Read Maru 1SAMUELA 11 Bible Online

1SAMUELA 11 - Maru bible

1SAMUELA 11

¹Lho" dakhye' kyo thao Amon kho:kham Naha wa yao" gyetab re jhui: mung: Gilead mung" mae" Yabe vogaung: re gye kad' yang: aire vang" to" ra". Yabe vobyu qe wa Naha re- ngonhaung" we' myid vang" thao: ce' to: la,- ngonhaung" kho:kham khyo" nao re ngonhaung" khae: yu nae"- ga: ta" ako".

²Naha wa ngo wa daja: ja" dao mae za: naonhaung" we' myid vang" thao: ce' to: nae"- ai wa naonhaung" lo, yo shad' myo, jid' re phaug' pye' byid: mung: Israel byu alhab' mo; dao mae qho' phyo' nae" ru ngad: ra"- ga: ta" ra".

³Yabe vobyu au: jhaung qe wa Israel mung" geim" khyo jao: sho' lagyo: jham re qo" nhao: ke' sho' ngonhaung" re nhad' ba ayo, byid: la,- ngonhaung" re bao" thaug' byid: nae" dayaug re: mana lo: re kam" wa ngonhaung" nao re aseim" kham nae"- ga: ta" ako".

⁴Lagyo: qe Sholu na: ra" Gilbea khyo joe" ye" ako". Yao: bam ai: lau dao: re ta" kyo: gelao" amyu" byu qe wa nhag' lam: thao" yang: gyi: ngug: ako".

⁵Sholu wa ai au: za: yao" nung: jaung lo: tao we' yothaung: mae" joe" vao lo: na: ra". Yao: wa pe"mung ko" i? Pe"mung: yaug khao: ngo" gyi: ngug: na ko" i? ga: myid' ra". Yao: bam wa Yabe mae" lagyo: qe lota" kyo: ko" lau dao: yao: re ta" kyo" ako".

⁶Sholu ceru re the' gyo: lao"- Mao"So: byo wa yao: re jaung" mung: nhag' jam: yo" li" ra".

⁷Yao: wa nung: jaung lo: shid' dau: re she: yu mung: adau dau je; mung: lagyo: qere vhin mung: Israel mung" geim" khyo jao: sho' ye: nhao mung: gyekhe' poe khyo Sholu we' Samuela thao macao" ye" ra" yaug khag' nho: nung: jaung lo: re: ceru: kad' ru qhug' li" nae"- ga: ta" peim: nhao: ke' ra". Israel byu qe wa ASANG pe" kad' nae" rure gyaug gemung: yao: bam alhab' daga" za: thug' li" ako".

⁸Sholu wa aibam re Bezeg jo, qo mae zhang: yu: ra". Israel amyu" mae" 300,000 yaug- Yuda amyu" mae" 30,000 yaug ngad: ako".

⁹Yao: bam Yabe mae" lagyo: qere- ne, mo" ba ba magae: shire yao: bam khyad' yu qhug' li" genae" ngad: ra" khyo naonhaung" vobyu qere lo" ta" kyo: ge,- ga: ta" ke' ako". Yabe vobyu qe ai: lau dao: re the' gyo: gelao"- yao: bam ngaui bau: mung:-

¹⁰Naha re ne, mo" ba nao re ngonhaung" aseim" byid: nae"- nao nug: ra" khyo" ngonhaung" re qo" kad' ra"- ga: ta" ako".

¹¹Ai: myi re Sholu wa yao" byu qere sam phung: khyo" yang kho' ra". Mug: bo" zo" re yao: bam wa gyevo: qe: jamu khyo tao" ye: mung: Amon byu qere khe' zin" ako". Ba gae" lo" yo, mae yao: bam wa ai bam re se' tam" pye' ako". Dang: na mo, wa yaug khao: ngo" yao: khyo yao: phao: sin" lo" ako".

¹²Ai: thao Israel amyu" qe wa Samuela re Sholu wa ngonhaung" kho:kham kad' maang -ga: ta" ra" mo, wa khai: mae ngad: ako" i? Ai bam re ngonhaung" re ab byid: gela,- ai bam re ngonhaung" se' pye' nae"- ga: ta" ako".

¹³Ngadqere: Sholu wa ana" ba wa khag' re: se' pye' ru magai: qhug' nae". Pe"mung:ga"re ana" ba wa Israel byu qere ASANG khyad' yu: ra" ba na ngad: ra"- ga: ta" ra".

¹⁴Amung: Samuela wa yao: bam re ngonhaung" alhab' Gilgala khyo ye gelang:- amung: Sholu wa ngonhaung" nho: kho:kham ngad: ra" khyo" dalhang dam: yeta" gelang:- ga: ta" ra".

¹⁵Airumung: yao: bam alhab' Gilga khyo ye: mung: ai: gyang" lho" jo, qo mae yao: bam wa Sholu re kho:kham ga: ta" hau" ako". Yao: bam wa zam" khug: ra" ngaui xeim: jham re qhaug' byid: mung: Sholu we' Israel byu alhab' mo, poe kad' ako".