Read Maru 1SAMUELA 20 Bible Online

1SAMUELA 20 - Maru bible

1SAMUELA 20

¹Ailao" Davi wa Rama mae jo; ra" Naiod mae" phao: lo" mung: Yonathan jhao" ye" ra". Yao: wa ngo pe" kad' va" i? Ngo pe" yug: shad' lhoe" va" i? Ngo re se" nug sho' ni" pho" re ngo pe" kad' shad' va" laug i? ga: myid' ra".

²Yonathan wa- nao shid nae" rure Mao"So tam" pye' vashao:- nga" pho" wa akhyag: ru ngadqere:- makhyag: ru ngadqere: ja: khao: ngo" ngore ta" kyo: mung: ce: khyo rere: yao: manyham" to: ngad: ra". Airu Dang: ra" mangad: i? ga: tau" ra".

³Ngadqere: Davi wa nao ngore khoqhi" o: rure ni" pho" nyang" ba: ra". Yao: pe" kad' nae" seim" to" rure nao re maba nhao nae" yao: myid: phyid' to" ra". Pe"mung:ga"re nao gyai no sho' kham zo: nae" ngad: ra". Ngo wa shid: rumae" dabye za: ava: lo" rure kao so' daui: ra" ASANG: khyo" nao re ngo jham tang" ra"- ga: ta" ra".

⁴Yonathan wa- nao o: ru pe" re: ngo kad' nae" ga: tau" ra".

⁵Davi wa- ne,mo" ba wa lho" xin: poe ngad: ra" ngo wa kho:kham pho" we' daga" zozo" re zo: ca" maba- ngadqere: nao qad: re wa sao pho" ba myi" thao joe" sho' pa: din" mae ngo yevho' na nae".

⁶Ngo ai: saboe" mae mabo: rure ni" pho" qu" xam: yang: ngad: re- nga" yham khaung geim" zin khao: ngo" qhaug' byid' ra" xeim: ngaui" re ngaui" byid: ca" yang: Betlehem mae" yham khyo hin hin lo" ca" mung: nao re akhang" mho' co' ra" ein: yao: re ta" byid: la,-

⁷Yao: wa gai va"- ga: ta" re wa ngo wa gug: gam nae"-ngadqere: yao: nhag' yo" li" re wa yao: ngore dae te' nae" myid: phyid' to" ra" khyo re nao ba: li" nae".

⁸Jeju khyo" ngore ceru kad' byid: la,- nao ngore byid' to" ra" gyang" lho" dao: so re jhaug' zaug sho' kad' wa,- ngadqere: ngo qobo qo" re wa naoyao" yang ngore se' la,- ngo se' pye' qhug' nae" ni" pho" jho" pe"mung: ngore jhui" lo" ca" nae" i? ga: ta" ra".

⁹Yonathan wa airu" rure myid lhao" re: damyid wa,- nga" pho" nao re dae te' nae" myid: phyid' to" ru daja: ja: re ngo ba: re wa nao re mata" kyo: nae" ngad: ra" i? ga: tau" ra".

¹⁰Ailao" Davi wa ni" pho" nhag' yo: taung" nao re dao: phyid byid' ngad: re ngore khag' yang ba nhao zai i? ga: myid' ra".

¹¹Yonathan wa pa: din" khyo ye: lang:- ga: ta" ra". Amung: yao: shid' zo: ye" lo" ako".

¹²Yonathan wa Davi re Israel nho: Mao"So ASANG wa nga" shid' yaug: nho: sagse: ngad vashao:- ne, mo" ba ce: ayo, mae we' thao: ba mae nga" pho" re ngo dao: myid: myid: nae". Ni" shad' mae yao" ave, gai: ngad: re nao re ngo dao: pyang: ke' nae".

