Read Maru 1SAMUELA 21 Bible Online

1SAMUELA 21 - Maru bible

1SAMUELA 21

¹Davi wa Noba mae" khinjaung Ahimeleg jhao" ye" ra". Ahimeleg wa yao: re ko, ko, nin" mung: li" tug: yu yang: cekhyo naoyao: za: pe"mung: joe" li" i?

²Davi wa ngo wa kho:kham mau" we' cekhyo li" ru ngad:- yao: wa ngore kad' nhao: ke' ra" mau" zo" re khag' rere: daba nhao- ga: ta" ra". Nga" byu qere kam" wa jo, qo dalam: lam: mae ngore li" qhug' nae" ngo ta" to: va".

³Aimung: ana" zokho pe" ja: qo" i? Ngo re mug ngo" khai" mangad: lao"- nao qo" ru pe" ngadqere: ngore byid: la,- ga: ta" ra".

⁴Khinjaung pho" wa ngo wa yu" yu" mug maqo"- gyang" lho" mug za: aqo"- ni" byu qe wa ana" gyo: shi" za: myiqe: qe we' gaung sho: majho" zam: geyang: ngad: re wa aire naonhaung" gai: zo" ako"- ga: tau" ra".

⁵Davi wa yao: bam majho" zam" genae"- ngonhaung" wa yu" yu" gye mau" khyo ye" au: lhao" re: nga" byu qe wa khonhae" re: caung:pa" thung" we' sin: yang: yao: yao" gaung re san sin" sho' na mo, ngad:- ce: gakai lai mau" re vin vo' au: celhang jeyang: khoqhi" sho' san sin" sho' na nae" i? ga: tau" ra".

⁶Airumung: khinjaung pho" wa gyang" lho" mug Davi re byid' ra". Pe"mung:ga"re yao: wa Mao"So re qhaug' byid' to" ra" mug jham za: qo" ra". Aire gyang" lho" zoboe" mae" yu: pye' mung: mug: alaung: yang tha" to" pye' ra".

⁷(Sholu nho: gug'nyhug' zam: okaung: au: jhaung pho" Edom mae" Doeg wa ai ba mae ai tau mae na: jo; ra". Pe"mung:ga"re yao: wa caung:pa" thung" we' sin" ra" mau" re kad' ca" yang: ngad: ra".)

⁸Davi wa Ahimeleg re nao ngore qo" byid' ra" lhae tad' mangad: lao" shae qo" i? Kho:kham pho" nho: amyin" wa nga" shae we' gatau shae lhae jham re lo" yu: ci nae" ayo, maqo" losho' hin hin to" lo" nhao ra"- ga: ta" ra".

⁹Ahimeleg wa nao: yang Ela lao: khaung: mae se' pye' ra" Philisti byu Goliad nho: shae ngo qo". Aire khinjaung bau: lo,kao: nhaung thao" mae pin: cug' yang thab' to" rure nao o: re wa yu: ci wa,- cemae shae lhae ai za: ajo; ga: tau" ra". Davi wa- airu ngore byid: la,- gatau ai tho' je: gai: ra" shae khai mae re: majo,- ga: ta" ra".

¹⁰Aimung: Davi wa thug' lo" mung: Sholu mae" phao: lo" ra". Yao: wa Gat kho:kham Akhisha jhao" ye" ra".

¹¹Kho:kham pho" nho: zug: qe wa Akhisha re ceyaug ce: mung"dan: mae" kho:kham Davi mangad: i? Ceyaug wa myiqe: qe yao" khyo re go" nhan" zo"- Sholu wa dataung yaug re se' ava"- ngadqere: Davi wa datug yaug re se' ava"- ga: ta" ko" ra" yaug ngad: ra"- ga: ta" ako".

¹²Aibam: dao: re Davi ba: gyo: mung: yao: wa kho:kham Akhisha re gyai gyaug: li" ra".

¹³Aimung: yao: bam li" lhang" gam" na khao: ngo" Davi wa go geim kad' ra". Yao: bam yao: re taung: nae" seim" gelao" ago we' dakhyo: kad' ra". Yao: wa vogaung: kham re thug' khyang: yao" nhad' maui: mae qui" wa pyo, ga: kad' ra".

¹⁴Ailao" Akhisha wa yao" zug: qere- qu" ge,- ceyaug ago ngad: ra". Ceyaug re ngojhao" pe"mung: naonhaung" jhui" lo ko" i?

¹⁵Ngo ago laug sho' maqo" shingad: ra" i? Ce: nga" yham mae yao" ago lo,mau" yang: ngore nhag' qu" yo: nhao nae" pe"mung: ago dayaug dam: jhui" lo ko" i? ga: ta" ra".