Read Maru 1SAMUELA 17 Bible Online

1SAMUELA 17 - Maru bible

1SAMUELA 17

¹Philisti byu qe wa Yuda mung" mae" Sokho vogaung: mae gye poe qhid' mae" zang" ham: na: ako". Yao: bam wa Sokho we' Azeka gyo mae" Ephe- Dammim ga: mhang" ra" jo, qo mae jamu kad' na: ako".

²Sholu we' Israel byu qe wa ham: phaung mung: Ela lao: khaung: mae jamu kad' na: ako". Ai mae yao: bam wa Philisti byu qere gye zin: nae" jin" jin" seim" na: ako".

³Philisti byu qe wa bug gaung mae jin: ye; jo, gemung: Israel byu qe wa gatau te' mae" bug gaung mae jin: ye; jo; ako". Yao: bam: agyo: mae lao: khaung: dalam: kyo: to" ra".

⁴Gat vogaung: mae" li" ra" Goliad ga: mang: ra" byu dayaug wa Philisti byu qe: jamu mae" thug' li" mung: Israel byu qere myo, byo; li" lhaung: ra". Yao: wa khyaug' daung" dathu ko qhang mung:-

⁵Sam xe: ngo" joe: ko la" ra" gyid: go ve, gyid: maug zhaung" ra".

⁶Yao" khyid re: gyid: khyid thab' thab' ci ra". Yao" lo, sin mae gyid: lhae tad' vo; ci: ra".

⁷Yao" lhae tad' wa qo, mo" qhi" thau mung: lhae vho' wa jo, to' ngo" joe: la" ra" gyezo: dayaug wa yao" qhid' mae yao" go re vo, yang: su" ye" ra".

⁸Goliad wa ye; jo, mung: Israel byu qere- ai tau naonhaung" pe" kad' na ko" i? Gye poe qhid' mae" jin: ye; jo, ko" i? Sholu nho: jeim qe we"- ngo wa Philisti byu dayaug ngad:- ngo we' jho" zin: nae" naonhaung" byu qemae" dayaug re khyin ge,.

⁹Yao: wa ngore aung: mung: ngore se' pye' re wa,- ngonhaung" wa naonhaung" jeim doe nae". Ngadqere: ngo yao: re aung: mung:- yao: re ngo se' pye' ngad: re wa naonhaung" wa ngonhaung" jeim doe, genae".

¹⁰Ana" ba ngo Israel gyetab re myo, byo, qho: na:- dayaug cao: jho" zin: nae" ga: zag: hug' ra".

¹¹Sholu we' yao" byu qe cere gyo: gelao"- yao: bam gyo" gyaug: ako".

¹²Davi wa Yuda mung" Betlehem vogaung: mae" Ephrim byu Yese nho: yauggai zo: ngad: ra". Yese wa yauggai zo: she' yaug qo" ra". Sholu wa kho:kham kad' ra" ayo, mae yao: wa gyai mao" ava".

¹³Yao" yauggai zo: aqi: sam yaug wa gye poe khyo Sholu we' ye" lo" byaug: ako". Zoqhid' yaug wa Eliab- Zale; yaug wa Abinadab- sam yaug ein: yaug wa Shama ngad: ra".

¹⁴Davi wa ngai: thao" yaug ngad: ra". Aqi: sam yaug Sholu we' daga" na: jo; gyo: mae-

¹⁵Davi wa yao: pho" yao jham re zam: nae" Betlehem khyo dalhang lhang lhaung" phao: lo" ra".

¹⁶Goliad wa Israel byu qere ne, seim myi" thao khao: ngo" byid xe ba lam: lam: myo, byo, qho: ra".

¹⁷Daba re Yese wa Davi re ce: gaug shin: dabye: we' ce: mug jham re yu: vin mung: jamu mae na ko" ra" ni" mao: qejhao" phyad ciye: byid: wa,-

¹⁸Amung: ce: nug' xau khai" jham re wa zug: pho" re yevin byid: wa,- ni" mao: bam khoru: na ko" rure yequ" mung: nao yao: bam re yemyao: va" ru we' yao: bam qao" zin" na ko" ra" khyo re qhu" byid: nae" daja: ja: cilo ri:-

¹⁹Sholu kho:kham- ni" mao: bam we' Israel byu qe alhab' wa Ela lao: khaung: mae Philisti byu qe we' mang: jho" zin" na: ako"- ga: ta" ra".

²⁰Davi wa thao: ba ne, seim no' to" mung: yao zam: nae" gatau dayaug re mau" byid: co' mung: zo:ve yu: vin mung: Yese yang yao: re ta" ru we' dakhyo: ye" lo" ra". Yao: wa Israel byu qe yao: bam: gyekhe' poe jao: khyo ye" lo" byaug gemung: yezag: hug' na ko" au: re jamu khyo joe" ye" ra".

²¹Philisti we' Israel gyezo: qe wa myo, khung: jho" qang mung: gye poe qhid' mae" jo, qo yu: ako".

²²Davi wa zo:ve re zokho byo: ra" zug: pho" we' to: co' mung:- gyekhe' poe shad' khyo yao: mao: bam jhao" tao" ye" lo" mung: yao: bam khoru: ngad: ko" ra" khyo re yemyid' ra".

