Read Maru 1SAMUELA 22 Bible Online

1SAMUELA 22 - Maru bible

1SAMUELA 22

¹Davi wa Gat vogaung: mae" phao: lo" mung: Adulam nhae: mae" laug aug' khyo ye" lo" ra". Yao: mao: bam we' dang: ra" yham byu qe yao: amae na thoe the' gyo: gelao"- yao: we' li" paung" ako".

²Zag zo: qhug' mo,- jhin de, mo,- nhag' mashid mo, yao: jhao" ye" ako". Byu alhab' byid yo ko ngad mung: Davi wa yao: bam: au: jhaung boe" lo: ra".

³Davi wa ai: jo, qo mae" Moba mung" mae" Mizpa khyo xo' ye" lo" mung: Moba kho:kham re- nga" pho" we' nga" myhi" re cekhyo li" nhao mung: nga" qhid' mae" Mao"So pe" kad' nae" rure ngo ba sho'- jeju khyo" nao we' daga" na nhao la,- ga: ta" ra".

⁴Ailao"- Davi wa yao: myhi" we' yao: pho" tao re Moba kho:kham we' nha: to: co' mung: yao: bam wa ai: laug aug' mae Davi vho' na: myao" aimae thang: na: ako".

⁵Ai: thao lapa pho" Gad wa Davi jhao" joe" li" mung:- cemae dana wa- Yuda mung" khyo ana" jao" lo" wa,- ga: ta" ra". Airumung: Davi wa aimae" to" mung: Hereth sag' mo" yo khyo ye" lo" ra".

⁶Daba mae Sholu wa Gibea mae" bug gaung dalam: mae yaug ra" zai gae dagae: qao: mae lhae tad' ci yang: zaung: jo; ra". Yao" zug: qe alhab' wa yao: re lhang" gam: mung: ye; jo; ako". Davi we' yao" byu qere myao va" khyo yao: re ta" kyo" ako".

⁷Ailao" yao: wa yao" zug: qere Benyamin byu qe we"- tae" gyo: ge,- Davi wa naonhaung" alhab' mo, re yothaung: jham- sabyi khyae jham- byid: mung: yao" gyetab mae naonhaung" re zug: kad' nhao: li" nae" ein: jho ko" i?

⁸Aimung: naonhaung" ngore geim lau to" ko" i? Ngo yao" yauggai zo: yao: Davi we' myid vang" ba nam jho" kad' to" ra" khyo re naonhaung" mae" khag' yang re: ngore mata" kyo: geli"- ngore khag' magaung yug ko" i? Ce: ayo, mae nga" byu qe mae" dayaug ngad: ra" Davi wa ngore se' pye' nae" agu gai qho: na mung:- nga" zo: wa yao: re qam: byid' na: ra" khyo ngore khag' re: mata" kyo: geli"- ga: ta" ra".

⁹Doeg wa ai tau mae Sholu nho: zug: qe we' daga" ye; jo; ra". Yao: wa- Noba mae" Ahitub nho: yauggai zo: Ahimeleg jhao" yao: ye" au: Davi re ngo myao:-

¹⁰Ahimeleg wa Davi pe" kad' ang: nae" rure ASANG re myid' ra". Ai: thao yao: wa Davi re zo:ve byid: zho: mung: Philisti byu Goliad nho: shae re byid' ke' ra"- ga: ta" ra".

¹¹Aimung: kho:kham Sholu wa khinjaung Ahimeleg we' Noba mae khinjaung kad' na mo, ngad ko" ra" yao" amyu" ba nam qe alhab' mo, re khai nhao: ke' ra". Yao: bam yao: joe" li" ako".

¹²Sholu wa Ahimeleg re Ahimeleg we"- tae" gyo: wa,- ga: ta" ra". Yao: wa ASANG we" ni" qhid' kheim: mae ngad:- ga: tau" ra".

¹³Sholu wa yao: re- nao we' Davi ngore pe"mung: geim lau to" ko" i? Nao wa yao: re zo:ve we' shae pe"mung: byid' mung: yao" qhid' mae" Mao"So re pe"mung: byin phyo: zin: byid' i? Ana" yao: wa ngore gye tug' kad' mung: ngore se' nae" agu gai re lao" na: ra"- ga: ta" ra".

¹⁴Ahimeleg wa Davi wa gyai jhaug' zaug: thao" ra" ni" zug: ngad: ra". Yao: wa ni" zomo,- ni" kao so' re gug: gam byid' ra" mo; zug: mo" ngad: ra". Kho:kham kho" mae" mo, yaug khao: ngo" yang qi: sho' phug' ko" ra" yaug ngad: ra".

¹⁵Ngad va"- ngo wa yao" qhid' mae" Mao"So re byin phyo: zin: byid: va". Aiwa sao qhid' lhang mangad:- asang kho:kham pho" nao wa nao re geim lau to" ru qhid' mae" ngore we' nga" yham khaung mae" gatau khag' rere: qobo magai: zhaug'- ce: khyo we' sin: yang: ngo pe" maba- ga: tau" ra".

¹⁶Kho:kham pho" wa- Ahimeleg we"- nao we' ni" amyu" ba nam alhab' mo, shid ca" genae"- ga: ta" ra".

¹⁷Ai: thao yao" nhae mae ye; jo; ra" gug: gam pho" re- ASANG: khinjaung qere se' pye' wa,- yao: bam wa Davi we' daga" geim lau kad' mung: aikhyo re yao: bam alhab' ba gesho' ngadqere: yao: phao: lo" ra" khyo ngore mata" kyo: geli"- ga: ta" ra". Ngadqere: gug: gam pho" wa ASANG: khinjaung qere se' nae" yao: bam lo, matau ngad: ako".

¹⁸Aimung: Sholu wa Doeg re- ai bam re se' pye' wa,- ga: ta" ra". Doeg wa ai bam alhab' re se' pye' ra". Ai: ba mae yao: wa khinjaung bam: bau: lo, kao: ci nae" boe" doe, va" khinjaung she' xe: ngo" yaug re se' pye' ra".

¹⁹Sholu wa khinjaung qenho: vogaung: Noba mae na ko" ra" mo, gaje qe alhab' rere: se' pye' nae" amyin" byid' ra". yauggai- myiqe:- zoshao qe we' nug' nau" jham- nung:- loze- yao jham alhab' se' pye' qhug' ako".

²⁰Ngadqere: Ahimeleg nho: yauggai zo: qemae" dayaug ngad: ra" Abiatha wa phao: loe; lo" mung: yao: wa Davi we' ye paung" ra".

²¹Yao: wa Davi re ASANG: khinjaung qere Sholu khoru: se' pye' ra" khyo ta" kyo" ra".

²²Davi wa yao: re- ngo wa ai ba mae Doeg re aitau mae myao lao"- yao: Sholu re ta" kyo: nae" dang za: ngad: rure ngo ba: ra". Aimung: ngo wa ni" amyu" ba nam re shid: ru qhid' mae" qobo yang ngad va".

²³Ngo we' daga" na lang:- dagyaug wa,- Sholu wa nao we' nga" shid' zo" geim" re se' pye' nug: ra". Ngadqere: nao ngo we' daga" gug: gam qo" na nae"- ga: ta" ra".