Read Maru 1SAMUELA 2 Bible Online

1SAMUELA 2 - Maru bible

1SAMUELA 2

¹Hana wa- ASANG wa nga" nhag' lam: mae ngaui bau" ru pyang" byid' ava". Yao: kad' ra" lo, mau" mathao mae ngo khoqhi" ngaui bau" i? Ngo wa nga" gyevo qere qi: pye' va". Mao"So ngore bao" thaug' byid: va" ruyang ngo wa khoqhi" sho' ngaui bau" i?

²ASANG re" ru: gyang" lho" ru khag' mana yao: we' dau ru khag' mana- ngonhaung" Mao"So ru" ra" gug: gam byid: yaug khag' mana.

³Naonhaung" nho: phug: ta" ra" thoe qi: re thang: pye' ge,. Naonhaung" nho: ngad beim: dao: jham re tae" lo" nhao ge,. Pe"mung:ga"re ASANG wa ba: ra" Mao"So ngad mung: byu qe kad' ko" ra" lo, mau" alhab' re yao: wa dao: kho' ra".

⁴Qam: bo: ra" gyezo: qenho: lo, la: jham wa gyug' byaug: ako". Ngadqere: qam: nang: mo, wa qam: bo: li" ako".

⁵Ganhae" zo" gyi: mo, wa- ana" yao: bam yao" gaung re zo:ve qho: zo" ra" okaung kad' ako". Ngadqere: vae: moe; mo, wa vae: mamoe; loko" ngad: ra". Zoshao maqo" ra" yham sang myhi" wa zoshao nhad' yaug khau: ava". Ngadqere: zoshao myao: sho' qo" yaug wa dayaug re: madang ngad: ra".

⁶ASANG wa se' pye' mung: kao so' dam: byid' ra". Yao: wa byu qere movo: mug: khyo nhao: ke' ra". Amung: yao: bam re dam: jhui" yu: ra".

⁷Yao: wa byu daqhae: re myaung sho: nhao mung: gatau qere wa jo,nho" qo" nhao: ra". Yao: wa daqhae: re nyham nhao mung: gatau qere wa qi" qhang nhao: ra".

⁸Yao: wa myaung sho: mo, re phalhug bam" mae" vo; to' mung: qo ca" mo, re yao: bam: qug: khai" kyi" khyag' rumae" tau: to" ke' ra". Yao: wa yao: bam re kho:kham nau" qenho: byin cao boe" nhao mung: yao: bam re nga: qo" ra" jo, qo mae nha: to" ra" myid gaung: apan aqao: jham wa ASANG: ngad: ra". Aijham: dao mae yao: wa mug: myid re zao: to" ra".

⁹Yao: wa yao" jhaug' zaug: ra" byu qe: kao so' re gug: gam byid' ra". Ngadqere: makhyang" ra" mo, wa mug: cad' yo mae byaug: lo" ako". Byu wa yao: yao" qam: so' yang maqo" aung myaug ngad: ra".

¹⁰ASANG: gyevo qe wa se' tam" pye' ru qhug' li" genae". Yao: wa mug:gaung mae" yao: bam re mug: dam: yang: gye kad' li" nae". ASANG wa mug: myid geim" re dao: kho' li" nae". Yao: wa yao" kho:kham re qam: so' byid' li" nae". Yao: wa yao" yang khyin: yu: to" ra" kho:kham re aung doe; nhao: li" nae"- ga: akyu" mho' ra".

¹¹Ai: thao Elkana wa Rama mae" yham khyo dam: phao: lo" ra". Ngadqere: zoshao Samuela wa Shilo mae thang na: jo; mung: khinjaung pho" Eli qao: mae na yang: ASANG re caung da" byid' ra".

¹²Eli nho: yauggai zo: qe wa byu nghang: qe ngad: ako". Yao: bam wa ASANG: dao: re matae" gyo: mo,-

¹³Mo,byu qeyang o: ra" khinjaung qe we' sin" ra" phug' cao" nae" thung" li jham rere: maphug' cao" ngad: ako". Ai: atha"- byu dayaug yao" xeim: re li" ngaui" byid' au:- khinjaung pho" nho: daui daui yaug wa zau: sam khe' de; ra" yaug gaung: qhang ci yang: lhaung" li" ra".