²³Yao: aibam re dao: jhau: na: au: Goliad wa yao: qhid' phyao: lhaung" kad' ru we' dakhyo: Israel byu qere myo, byo, li" lhaung: ra". Aire Davi the' gyo" ra".

²⁴Israel byu qe wa Goliad re myao gelao" gyaug yang tao" phao: lo" ako".

²⁵Yao: bam yao: cao:- yao: re qu" ge,- yao" myo, byo qho: ra" thoe re tae" gyo: ge,. Ai: yaug re qo" se' ra" yaug re jhaung qhu" qi: byid: nae" ga: Sholu kho:kham dao:so: byid' to" ra". Kho:kham pho" wa aiyaug re yao" myiqe: zo: rere: byid: zho: mung: aiyaug yao: pho" yham khaung re khang: loe; nhao nae" ngad: ra" ga: jho" ta" ako".

²⁶Davi wa yao" nhae mae" mo, re- ceyaug re qo" se' pye' mung: ce: aqho' aqhid mae" Israel byu qere khyad' yu: ra" yaug pe" the' zai i? Aitho' mago"- kao so' daui: na: ra" Mao"So: gyetab re masan masin" kad' ra" ce: Mao"So re- maba: ra" Philisti byu wa khag' ngad: ra" i? ga: myid' ra".

²⁷Yao: bam wa Goliad re qo" se' pye' yaug re pe" kad' byid: qhug' nae" khyo re ta" kyo" ako".

²⁸Davi nho: mao: mo" Eliab wa Davi ai: byu qere dao: jhau: na: rure the' gyo" ra". Yao: wa Davi re nhag' yo: mung:- nao cemae pe" kad' na: i? Ni" yao jham re din"pyad' yo mae khag' zam" na: i? Ave, made; ra" zoshao nao lhe"- mang: zin" rure qu" nae" li" nhaung i? ga: ta" ra".

²⁹Davi wa ana" ngo pe" kad' va" i? Dao: myid: lhao" re: ngo magai: myid: i? ga: ta" ra".

³⁰Yao: wa gayaug khyo lhang: lo" mung: ai: dao: myid: re za: dam: myid' ra". Yao: myid: khao: ngo" yao: wa dao: phyid dakhyo: za: the' gyo" ra".

³¹Byu daqhae: wa Davi ta" ra" dao: re the' gyo" ako". Aimung: yao: bam wa yao: re nhao: ke' ra" Sholu re ta" kyo" ako".

³²Davi wa Sholu kho:kham pho" we" ce: Philisti byu re khag' magai: gyaug nae" maang ngad: ra". Ngo yao: re yezin: nae"- ga: ta" ra".

³³Mangad: nae"- nao yao: re khoru: qo" zin: nae" i? Nao wa zoshao: za: ngad: ru we' yao: wa yao" pyad geim" gyezo: kad' lo yaug ngad: ra" ga: Sholu tau" ra".

³⁴Davi wa- kho:kham pho" we"- ngo wa nga" pho" yao jham re zam: yaug ngad:- yao nau" jham re khang khyi mangad: lao"- vae: yang she: lo" khao: ngo"-

³⁵Ngo cao" khe' mung: aire ye khe' zin: mung: yao nau" re khyad' yu yaug ngad:- khang khyi- vae jham ngore lham: lhe: gelao"- ngo wa aire khyaung: do; mae lham zaui: mung: lhaung" nhag' se' pye' yaug ngad:-

³⁶Ngo wa khang khyi jham we' vae jham re se' pye' qu" va". Kao so' daui: ra" Mao"So: gyetab re masan masin" kad' pye' ra" ce: Mao"So malam: ra" yaug Philisti byu rere: ai: we' dakhyo: za: airu: kad' nae".

³⁷ASANG wa khang khyi jham we' vae jham: lo, mae" ngore khyad' yu: to" ra". Yao: wa ce: Philisti byu: lo, mae" re: ngore khyad' yu: li" nae"- ga: tau" ra". Sholu wa gai va"- ye: wa, ASANG nao we' daga" ngad: ra" ga: tau" ra".

³⁸Yao: wa Davi ve, nae" yao: yao" gyekhin re byid' ra". Aijham wa Davi au: mae yao" yang zhaung: byid' ra" gyid: maug we' go- adao: bau:- ngad: ra".

³⁹Davi wa Sholu nho: shae re gyekhin mae te' mung: khyo su" qu" ra". Ngadqere: yao: matho' su: ngad: ra". Pe"mung:ga"re yao: wa aijham re malhaung" ve, qu" ngad: ra". Aimung: yao: wa Sholu re- ngo wa ceyang gye maqo" zin: aire ngo maci: min:- ga: ta" ra". Airumung: yao: wa aijham alhab' re khyad' pye' ra".

⁴⁰Yao: wa yao" yao zam: zaung bao" re yu mung: qid gyaung: zo: mae" jhad' jhad' mung: ru laug zo: ngo" ce' gaug: yu: mung: yao" thaung a: mae ke' ra". Yao" bag din" lo, lhaui: zhab' ci mung: Goliad we' ye qhug' nae" to" lo" ra".

