Read Maru 1SAMUELA 19 Bible Online

1SAMUELA 19 - Maru bible

1SAMUELA 19

¹Sholu wa yao" yauggai zo: Yonathan we' yao" zug: alhab' re yao: Davi re se' nae" seim" to" rure ta" kyo" ra". Ngadqere: Yonathan wa Davi re gyai ngaui: ra".

²Airumung: yao: wa Davi re- nga" pho" wa nao re se' seim" seim" na: ra". Jeju khyo" ne,mo" ba ne, seim re lha" wa,- khag' maba: ra" jo, qo mae yevho' na wa,.

³Nao vho' na: ra" pa: din" mae ngo wa nga" pho" nhae mae yeye; jo, nae". Amung: ngo yao: re ni" khyo ta" nae". Ngo daja: ja: myao: ngad: re ngo nao re ba nhao nae"- ga: ta" ra".

⁴Yonathan wa Sholu re Davi khyo re khin" kyo: mung:- nga" pho" we"- ni" daui daui yaug Davi re shad' ra" mau" dakad' wa,- yao: wa nao re shad' ru khonhae" re: makad' ngad: ra" dakhyo" ta" re- yao: kad' lai: lo: ra" gu: ja: khao: ngo" wa nao re qi: sho' bao" thaug' byid' ava".

⁵Goliad re yao: se' au: yao" kao so' re dan yang: kad' ava". ASANG wa Israel byu qe: qhid' mae" qi: sho' aung doe, nhao: ava". Nao aire myao: au: nao bau" ava". Aire ana"- nao pe"mung: ai: qobo maqo" ra" yaug re shad' ra" mau" nao kad' nug mung: akhyo dajhid' re: majo; rure Davi re pe"mung: se' nug: i"- ga: ta"ra".

⁶Sholu wa Yonathan yang ta" rure ba: gyo: mung: yao: Davi re mase' nae" ga: ASANG: mang re lao: yang: jham tang" ra".

⁷Ailao" Yonathan wa Davi re khai: yu mung: yao: re ja: khao: ngo" ta" kyo" ra". Ai: thao yao: wa Davi re Sholu jhao" jhui" lo" ra". Davi wa qhid' phyao: we' dakhyo: kho:kham pho" re caung da" byid' ra".

⁸Philisti byu qe we' gyekhe' poe dam: boe" ra". Davi wa ai bam re khe' zin: mung: yao: bam re aung: pye' ra". Yao: bam bin sho' tao" phao: lo" ako".

⁹Daba mae ASANG mae" joe" li" ra" makhyang" byo wa Sholu re vao: jaung" ra". Yao: wa yao" yham mae lo, mae lhae tad' ci yang: zaung: jo; ra". Davi re: tang: be, yang aimae zaung: jo; ra".

¹⁰Sholu wa Davi re yao" lhae tad' yang khinqae mae geim: ze; te' to: nae" seim" ra". Ngadqere: Davi wa aire vha: pye' ra" lhae tad' wa khinqae mae lo" zaug: jo; ra". Davi wa tao" phao: lo" mung: loe; phao: lo" ra".

¹¹Ai: myi mae yao: Sholu wa byu daqhae: re Davi yham re lhaug' mung: thao: ba ne, seim re se' pye' nae" nhao: ke' ra". Davi yham sang myhi" Mikha wa yao: re ana" myi nao maphao re wa ne, kao nao shid: ru qhug' nae"- ga: ta" peim: byid' ra".

¹²Yao: wa Davi re bao: zo: kham: khyo" gyo" lo" nhao mung: Davi wa tao" phao: loe; lo" ra".

¹³Ai: thao yao: wa yham khug: so alho re yu mung: aire yab jaung: dao mae to: mung: au: khyi" mae cad' be, mug' yang kad' ra" au: khau" to: mung: aire mai pho' vhe' to" ra".

¹⁴Sholu byu qe Davi re taung: nae" joe" li" gelao" Mikha wa yao: bam re Davi no: ra" ga: lam: ta" ke' ra".

¹⁵Ngadqere: Sholu wa yao: bam re yao: Davi re ye dam: qu" genae" qhid' mae" nhao: ke' ra". Yao: wa ai bam re- yao" yab jaung: mae" yao: cekhyo dao: lo geri:- ngo yao: re se' nae"- ga: amyin" byid' ra".

¹⁶Yao: bam wa akhug khyo vao ye: ko" re- yab jaung: dao mae jo; ra" yham khug: so alho re we' au: shad' mae cad' be, mug' yang kad' ra" au: khau" re za: yemyao: ako".

¹⁷Sholu wa Mikha re- nao ngore ceru: lhang yang: nga" gyevo re pe"mung: phao: loe, nhao: ke' va" i? ga: ta" ra". Yao: re phao: loe, nae" ngo mabao" byid: re wa ngore se' nae" ga: yao: ta" ra" ga: tau" ra".

¹⁸Davi wa phao: loe; lo" mung: Rama mae na: ra" Samuela jhao" ye" ra". Sholu yao: re pe" ru: kad' ra" khyo ja: khao: ngo" Samuela re ta" kyo" ra". Ai: thao yao: we' Samuela wa Naiod khyo ye: mung: aimae yena: ako".

¹⁹Davi wa Rama mae" Naiod mae na: ra" khyo Sholu re ta" kyo" ako".

²⁰Airumung: yao: re taung: nae" byu daqhae: re nhao: ke' ra". Yao: bam wa lapa daphung: go" nhan" ru we' hug' mung: yao: bam: au: jhaung khyo" Samuela we' daga" ngad: rure myao: ako". Ai: thao Mao"So: wa Sholu nho: byu qere vao: jaung" mung: yao: bam re: go" nhan" ru we' zag: hug' ako".

²¹Sholu ceru re the' gyo: lao"- yao: wa lagyo: je: laug sho' nhao: ke' ra". Yao: bam re: go" nhan" ru we' zag: hug' ako". Yao: wa sam lhang ein: lhang lagyo: qere nhao: ke' ra". Ai bam re: dakhyo: za: kad' ako".

²²Aimung: Sholu wa Rama khyo yao: yao: to" ye" lo" ra". Seku mae" qid thaung qi: khyo yao: joe" lo lao"- Samuela we' Davi khai: mae na ko" ra" khyo re myid' ra". Naiod mae na: ako" ga: ta" kyo" ako".

²³Yao: aikhyo ye" lo" au: yao: rere: Mao"So byo vao: jaung" mung: yao: wa Naiod khyo joe" sho' go" nhan" ru we' zag: hug' ra".

²⁴Yao: wa yao" mai bau: jham re khyad' pye' mung: Samuela qhid' kheim: mae go" nhan" ru we' zag: hug' ra". Ai: ba ba gyam ai:myi myikhyeim gaung pyad' lang" jo; ra". (Ceru wa Sholu lhao" re: lapa boe" vanhaung i? ga: ta" ra" dao: khyo: ajhaung ngad: ra".)