¹⁴Sho: jham jho' na shi" au:- yao: wa ai: zau: yaug gaung: qhang re sho: ug: mae" thug' ze, mung: zau: yaug gaung: mae qo" thug' ze; yu: ra" gu: wa khinjaung pho" qhid' mae" ngad: ra". Xeim: ngaui" byid: nae" Shilo khyo joe" li" ko" ra" Israel byu alhab' wa airu: kad' ru qhug' ako".

¹⁵Aitho' mago"- xau gu: re za: qhid' yu mung: maphad' ngaui" shire- khinjaung pho" daui daui yaug joe" li" mung: ai: xeim: ngaui" byid' na: ra" yaug re- khinjaung pho" kao zo: nae" sho: dajhid' byid: la,- yao: wa shonyo, re makhae: yu nae"- shojam: re za: khae: yu: li" nae"- ga: lhaung" ta" ra".

¹⁶Ai: yaug wa jo: ru kad' mung: xau re shi" sao qhid' phad' ngaui" nhao shi la,- thao lao" nao o: ru yu wa,- ga: ta" re- khinjaung pho" daui daui yaug wa mangad:- ngore sho: ana" byid: la,- nao mabyid: re wa- ngo wa aire maqad maqui" yu: yu nae" ga: lhaung" ta" ra".

¹⁷Eli nho: yauggai zo: qenho: ce: qobo wa ASANG: qhid' kheim: mae gyai xo: jo; ra". Pe"mung:ga"re yao: bam wa ASANG re qhaug' byid' ra" xeim: jham re airu" ra" maphug' makhyad' lo, mau" we' kad' geyang: ngad: ra".

¹⁸Ai: ayo, gyo: mae yauggai nau" Samuela wa- gyang" lho" ra" jid: mo" bau: re ve, mung:- ASANG re xo' yang: caung: da" byid' ra".

¹⁹Samuela nho: yao: myhi" wa bau: qhang nau" dakhye' re khyab' mung: zin khao: ngo" xeim: re ngaui" byid: nae" yao" yham sang pho" we' daga" cao" ye" lo" au: re Samuela qhid' mae" ciye: byid: byid: mung: lhaung" kad' ra".

²⁰Ailao" Eli wa Elkana we' yao: myi: re lhaung" shaman" byid' ra". Amung: yao: wa- Elkana re- ASANG re nao qhaug' byid' to" ra" yaug: gaung tha" ce: myiqe: khyo" yang ASANG wa nao re zoshao gatau byid: vashao: wo"- ga: ta" ra". Ai: thao yao: shid' tao wa yham khyo lhaung" phao: lo" ako".

²¹ASANG wa Hana re shaman" byid: mung: yao: wa yauggai zo: sam yaug we' myiqe: zo: shid' yaug re khau: ashi". Zoshao Samuela wa ASANG: yang gun caung byid' rumae qi" qhang: li" ra".

²²Ana" Eli wa gyai mao" ava". Yao: wa yao" yauggai zo: qe Israel byu qere kad' ra" khyo ja: khao: ngo" re we' yao: bam wa ASANG: qhid' kheim: Zaung kham: dung: mae mau" kad' ko" ra" myiqe: qe we' lhao" jho" yab ko" ra" thoe re xo' yang the' gyo" ra".

²³Airumung: yao: wa- yao: shid' tao re naotao pe"mung: airu" ra" lo, mau" re kad' na ko" i? Naotao kad' ko" ra" makhyang" ra" khyo yaug khao: ngo" yang ngore ta" kyo" ako".

²⁴Nga" zo: qe we"- aire thang: pye' ge,- ASANG: byu qe ta" na: ra" khyo ce wa qu" gyaug qu" lhaung sho' ja: ngad: ra".

²⁵Byu dayaug wa gatau dayaug re qobo shad' ngad: re ASANG yao: re qo" vha byid' ra". Ngadqere: ASANG re qobo shad' ra" yaug re khag' yang qo" vha byid: nae" i? ga: ta" ra". Ngadqere: yao: tao wa yao: pho" dao: re malhaung" tae" gyo: byid: ngad: ako". Pe"mung:ga"re ASANG wa yao: tao re se' pye' nae" myid: phyid' to: yang: ngad: ra".

