Read Maru 1SAMUELA 15 Bible Online

1SAMUELA 15 - Maru bible

1SAMUELA 15

¹Samuela wa Sholu re- ngo wa nao re yao" byumyu" Israel nho: kho:kham kad' nae" xau gyad byid: nae" qhid' mae" ASANG: yang nhao: ke' yaug ngad:- ana" qam: bo: thao" ra" ASANG pe" ta" rure tae" gyo: wa,-

²Yao: wa Amaleg byu qere qobo dae byid: nae" ngad: ra". Pe"mung:ga"re yao: bam: phug' pho" qe wa Israel byu qe Egutu mung" mae" lo ko" au: yao: bam re gye kad' ako".

³Amaleg byu qere gye yekhe' mung: yao: bam qo" gu: ja: khao: ngo" re bin sho' mhan" kad' pye' wa,- daja: re: datang" to:- yauggai- myiqe:- zoshao:- nug' nau"- alhab' re we' nung:- yao- gola:u- loze jham alhab' re se' tam" pye' wa,- ga: ta" ra".

⁴Sholu wa yao" gyetab jham re khai: zhang" yu mung: Telem jo, qo mae ca: qu" ra". Israel amyu" mae" gyezo: 200,000 yaug- Yuda amyu" mae" 10,000 yaug ngad: ako".

⁵Ailao" yao: we' yao" byu qe wa Amaleg vogaung: khyo ye: mung: qid kin" byaug: ra" qid gyaung: mae ye lham: na: ako".

⁶Yao: wa Kenid byu qere ta" peim: nae" byu nhao: ke" ra". Ai: byumyu" qe: phug' pho" qe wa Israel byu qe Egutu mung" mae" joe" lo: ko" au: yao: bam re lham: nhag' khyag' yu: ako". Aimung: ngo wa naonhaung" re yao: bam we' daga" mabo se' pye' nae" qhid' mae" Amaleg byu qemae" phao: qhui: ge, ga:- ta" nhao: ke' ra". Aimung: Keni byu qe wa aimae" to" lo" byaug: ako".

⁷Sholu wa Amaleg byu qere Egutu mung" ba thug' shad' Havila mae" Shura joe" sho' khyo thao" qang" cao" khe' zin: mung: aung: pye' ra".

⁸Amaleg kho:kham Agag re adaui taung" yu mung: mo,byu qe alhab' re se' pye' ako".

⁹Ngadqere: Sholu we' yao" byu qe wa Agag re tang" to" ako". Gai thao" ra" yao- nung:- nung: nau" jham- yao jham re we' gatau gai: ru alhab' re mase' pye' ngad: ako". Yao: bam wa akyu" mabo: ru we' maphug' de; ra" ja: jham re za: mhan" kad' pye' ako".

¹⁰ASANG wa Samuela-

¹¹Sholu re ngo kho:kham kad' nhao: rure ngo nhag' kaug' ra". Yao: wa ngo mae" phaug' lo" mung: nga" amyin" dao: jham re maphug' cao" ngad: ra"- ga: ta" ra". Samuela wa nhag' yo" ra". Myi geim" ASANG re mho' ra".

¹²Thao: ba ne, seim no'- yao: wa Sholu re yeqho nae" thug' ye" lo" ra". Sholu wa Khame vogaung: khyo ye" lo" byaug: mung:- aimae yao" qhid' mae" aso: daung" zang dazang zhaug' to: co' yang: Gilgala khyo ye" lo" byaug rure Samuela the' gyo" ra".

¹³Samuela wa Sholu jhao" do, lo" ra". Sholu wa yao: re- Samuela we"- ASANG nao re shaman" byid: vashao: wo"- ga: bang" se" dao: ta" zo" re"- ngo wa ASANG: amyin" dao: jham re phug' cao" va"- ga: ta" ra".

¹⁴Samuela wa- aire nung: we' yao jham myang: rure ngo the' gyo" ru wa pe"mung: ru i? ga: myid' ra".

¹⁵Sholu wa aijham re nga" byu qe Amaleg byu qemae" yu: lo: ru ngad: ra". Yao: bam wa aijham re ni" Mao"So ASANG xeim: ngaui" khyo" ngaui" byid: nae" gai: thao" ra" yao we' nung: jham re zam" ci: ako". Dang: ra" gu: re wa bin sho' se' tam" pye' va"- ga: tau" ra".

¹⁶Samuela wa- thang: pye' ge,- ga: amyin" byid: mung: amyi ASANG ngore pe" ta" rure nao re ngo ta" kyo: nae"- ga: ta" ra". Sholu wa- ngore ta" kyo: la,- ga: ta" ra".

¹⁷Samuela wa naoyao" gaung re pe" akhyag yaug mangad: ga: nao myid yu sho' ngadqere: nao wa Israel amyu" kaung qenho: au: jhaung ngad: ra". ASANG wa nao re Israel kho:kham khyo" xau gyad byid' to" ra".