¹³Yao: nao re dae te' nae" yaung: to" re ai: khyo re nao re ngo maba nhao lo: gug: gam za: maphao: lo" nhao yang: ngad: re wa ASANG wa ngore se' pye' vashao:- yao: wa nga" pho" we' daga" na: lo: ru we' dakhyo: ASANG wa nao we' daga" na vashao: wo"-

¹⁴Ngo na: dang: jo; re wa ni" gyang" lho" ra" dao:so: re jhaug' zaug sho' kad' mung: ngore dao:so: zaung la,- ngadqere: ngo shid: byaug: re wa-

¹⁵Nga" yham khaung re apyad ato mae dakhyo: za: dao:so: zaung: ru qhu" byid: la,-ASANG wa naonhaung" gyevo qe alhab' re bin sho' se' tam" pye' lao"-

¹⁶Nga" shid' yaug yao: cao: to" ra" dao: so mabyo, lo: jo; jo, vashao:- ai: dao: so byo; lo" re wa ASANG wa nao re qobo dae byid: li" nae"- ga: ta" ra".

¹⁷Yonathan wa yao: re jhid'de; ra" khyo Davi re dao:so: dalhang dam: byid' ra". Pe"mung:ga"re Yonathan wa yao" gaung re jhid'de; ra" qhi" Davi re jhid'de; ra".

¹⁸Ai: thao Yonathan wa Davi re- ne,mo" ba wa lho" xin: poe ba ngad yang: zozo: jo, qo mae nao mabo re wa nao mabo: rure qo" xam" li" nae".

¹⁹Sao pho" ba wa je yang: nao mabo: rure qu" xam" li" nae". Aimung: ganhae" nao lhaung" vho' jo; ra" jo, qo khyo ye: mung: aitau mae laug baui jham bam: to" ra" jo, qo nhaung thao" mae yevho' na wa,-

²⁰Ailao" ngo wa aire thao te toe' yang: myo: sam khe' bag nae".

²¹Ai: thao ngo wa nga" daui daui yaug re ai: myo: jham re yeqho nhao nae". Ngo wa yao: re- qu" wa,- myo: jham wa ce: ni" shad' mae ngad: ra"- ye gaug: yu: wa,- ein: ta" re- ai: lajheim: wa nao wa gug: gam mung: gai: na: thug' li" ra". Nao gyaug ci" maca" nae" ein: rure kao so' daui: na: ra" ASANG khyo" yang ngo jham tang" ra".

²²Ngadqere: ngo wa yao: re- myo: jham nao mae" thoe" shad' khyo ngad: ra" ein: ta" re wa- to" lo" wa,- pe"mung:ga"re ASANG wa nao re phao nhao: ru ngad: ra".

²³Nga" shid' zo: yao: cao: jho" ta" ra" dao:so: qhid' mae" kam" wa nga" shid' zo: apyad ato mae zam" ci nae" ein: rure ASANG ba: li" nae"- ga: ta" ra".

²⁴Aimung: Davi wa pa: din" mae vho' na: ra". Lho" xin: poe ba mae Sholu kho:kham zozo: nae" joe" li" mung:-

²⁵Khinqae nhae yao: lhaung" zaung: ra" jo, qo mae zaung: ra". Abne wa yao" nhae mae zaung: ra". Amung: Yonathan wa yao" tau" tae' mae zaung: ra". Davi jo, qo mae wa akeim ngad: ra".

²⁶Ngadqere: Sholu wa ai: ba mae pe" mata" ngad: ra". Pe"mung:ga"re yao: daja: ja: boe" sam" ra"- yao: wa caung:pa" thung" khyo" masan masin" boe" sam" ra" ga: jho: ra".

²⁷Thao: ba lho" xin: poe ba thao: ba mae- Davi jo, qo wa akeim ngad: jo; ashi"- ailao" Sholu wa Yonathan re- Davi ayenhe' re: ana" ba re: zo pe"mung: mali" zo" ra" i? ga: myid' ra".

²⁸Yonathan wa Betlehem khyo lo" nae" qhid' mae" ngore akhang" mho' ra".