²⁶Zoshao Samuela wa xo' yang qi" li" ra". ASANG: qhid' kheim:- byu: qhid' kheim: mae nga: qo" ra".

²⁷Lapa dayaug wa ASANG mae" ce: mungdao: we' daga" Eli jhao" joe" li" ra". Aiwa- ni" phug' pho" Arun we' yao" yham byu qe wa Egutu kho:kham nho: jeim doe; na ko" au: ngo wa ngoyao" gaung re Arun re qhu" byid: va".

²⁸Israel myu" kaung alhab' mae" ngo wa yao" yham khaung re nga" khinjaung kad' mung:- phan re phad' ngaui" nae"- sheim nae pyo: xau re phad' ngaui" nae" khinjaung bau lo, kao: re ve, mung: ngo we' jho" qham nae: mo, kad' nae" khyin: yu va". Amung: ngo wa phan dao mae phad' ngaui" byid' ra" xeim: ngaui" jham mae gae bam qo" khae: yu genae" akhang" yao: bam re byid' to: va".

²⁹Aire nga" byumyu" mae" ngo mho' ra" ngaui" xeim: jham re we' xeim: jham re naonhaung" pe"mung: qu" so' kho' byid ko" i? Eli we"- nga" byu qeyang ngo qhaug' byid' ra" xeim: jham alhab' mae" gai: thao" ra" dau jham re yao: shid' tao re zo" xau nhao: ra" khyo" ngore tho' je yang: ni" zo: tao re pe"mung: nga: yhe' byid' i?

³⁰Ngo Israel byumyu" qenho: Mao"So ASANG wa nao we' ni" kaung re yo, byang" khinjaung qekhyo" ngore caung da" byid: geshao: ein: lai: lo: ra" yo, mae dao:so: byid' to: va". Ngadqere: ana" ngo aire mato: lo nae". Ai: atha"- ngore nga: yhe' ra" yaug re ngo nga: yhe' nae". Ngo re maphug' makhyad' kad' mo, re ngo maphug' makhyad' kad' nae".

³¹Tae" gyo: wa,- ni" yham khaung mae" yauggai dayaug re: mao: sho' mana geshao:- ni" yham khaung we' ni" kaung mae" zolau: alhab' re ngo se' pye' nae" ayo, joe" li" na: ra".

³²Nao wa qug: khai qug: khai: qhug' mung: Israel byu gatau dayaug re ngo byid: nae" ngad: ra" shaman" jeju alhab' re nao myo, qu" nyad: li" nae". Ngadqere: ni" yham khaung mae" yauggai dayaug re: mao sho' madam qhug' na logenae".

³³Ngadqere: ngo wa ni" myid:zo: qemae" dayaug re daui: na nhao: to: shinae". Yao: wa khinjaung khyo" ngore caung da" byid' li" nae". Ngadqere: yao: wa myo,jid boe" mung: myid: lao" ru alhab' seim" pye' li" nae". Amung: ni" myid:zo: gaje qe wa mai: shid mung: li" genae".

³⁴Ni" yauggai zo: tao ngad: ra" Hophni we' Phineha tao daba mae za: shid tao: geim" shid gelao"- ceru wa ngo ta" to" ru ja: khao: ngo" jab byang" li" nae" ngad: rure nao re qhu" byid' li" nae".

³⁵Ngo wa ngore jhaug' zaug nae" ra" khinjaung dayaug re khyin: yu mung:- ngo yao: re kad' nhao nug: ra" ja: alhab' re kad' li" nae". Ngo wa ngo khyin: yu: to" ra" nga" kho:kham nho: qhid' kheim: mae khonhae" re: caung da" byid nae" ngad ko" ra" myid:zo: qere yao: re ngo byid: nae".

³⁶Ni" myid:zo: qemae" na: dang: ra" yaug khag' ngadqere: khinjaung qejhao" ye: mung:- ngaui we' zo:ve re yemho' yu: li" genae". Amung: zo:ve the' zo: nae" qhid' mae" khinjaung qere bao" thaug' byid' ra" mau" qo" zaui nae" akhang" mho' ca" li" nae"- ga: ta" ra".