Read Maru 1SAMUELA 25 Bible Online

1SAMUELA 25 - Maru bible

1SAMUELA 25

¹Samuela shid mung: Israel byu qe alhab' mo; zang" ham: li" geyang: yao: re kaug' ngug: ako". Ai: thao yao: bam wa yao" yham mug: Rama mae yao: re nyhab' pye' ako". Ceru: boe" thao- Davi wa Paran din"pyad' yo khyo ye" lo" ra".

²Aimae Maon vogaung: mae" Khaleb kaung mae" Naba ga: mang: ra" byu dayaug na: ra". Yao: wa Khame vogaung: nhae mae" mug: myid re sang: ra". Yao: wa jo; nho" gyai qo" yaug ngad mung: yao sam taung we' cad' be, dataung re sang yaug ngad: ra". Yao" yham sang myhi" Abigai wa yaung" mung: au: naug: gai yaug ngad: ra". Ngadqere: Naba wa makhyang" ru we' nhag' lam: magai yaug ngad: ra". Naba wa Khame mae yao mug' qaug: na: ra".

⁴Din" pyad' yo mae na: ra" Davi wa ai: khyo re the' gyo" ra".

⁵Aimung: yao: wa zolau: daxe yaug re Naba re yeqho nae" Khame khyo ye: nae" amyin" byid: mung: Naba re yao" bang" se" dao: vhin: ke' ra".

⁶Yao: wa Naba re ta" nae" dao: yao: bam re pyang: ke' ra". Aiwa- nga" ba nam pho" we"- Davi wa nao we' ni" yham byu qe we' alhab' mo, re qao" na geshao: ga: nao re bang" se" au" dao: vhin: ke' ra".

⁷Nao yao mug' qaug: na: ra" khyo re yao: the' gyo" ra". Ni" yao zam: mo, wa ngonhaung" we' daga" na: lo: ru we' yao: bam re ngonhaung" pe" dae mate' ra" khyo yao: wa nao re ba nhao nug: ra". Khame mae na: ra" ayo, mae yao: bam sang: ru pe" daja: re: khug' ru maqhug' ngad: ako".

⁸Yao: bam re myid: wa,- yao: bam nao re ta" kyo" li" genae". Nao wa poe ba na mae joe" li" mung: ngonhaung" re nyang" za: taung" lham: khae: yu nae" Davi wa nao re mho' ke' ra". Jeju khyo" ni" daui daui mo, ngonhaung" rere:- jhid'de; ra" ba nam pho" Davi rere: nao qo" kad' gu: kad' byid: la, ein ru ngad:-

⁹Davi byu qe wa ce: mungdao: re Davi mang mae Naba re zhao: kyo" ako". Ai: thao yao: bam wa aitau mae lao" na: ako".

¹⁰Lo" thao" re Naba wa- Davi ga" o- yao: khag' ngad: i? Yao: re ngo magyo" qu"- ana" ba mung"dan: wa khug' phao ra" jeim qe byang" sho' na: ako".

¹¹Ngo wa nga" mug we' qid rere: maye: yu nae". Amung: yao mug' qaug: mo; qhid' mae" se' ra" gug'nyhug' jham mae" sho: rere: khai: mae" joe" li" mo, ngad: ru ngo maba: ra" byu ai bam re mabyid: nae"- ga: tau" ra".

¹²Davi nho: byu qe wa yao: jhao" dam: tug' lo mung:- Naba ta" ra" dao: yao: re lota" kyo" ako".

¹³Yao: wa naonhaung" shae jham yu: vin ge,- ga: amyin" byid: mung:- ai we' dakhyo: yao: bam alhab' kad' ako". Davi re: yao" shae re yu: vin mung: zokho we' byu shid' yo re nha: to: co' mung:- yao" byu byid yo ko to" lo" ako".

¹⁴Naba nho: daui daui mo, mae" dayaug wa Naba nho: yham sang myhi" Abigai re- nao the' gyo: va" i? Davi wa din"pyad' yo mae" ngonhaung" ASANG: qhid' mae" bang" se" au" dao" we' lagyo: jham re nhao: ke' ra". Ngadqere: yao: wa ai bam re maphug' makhyad' lham: kad' ke' ra".

¹⁵Ngadqere: yao: bam wa ngonhaung" re gyai gai: ako". Yao: bam wa khonhae" re: ngonhaung" re aqug: akhai: makad' qu" ngad: ako". Pa: din" mae yao: bam we' ngonhaung" daga" na: ra" ayo, mae ngonhaung" sang: ru daja: re: khug' ru maqhug' ngad: ra".

¹⁶Ngonhaung" yao kyaung" re lhaug' yang: yao: bam we' daga" na: ra" ayo, gu: mae yao: bam wa myi" re: na" re: ngonhaung" re gug: gam byid' lo: ako".

