo, qo khyo nga" qhid' re nao ye" li" nae". Ai mae nao re ngo li" qhug' mung:- phad' ngaui" byid' ra" xeim: jham we' zam" khug: ra" xeim: jham re qhaug' byid: nae" ngad: ra". Ngo joe" li" sho' aimae nhad' ba lao" na wa,- nao pe" kad' ca" rure nao re ngo li" ta" kyo: nae"- ga: ta" ra".

⁹Sholu wa Samuela to" lo" nae" ga: lhang: lo" lao" Mao"So wa Sholu re nhag' lam: asag' byid' ra". Samuela yang yao: re ta" to" ru ja: khao: ngo" ai ba na mae boe" ra".

¹⁰Sholu we' yao" daui daui yaug Gibea khyo joe" ye: gelao"- Lapa qe daphung: yao: re li" qhug' ako". Mao"So: byo wa nyag din taung" yao: re li" jaung" mung: yao: wa aibam gyai bau: yang: go" nhan" ru we' hug' rumae yebo bo: ra".

¹¹Qhid' phyao: yao: re ba: ra" mo, wa yao: ceru: kad' na: rure myao mung:- Kisha nho: yauggai zo: pe"mung: ava" i? Sholu wa lapa boe" va" i? ga: yao: cao: jho" myid' ako".

¹²Ai: mae na mo, wa- ce: lapa gatau qe wa khoru: i? Yao: bam: yao: pho" qe wa khag' ngad: ein: jho ko" i? ga: myid' ako". Ceru wa Sholu lhao" re: lapa boe" vanhaung i? ga" ra" dao: khyo: ajhaung boe" li" ra" khyo ngad: ra".

¹³Sholu wa yao" gyai bau" ra" go" nhan" ru we' hug' ru bin lao"- bug gaung mae" phan khyo ye" lo" ra".

¹⁴Sholu nho: yao: gan wa Sholu re we' daui daui yaug re myao lao"- yao: shid' yaug re- ni" shid' yaug khai: yena ko" i? ga: myid' ra". Sholu wa loze jham re yeqho: na: ru ngad: nga" shid' yaug aijham re ma myao lao"- nga" shid' yaug wa samuela jho" yequ"- ga: tau" ra".

¹⁵Ni" shid' yaug re yao: pe" ta" ra" i? ga: Sholu nho: yao: gan myid' ra".

¹⁶Ailao" Sholu wa gug'nyhug' jham qhug' va" ra" khyo re nga" shid' yaug re ta" kyo" ra"- ga: tau" ra". Ngadqere: yao: kho:kham boe" li" nae" khyo we' sin: yang: Samuela ta" ra" khyo yao: gan re Sholu mata" kyo: ngad: ra".

¹⁷Samuela wa amyu" byu qere Mizpa jo, qo mae caung:pa" thung" we' sin" ra" ham phaung dalam: khai: zhang" yu: ra".

¹⁸Amung: yao: bam re- Israel nho: Mao"So ASANG wa- ngo wa naonhaung" re Egutu mung" mae" jhui" thug' lo mung:- Egutu byu qe: lo, mae" khyad' yu: ru we' naonhaung" re deim" zag: ra" gatau byumyu" qe alhab' mo; lo, mae" khyad' yu va".

¹⁹Ngo wa naonhaung" qug: khai: jham we' mau" qug: jham alhab' mae" khyad' yu: ra" yaug Mao"So ngad:- ngadqere: ana" ba naonhaung" wa ngore ngag: ha: pye' mung: naonhaung" re kho:kham dayaug byid: nae" ngore mho' ako". Gyai gai va"- aimung: ASANG: qhid' kheim: mae amyu" kaung khyo"- amyu" boe: khyo" yezang" ham ge,- ga: ta" ra".

²⁰Ai: thao Samuela wa amyu" kaung dakaung we' dakaung qhid' khyo li" nhao mung:- ASANG wa Benyamin amyu" kaung re khyin: yu: ra".

²¹Aimung: Samuela wa Benyamin amyu" kaung mae" yham khaung jham re qhid' au: khyo li" nhao mung: Matri yham khaung re khyin: yu: ra". Ai: thao Matri yham khaung mae" yauggai qe wa qhid' au: khyo li" gemung: Kisha nho: yauggai zo: Sholu re khyin: yu: ra". Yao: bam wa yao: re qho: ako". Ngadqere: yao: bam yao: re mamyao gelao"-

²²Yao: bam wa gatau dayaug na shi" i? ga: ASANG re myid' ako". ASANG wa- Sholu thoe tau mae na: ra". Yao: wa zai jham: nhaung thao" mae vho' jo; ra" ga: tau" ra".

²³Airumung: yao: bam tao" ye: mung: Sholu re mo,byu qejhao" ye jhui" thug' lo: ako". Yao: wa gaje qe tho' au: ze sho' je: qhang: rure yao: bam myao: ako".

²⁴Samuela wa mo,byu qere- ASANG: yang khyin: to: yaug cemae ngad: ra". Yao: we' dau ru ngonhaung" phaung mae khag' mana- ga: ta" ra". Mo,byu alhab' mo, wa kho:kham pho" kao qhang vashao: wo"- ga: zag: hug' ako".

²⁵Samuela wa kho:kham pho" nho: akho: akhang" we' qo jham re mo,byu qere ta" sho' kyo" ra". Ai: thao gyang" lho" jo, qo mae yao: ke' to" ra" mugsug' paug' mae tung" ra". Aimung: yao: wa yaug khao: ngo" re yham khyo nhao: ke' ra".

²⁶Sholu re: Gibea mae" yham khyo phao: lo" ra". Mao"So: yang yao: bam nhag' lam: mae tin: byid' ra" qam: bo: ra" byu daqhae: yao: we' daga" cao" lo" ako".

²⁷Ngadqere: byugao: qe daqhae: wa byu ceyaug ngonhaung" re agai daja: ja: khoru: qo" kad' nae" i? ga: ta" ako". Yao: bam wa Sholu re maphug' makhyad' jung" mung: yao: re jhaung qhu" pe" maye: byid: ngad: ako".