Read Maru 1SAMUELA 23 Bible Online

1SAMUELA 23 - Maru bible

1SAMUELA 23

¹Davi wa Keila vogaung: re Philisti byu qe mang: zin: mung: gaug sag' yad: to" rure lhad' zo" na ko" ra" thoe the' gyo" ra".

²Aimung: yao: wa ASANG re- ngo ye: yang: Philisti byu qere mang: yezin: nae" i? ga: myid' ra". ASANG wa- gai: aibam re yezin: mung: Keila re ye khyad' yu wa,- ga: tau" ra".

³Ngadqere: Davi nho: byu qe wa- Yuda mung" cemae ngonhaung" gyaug: na: gu: ga" va"- ngonhaung" Keila khyo ye: mung: Philisti gyetab re mang: yezin" re wa je: xo: li" nae"- ga: yao: re ta" ako".

⁴Aimung: Davi wa ASANG we' byin phyo: dam: zin" ra". ASANG wa yao: re- Keila re mang: yezin: wa,- pe"mung:ga"re ngo wa Philisti byu qere nao re aung: pye' nhao nae"- ga: ta" ra".

⁵Ailao" Davi we' yao" byu qe wa Keila khyo ye: mung: Philisti byu qere mang: yezin" ako". Yao: bam wa ai bam myo: sho' re se' pye' mung: ai bam: gug'nyhug' jham re sham" yu: pye' ako". Ceru wa vogaung: re Davi khoru: khyad' yu: ra" khyo ngad: ra".

⁶Ahimeleg nho: yauggai zo: Abiatha phao: loe; lo" mung:- Keila mae Davi we' ye jho" qham lao" yao: we' daga" khinjaung bau: lo, kao: re yu: ciye" ra".

⁷Davi Keila khyo ye" lo" ra" khyo Sholu re ta" kyo" ako". Aimung: yao: wa- Mao"So yao: re nga" qam: so' khug mae ke' byid ava". Davi wa vang we' gyezo: zaung" ra" kham: de; ra" vogaung: khyo vao ye: yang: yao: re yao: myi" yu: ava"- ga: ta" ra".

⁸Aimung: Sholu wa Keila khyo to" ye" lo" mung: Davi we' yao" byu qere ye vang: nae" qhid' mae" yao" gyetab re gye poe qhid' mae" khai: yu ra".

⁹Sholu yao: re mang: zin: nae" yaung: to" ra" khyo Davi the' gyo: lao"- yao: wa khinjaung Abiatha re- ai: khinjaung bau: lo, kao: re- cekhyo cilo ri:- ga: ta" ra".

¹⁰Ailao" Davi wa Israel nho: Mao"So ASANG we"- Sholu wa Keila khyo li" mung:- ni" daui daui yaug nga" mathao mae ai: vogaung: re li" phyo' pye' nae" yaung: to" ra" khyo the' gyo: va".

¹¹Keila vobyu qe wa ngore Sholu lo, mae ab byid: genae" laug i? Ngo the' gyo: va" ru we' dakhyo: Sholu gaigai: joe" li" nae" laug i? Israel nho: Mao"So ASANG we"- ngore dao: phyid byid: nae" mho' ra" wo"- ga: ta" ra". ASANG wa- Sholu joe" li" nae"- ga: tau" ra".

¹²Davi wa- Keila vobyu qe wa ngo we' nga" byu qere Sholu lo, khyo ab byid: nae" laug i? ga: dam: myid' ra". ASANG wa yao: bam ab byid' li" genae"- ga: tau" ra".

¹³Aimung: Davi we' yao" byu qe khyaug' yo zo: alhab' wa aijao" Keila mae" to" mung: ye" lo" ako". Davi Keila mae" phao: loe; lo" va" ga" khyo re Sholu the' gyo: lao"- yao: yaung: to" ru to" pye' ra".

¹⁴Davi wa Zilpa nhae din"pyad' yo mae" bam mug: khaung: mae yevho' na: ra". Sholu wa khonhae" re: yao: re qho nae" seim" ra". Ngadqere: Mao"So wa yao" lo, khyo Davi re ma-ab byid: ngad: ra".