²⁹Yao: wa jeju khyo" ngore lo" nhao la,- pe"mung:ga"re nga" yham khaung wa vogaung: mae xeim: ngaui" byid' ra" poe kad' na: ako". Nga" mao: wa ngore ai: mae boleim" nae" ta" to" ra". Aimung: nao wa nga" byin cao: ngad: re wa ngore nhao: ke' la,- nga" ba nam qere lo" qu" nae"- ga: ta" ra". Ce: mathao mae yao: wa ni" zoboe" mae mana: ru ngad: ra".

³⁰Sholu wa Yonathan re nhag' jam: yo: mung:- ni" myhi" wa khoqhi" sho' tau: lhan: myid bo yaug we' jhaug' mazaug yaug ngad: ra" i? Nao wa Davi shad' bo: bode; mung: naoyao" gaung we' ni" myhi" re qho' phyo' na: rure ngo ba va".

³¹Davi adaui: na na wa nao ce: mung"dan: nho: kho:kham magai: boe" nae" ngad: rure mabeim: i? Ana" yao: re cekhyo yejhui" lo wa,- yao: shid ca" ra"- ga: ta" ra".

³²Yonathan wa yao: pe"mung: shid ang: i? Yao: pe" kad' va" i? ga: phaug' tau" ra".

³³Sholu wa yao" lhae tad' re Yonathan re se' nae" geim: ke' ra". Davi re se' nae" yao: pho" gaigai: yao: myid: phyid' to: va" rure Yonathan beim" ra".

³⁴Yonathan wa nhag' yo: mung: ai: zoboe" mae" to" lo" ra". Ai ba mae pe" mazo: ngad: ra". Aiba wa lho" xin: poe ba shid' ba ein: ba ngad: ra". Yao: wa Davi khyo re gyai myid myo" ra" pe"mung:ga"re Sholu wa yao: re maphug' makhyad' kad' pye' yang: ngad: ra".

³⁵Thao: ba ne, seim re Yonathan wa yao: shid' yaug jho" dang: to" ru we' dakhyo: Davi re ye qhug' nae" qhid' mae" pa: din" khyo ye" lo" ra". Yao: we' daga" zolau: dayaug re jhui" ye" lo" ra".

³⁶Aimung: yao: re- ngo myo: bag nae"- yetao" qho: lo ri:- ga: ta" ra". Zolau: pho" wa tao" ye" lo" ra". Yonathan wa yao: re lai sho' myo: bag: ke' ra".

³⁷Myo: gyo" ra" jo, qo khyo ai: zolau: pho" joe" ye: lao" Yonathan wa myo: wa lai: lo" va" ra".

³⁸Ai: mae daye; jo,- hin wa,- ga: hug' ra". Zolau: pho" wa myo: jham re gaug mung: yao" ASANG jhao" ai: lajheim: re maba lo: dam: tug' lo: ra". Yonathan we' Davi za: aba: ako".

⁴⁰Yonathan wa yao" shae lhae re zolau: pho" re byid: mung: aijham re vogaung: khyo cilo" nae" yao: re ta" ra".

⁴¹Zolau: pho" to" lo" thao- Davi wa laug baui bam: to" ra" nhaung thao" mae" to" li" mung: pad' thaug' thaug' yang: yao" myo, khung: re sam lhang myid gaung khyo goe; gyo" ra". Yao: shid' yaug yao: cao: bobaug jho" baug zo" re" Davi we' Yonathan shid' yaug geim: ngug: ako". Davi kaug' ru wa Yonathan tho' xo: ra".

⁴²Ai: thao Yonathan wa Davi re Mao"So we' daga" ngad vashao: nao we' ngo- ni" myid:zo: qe we' nga" myid:zo: qe wa nga" shid' yaug yao: cao: jho" to" ra" gyang" lho" dao:so: re apyad ato mae zaui" ci genae" rure ASANG ba: li" nae"- ga: ta" ra". Ailao"- Davi to" thug' lo" mung: Yonathan wa vogaung: khyo tug' phao: lo" ra".