¹⁸Amung: yao: wa ai: makhyang" ra" Amaleg byu qere se' tam" pye' nae" amyin" dao: jham we' daga" nao re nhao: ke' ra". Yao: wa nao re- aibam alhab' re bin: se' tam: sho' mang: zin: nae" ta" ra".

¹⁹Aire nao pe"mung: yao re mho dao: magyo: i? Pe"mung: nao: ai: lanyab jham re ahin agyan sham" yu: mung: ASANG mangaui: ra" lo, mau" jham re kad' i? ga: ta" ra".

²⁰Sholu wa- ngo ASANG: mho dao: gyo: va". Yao: ngore ta" ru we' dakhyo: ngo ye: mung: kho:kham Agag re taung" jhui" lo yang: Amaleg byu alhab' re se' tam" pye' va".

²¹Ngadqere: nga" byu qe wa yao: bam the' taung" yu: ra" gai: thao" ra" yao jham- nung: jham re mase' pye' ngad: ako". Ai: atha" yao: bam wa ni" Mao"So ASANG re xeim: ngaui" khyo" ngaui" byid: nae" qhid' mae" aijham re ce: Gilgala khyo she: lo: ako"- ga: phaug' tau" ra".

²²Samuela wa ASANG wa pe" re o: ra" i? Mho dao: gyo" rure i? mangad: lao"- xeim qhaug' byid' ru we' ngaui" xeim: ngaui" byid' rure i? Yao: re mho dao: gyo" ru wa- gai thao" ra" yao ngaui" xeim: ngaui" byid' ru tho' je: gai: ra".

²³Yao: re tau: lhan" ru wa jan: kad' ra" qhi" magai mung: ngad beim" ru wa so alho re caung:pa" ra" qhi" qobo qo" ra". Nao wa ASANG: amyin" dao: re ha: pye' va" ruyang yao: wa nao kho: kham ngad: rure ha: pye' ava"- ga: ta" ra".

²⁴Sholu wa ngad va"- ngo qobo shad' lhoe" va". Ngo wa ASANG: amyin" dao: re we' ni" pyang dao: re mho dao: magyo: kad' va"- ngo wa nga" byu qere gyaug yang: yao: bam o: ra" khyo" kad' lo: ako".

²⁵Ngadqere: ana" ngo nao re mho' ra"- nga" qobo re khyad' pye' byid: la,- amung: ngo ASANG re qo" caung:pa" nae" qhid' mae" ngo we' daga" cao: tug' ye: lang:- ga: tau" ra".

²⁶Samuela wa ngo nao we' daga" matug' ye: nae". Nao wa ASANG: amyin" dao: re ha: pye' ava". Aimung: yao: wa nao Israel kho:kham ngad: rure ha: pye' ava"- ga: tau" ra".

²⁷Ai: thao Samuela wa to" lo" nae" ga: lhang: lo" ra". Ngadqere: Sholu wa yao" bau: qhang re the' zaui: mung: lao" cad' pye' ra".

²⁸Samuela wa yao: re- ana" ba ASANG wa Israel kho:kham mung"dan: re ni" lo, mae" lao" cad' yu mung: aire nao tho' je: gai: ra" byu dayaug re byid' ava".

²⁹Israel nho: kho:kham Mao"So wa mamhug'- yao" myid rere: malhai" pye' ngad: ra". Yao: wa byu mangad- yao: wa yao" myid re malhai: ngad: ra"- ga: ta" ra".

³⁰Sholu wa ngo qobo shad' lhoe" va". Ngadqere: nang" thao" nga" byumyu" qenho: au: jhaung qe: qhid' kheim: mae we' Israel byu alhab' mo; qhid' kheim: mae phug' myao" ru- ngore qhu" byid: la,- ni" Mao"So ASANG re ngo qo" caung:pa" nae" qhid' mae" ngo we' daga" tug' ye: lang:- ga: phaug' tau" ra".

³¹Aimung: Samuela wa yao: we' daga" cao" ye: mung: Sholu wa ASANG re caung:pa" byid' ra".

³²Samuela wa kho:kham Agag re cekhyo ngojhao" jhui" lo geri:- ga: amyin" byid' ra". Agag wa yao: jhao" lo: ra". Gyaug yang: ko, ko, nin" mung: yao: yao" aung khug mae shid nae" ru wa khoqhi" gyaug ci" ja: ngad: rure myid: na: ra".

³³Samuela wa ni" nho: shae: yang yao: myhi" myo: sho' re yao: zo: mana lo: boe" nhao: pye' ru we' dakhyo:- ana" ni" myhi" wa yao: zo: mana lo nae"- ga: ta" ra". Amung: yao: wa Gilgala mae" phan qhid' au: mae Agag re adau dau je; pye' ra".

³⁴Ai: thao Samuela wa Rama khyo ye" lo" ra". Kho:kham Sholu re: Gibea mae" yham khyo phao: lo" ra".

³⁵Samuela daui: na: ra" myhao"- yao: wa kho:kham pho" re khonhae" re: mamyao lo:ngad: ra". Ngadqere: yao: wa Sholu qhid' mae" kaug' ra". ASANG wa Sholu re Israel kho:kham kad' nhao: rure nhag' kaug' ra".