¹⁵Sholu yao: re se' nae" thug' lo" rure Davi myao: ra". Davi wa Zilpa nhae din"pyad' yo mae" Hore mae na: ra".

¹⁶Yonathan wa aikhyo Davi jhao" ye: mung: Mao"So: gug: gam byid' ra" ba kham: dao: we' yao: re qam: byid' ra".

¹⁷Yao: wa Davi re- dagyaug wa,- nga" pho" Sholu wa nao re dae maqo" te' nae". Nao wa Israel kho:kham boe" li" nae" yaug ngad: rure we' ngo wa ni" o mae" aya: mae- na yaug ngad: rure yao: dang za: ba: ra"- ga: ta" ra".

¹⁸Yao: shid' yaug wa dayaug we' dayaug gyang" lho" ra" zam" khug: ra" dao:so: jho" to" ako". Davi wa Hore mae na: jo, mung: Yonathan wa yham phao: lo" ra".

¹⁹Zilpa mae" amyu" byu qe daqhae: wa Gibea mae na: ra" Sholu jhao" ye: gemung:- Davi wa Yuda din"pyad' yo mug: thao shad' mae" Hakhila bam dao mae" ngonhaung" mug: myid Hore mae vho' na: ra"- ga: ta" kyo" ako".

²⁰Asang Kho:kham pho" we"- nao yao: re khoqhi" taung" yu nug: rure- ngonhaung" ba:- aimung: ngonhaung" mug: myid khyo li" wa,- ngonhaung" bao" taung: byid: nae"- ga: ta" ako".

²¹Sholu wa naonhaung" ngore gai kad' ko" ru qhid' mae" ASANG wa naonhaung" re shaman" byid: vashao: wo"-

²²Lo" mung: nyang" za: ba sho' dalhang lo" dam: kad' ge,. Yao: khai: mae na: ru we' ai tau yao: re khag' myao: ra" khyo jhaug' za: lo" qho: to: ge,- yao: wa gyai ba: pyag' yaug ngad: rure ngo the' gyo" ra".

²³Yao: vho' na: ra" jo, qo jham re khyag' za: lo" qho mung: din: za: ngore lau thoe li" ta" genae" rure beim: ge,- ailao" ngo wa naonhaung" we' daga" cao" ye: mung: yao: ai: khaung: mae na: jo, shi" ngad: re wa Yuda mung" geim" re ngo qho: yu ca" sho' ngadqere: ngo yao: re kung" yu nae"- ga: ta" ra".

²⁴Aimung: yao: bam wa tug' lo" mung: Sholu nho: gau: qhid' khae" yang: Zilpa khyo tug' phao: lo" ako". Davi we' yao" byu qe wa Yuda din"pyad' yo mug: thao shad' mae" cae: jhug tag ngad: ra" Maon din"pyad' yo lao: khaung: mae na: ako".

²⁵Sholu we' yao" byu qe wa Davi re qho nae" to" lo" ako". Ngadqere: yao: wa ai thoe re the' gyo: mung: Maon din"pyad' yo mae" laug byo, bam khyo ye: mung: aimae yena: ra". Cekhyo re Sholu the' gyo: lao"- yao: wa Davi thao cao" khe' ye" ra".

²⁶Sholu we' yao" byu qe wa bug gaung dashad' mae- Davi we' yao" byu qe we' jho" kho' mung: gatau dashad' mae na: ako". Yao: bam wa- yao: bam jhao" te' li" na mung: yao: bam re alaug laug li" taung: ko" ra" Sholu we' yao" byu qe mae" hin hin phao: lo" ako".

²⁷Ai: au: re yao" lagyo: dayaug joe" li" mung: Sholu re- phyad Dam: tug' lo wa,- Philisti byu qe mung"dan: khyo jhin" vao li" na: ako"- ga: ta" ra".

²⁸Aimung: Sholu wa Davi re cao" khe' rure thang: pye' mung: Philisti byu qere mang: yezin: nae" ye" lo" ra". Ce: mathao mae ai: jo, qo re Jho" Kho' Ra" Bug gaung ga: mang" ako".

²⁹Davi wa to" lo" mung: Engedi khaung: khyo ye" lo" ra". Yao: wa aimae yevho' na: ra".