Read Maru 1SAMUELA 13 Bible Online

1SAMUELA 13 - Maru bible

1SAMUELA 13

¹Sholu wa byu sam taung re khyin: yu mung: shid' taung re yao: we' daga" Mikhma we' Bethela bam mug: mae na: ako". Dataung re wa yao" yauggai zo: Yonathan we' daga" Benyamin mug: myid mae" Gibea khyo nhao: ke' ra". Sholu wa dang" ra" mo, re yham khyo nhao: ke' ra".

³Yonathan wa Geba mae Philisti gye zug: pho" re se' pye' ra". Ai: rure Philisti byu qe alhab' the' gyo" ako". Ai: thao Sholu wa lagyo: qere nhao: ke' mung: mung" geim" mae labo" cao" mad yang: Hebre byu qe alhab' re gyekhe' nae" nhao: ke' ra".

⁴Israel byu qe alhab' mo, wa Philisti gye zug: pho" re Sholu se' pye' mung: Philisti byu qe yao: bam re nghang: ko" ra" khyo re the' gyo" ako". Aimung: amyu" byu qe wa Gilgala jo, qo mae Sholu we' bobo nae" dao: phyid byid' ako".

⁵Philisti byu qe wa Israel byu qere gyekhe' nae" zang" ham: ako". Yao: bam wa gyekhe' myao: lhin" sam tug myao: jhui: gyezo: khyaug' taung qo" mung:- gyezo: qe wa Pang:lai:: qid yae mae" ma coe nho" myo" ako". Yao: bam wa Bedaven ba thug' shad' mae" Mikhma khyo ye: mung: aimae jamu yekad' na: ako".

⁶Ai: thao yao: bam wa Israel byu qere gyai thin: ra" khyo" gyekhe' ako". Yao: bam re nhag' lam: thao" nhao sho' kad' ako". Israel byu daqhae: wa laug aug' jham mae- laug khyaung jham- laug byo, jham mae- dungkhung: jham mae- qid thaung: jham mae phao: vho' na: ako".

⁷Gatau qe wa Yodan gyaung: gau" de, mung: Gad we' Gilead mug: myid khyo phao: ye" ako". Sholu wa Gilgala mae na: jo; ashi"- yao: we' daga" ngad mo, wa ko, ko, gyaung: nin" na: ako".

⁸Yao: wa Samuela yang pyang: to" ru we' dakhyo: Samuela re nhad' ba lao" na: ra". Ngadqere: Samuela wa Gilga khyo- majoe" li" shi ngad: ra". Amyu" byu qe wa Sholu re to: pye' co' li" na: ako".

⁹Aimung: yao: wa aibam re ai: phad' ngaui" byid' ra" xeim ngaui jham we' zam" khug: ra" xeim: ngaui" jham re ngojhao" cilo geri:- ga: ta" ra". Yao: wa phad' ngaui" byid' ra" xeim: ngaui" re ngaui" byid' ra".

¹⁰Yao: bin: kad' ra" au: re yao: Samuela joe" li" ra". Sholu wa yao: re ye tug: yu nae" thug' ye: mung: yao: re bang" yetug yu: ra".

¹¹Ngadqere: Samuela wa nao pe" kad' va" i? ga: myid' ra". Sholu wa- amyu" byu qe wa ngore to: pye' co' lo" na: ko" ru we' nao joe" li" nae" ga: nao ta" to" ra" ayo, mae nao majoe" li" ngad: ra". Aitho' mago" Philisti byu qe wa Mikhma jo, qo mae zang" ham: na: ako".

¹²Airumung: ngo wa Philisti byu qe wa ce: Gilgala mae ngore gye li" zin" genae"- ASANG mae" myo, nho qo" nae" ngo pe" makad' shi: ein: jho: ra". Aimung: ngo wa xeim: ngaui" ngaui" byid: ca" ein: myid yang: kad' ru ngad: ga: tau" ra".

¹³Samuela wa- ai wa ago mau" ngad: ra"- nao wa ni" Mao"So ASANG: yang nao re byid' ra" amyin" dao: re maphug' cao" lo ngad: ra". Nao phug' cao" ngad: re wa yao: wa nao we' ni" myid:zo: qere Israel amyu" qe: dao mae re: apyad ato mae eib nhao nae" ngad: ra".

¹⁴Ngadqere: ana" nao eib: ru wa maxo' lo nae" pe"mung:ga"re- nao wa yao: re maphug' cao" ngad: ra". ASANG wa yao: o: ra" yaug re qho mung: yao" byumyu" re eib: ra" kho:kham yao: re kad' nhao: li" nae"- ga: tau" ra".

¹⁵Samuela wa Gilgala mae" to" lo" mung: yao" gyaung khyo mae ye" lo" ra". Yao" gyezo: qejhao" ye" lo" au:- dang: ra" amyu" byu qere wa Sholu thao cao" ye" lo" ako". Yao: bam wa Gilgala khyo ye" lo" ako". Sholu wa yao" gyetab re ca: qu" re- khyaug' yo yaug ko ngad: ako".

¹⁶Sholu- yao" yauggai zo: Yonathan we' yao: bam: byu qe wa Benyamin byu qe: mug: myid mae" Geba vogaung: mae jamu kad' na: ako". Philisti byu qe: jamu wa Mikhma jo, qo mae ngad: ra".

¹⁷Philisti gyezo: qe wa sam phung: kho' mung: ye lhe: nae" yao: bam jamu jham mae" thug' lo" ako". Daphung: wa Shua mug: myid mae" Ophra shad khyo-

¹⁸Gatau daphung: wa Bed Horon shad' khyo- aimung daphung: wa Zeboim lao: khaung: we' din"pyad' yo re the' myao: ra" mug: kyo: shad' khyo thug' ye" lo" ako".

¹⁹Israel mung" mae shae be, mo, mana ngad: ako". Pe"mung:ga"re Philisti byu qe wa Hebre byu qe shae we' lhae jham re kad' rure tam" pye' nae" myid: phyid' to" ako".

²⁰(Israel byu qe wa yao: bam: kheim- khoe' mo"- vozaung:- lagam: jham re saui: nae" qhid' mae" lhao" re: Philisti byu qejhao" ye: ca" ako".

²¹Vozaung: we' nung: keim: vose: jham re saui" tho' phug' ngaui thang: the: ngai dakye'- kheim we' khoe' mo" saui" tho' phug' ngaui thang: the: shid' kye' kye' yu: ako".)

²²Airumung: gyekhe' poe ba mae Sholu we' yao" yauggai zo: Yonathan mae" je yang: khag' re: shae we' lhae jham maqo" ngad: ako".

²³Philisti byu qe wa Mikhma bam gyo: re gug: gam nae" qhid' mae" gyezo: daphung: re nhao: ke' ako".