⁴¹Philisti pho" wa yao" qhid' au: mae yao" go re vo, byid' ra" yaug re qhid' ke' yang: Davi shad' khyo su" li" ra". Yao: wa xo' yang: te' li" na: ra".

⁴²Aimung: Davi re nyang" the' myao: ra" jo, qo khyo joe" li" lao"- yao: wa Davi re qu" jung" ra". Pe"mung:ga"re Davi wa qu" yaung" ra" zolau nau" za: ngad: yang: ngad: ra".

⁴³Yao: wa Davi re ai: vose: pe" qhid' mae" i? Nao ngore lakha: jho: i? ga: ta" ra". Yao: wa yao" so re mang lao: yang: Davi re nhang: kheim: ke' ra".

⁴⁴Amung: Davi re- li" ri:- ni" mao gaung re ngho' jham re we' gug'nyhug' jham re byid: zho" pye' nae" ga: ta" yang: myo, byo lhaung: ra".

⁴⁵Davi wa- nao wa ngore gye kad' nae" qhid' mae" shae we' lhae we' li" ra". Ngo kam" wa nao: yang masan masin" kad' pye' ra" Israel gyezo: qenho: Mao"So qam: bo: thao" ra" ASANG: mang mae nao re gye kad' nae" joe" li" ru ngad:-

⁴⁶Ce: ba na mae yao: ASANG wa nao re nga" qam: so' lo, mae ke' byid' li" nae". Ngo wa nao re aung: pye' mung: ni" au: re ngo phyid' pye' nae". Ngo wa Philisti gyezo: qe: mao gaung jham re ngho' jham re we' gug'nyhug' jham re byid: zho" pye' nae". Ailao"- mug: myid geim" wa Israel byu qe Mao"So qo" ko" rure ba mung:-

⁴⁷ASANG wa yao" byu qere khyad' yu nae" qhid' mae" shae we' lhae maci ca" rure cetau na: ra" mo, yaug khao: ngo" myao: li" genae". Yao: wa gyepoe mae aung doe; yaug ngad mung: yao: wa naonhaung" alhab' re ngonhaung" qam: so' lo, mae ke' byid' li" nae" ga: tau" ra".

⁴⁸Goliad wa Davi khyo dam: su" li" ra" Davi wa phyad za: Philisti byu qe: gyekhe' jo, qo khyo tao" ye" lo" ra".

⁴⁹Yao" lo, re yao" thaung a: mae le; ke' mung: laug zo: dace' re phoe' yu mung: ai: yang Goliad shad' khyo lhaui" ke' ra". Ai: laug zo: wa yao" nga: lao: mae lo" zao" mung: au: gao: re bag: khyoe' pye' ra". Goliad lamhaung: lagoe, goe, yang: myid gaung khyo gyang: lang" lo" ra".

⁵⁰Airu: Davi wa shae maci lo: aung: pye' mung: Goliad re lo, lhaui: bag din" we' laug zo: dace' yang se' pye' ra".

⁵¹Davi wa yao: jhao" tao" ye: mung: yao" dao mae yeye; jo, yang: Goliad nho: shae re shae byao mae" phoe' yu mung: yao" au: re phyid' pye' yang: se' pye' ra". Philisti byu qe wa yao: bam: sulhe: pho" shid: rure myao gelao"- tao" phao: lo" ako".

⁵²Israel we' Yuda byu qe wa zag: hug' mung: yao: bam: thao cao" tao" ye: mung: Gat khyo thao" qang" Ekron kham: mo" joe" sho' yao: bam re cao" khe' ako". Philisti byu qe wa- sharaim khyo ye" ra" Gat we' Ekron khyo thao" qang" mae dae de; lang" bam: ako".

⁵³Israel byu qe Philisti byu qere cao" khe' rumae" dam: phao: joe" lo gelao"- yao: bam wa ai bam: jamu re lanyab phyo' yu: ako".

⁵⁴Davi wa Goliad nho: au: re gaug: yu mung: aire Yerusalem khyo cilo" ra". Ngadqere: Goliad nho: shae lhae jham re yao" zaung mae shaung: to: co' ra".

⁵⁵Sholu wa Goliad re zin: nae" ye" lo" au: yao" gyezug: pho" Abne re aiyaug khag' yauggai zo: ngad: ra" i? ga: myid' ra". Abne wa Asang kho:kham pho" we" ngo maba ga: tau" ra".

⁵⁶Sholu wa- aire wa yeqho: myid: wa,- ga: amyin" khyo" ke' ra".

⁵⁷Davi Goliad re bin: se' thao jamu khyo tug' joe" lo lao"- Abne wa yao: re Sholu jhao" jhui" lo" ra". Davi wa Goliad au: re vo, ci: ashi"-

⁵⁸Sholu wa yao: re zolau: pho" we"- nao khag' yauggai zo: ngad: i? ga: myid' ra". Davi wa- ngo wa Betlehem vogaung: mae" ni" daui daui yaug Yese nho: yauggai: zo: ngad: ga: tau" ra".