¹⁷Cekhyo re myid: qu" mung: pe" ru: kad' nae" rure myid: phyid' wa,- ceru wa ngonhaung" ASANG yao" yham khaung byu alhab' qhid' mae" kyi" khyag' ru gai boe" ra". Yao" wa makhyang: yaug ngad mung: khag' ta" rure re: matae" gyo: ngad: ra"- ga: ta" ra".

¹⁸Ailao" Abigai wa mug shid' yo khai" sabyi qang: thaung- kao: to" ra" yao ngo" dau:- gaug shin: uma ngo" lam:- sabyi shi: kyaug' dayo kyao- pho' ham" shi: kyaug'- mugcug dayo khai"- phyad phyad za: zhang: yu mung: aijham re loze jham: dao mae seim" ke' ra".

¹⁹Ai: thao yao: wa daui daui mo, re- naonhaung" qhid' khyo ye" lo" na ge,- ngo wa thao mae cao" li" nae"- ga: ta" ra". Ngadqere: yao: wa yao" yham sang pho" re pe" mata" ngad: ra".

²⁰Yao: wa yao" loze zaung mung: bug gaung khyo kaui mae yao: shad' khyo li" na ko" ra" Davi we' yao" byu qe we' nyag din taung" jho" qhug' ko" au:-

²¹Davi wa ngo wa ce: din"pyad' yo mae byu aiyaug: nho: jo,nho" re- pe"mung: gug: gam byid' lo va" laug i? Yao: sang: ru daja: re: khug' ru maqhug' ngad: ra" ngo yao: re bao" thaug' byid' ru qhid' mae" yao: wa ngore ceru aphug' tug' byid: nhaung i?

²²Mug: mabo" shire byu aiyaug: nho: byu yaug khao: ngo" re jhad' za: ngo mase' pye' re wa- Mao"So wa ngore se' vashao: wo"- ga: myid: lo: ra".

²³Abigai wa Davi re myao lao" phyad za: loze dao mae" gyo" mung: Davi khyid qao: mae yao" gaung re myid gaung khyo goe; gyo" ra".

²⁴Amung: yao: re- nhag' bo pho" we"- jeju khyo" tae" gyo: byid: la,- ngore qobo vhin nae" akhang" byid: la,-

²⁵Ai: byugao: pho" Naba nho: dao: re dajhid' re dagyo: wa,- yao" mang lajheim: re- ago ga" ru yao: ngad: ra". Nhag' bo pho" we"- ni" daui daui mo, ai: khyo joe" li" ko" au: ngo mana-

²⁶Airu wa nao lage, phaug' mung: ni" gyevo qere se' pye' nae" rure nao re ASANG: yang tam" pye' ava". Ni" gyevo qe we' nao re dae te' nug: ra" mo, wa Naba we' dakhyo: qobo dae byid' ru qhug' geshao: ein: daui: na: ra" ASANG mang re lao: yang: ana" ngo nao re jham tang" ra".

²⁷Nhag' bo pho" we"- jeju khyo" nao re ngo vin: li" byid' ra" ce: jhaung qhu" re khae: yu byid: la,- amung: ni" byu qere byid: wa,-

²⁸Nhag' bo pho" we"- ngo kad' shad' va" ru alhab' re qobo khyad' byid: la,- ASANG wa nao re kho:kham kad' nhao: li" nae"- ni" myid:zo: qere re: kad' nhao nae". Pe"mung:ga"re nao wa yao" gye poe re khe' na mung:- nao daui: na: gu: mae makhyang" ru daja: re: makad' nae".

²⁹Dayaug yaug nao re khe' zin: mung: se' pye' nae" seim" ko" re- phug' de; ra" ngaui qhang re lhaug' ra" byu we' dakhyo: ni" Mao"So ASANG wa nao re gug: gam byid' li" nae". Ngadqere: ni" gyevo qere kam" wa yao" lo, bagdin" yang bag: ke' ra" laug zo: we' dakhyo: yao: bam re shapye' ke' li" nae".

³⁰Yao: nao re dao:so: byid' to" ru gai: ra" ja: alhab' re ASANG bin: kad' pyang" mung: nao re Israel kho:kham bin: kad' nhao lao"-

³¹Nhag' bo pho" we"- ailao" nao wa byu mase'- naoyao" lo, yang lage, maphaug' rure nao nhag' lam: tha"- alo kho: ca" nae" mangad:- nhag' bo pho" we" ASANG nao re bin: shaman" byid: lao"- Jeju khyo" ngore dato" myhid' pye' la,- ga: ta" ra".

³²Davi wa yao: re- ana" ba ngore li" qhug' nae" nao re nhao: ke' ra" Israel nho: Mao"So ASANG re caung:khin" ra".

³³Ni" nho: aung khug suzo: du" ru- ngore byu se' yaug we' ngoyao: lage, phaug' ra" mau" makad' nae" tam" pye' ra" ana" ba nao kad' va" ra" mau" mathao mae Mao"So re jeju beim: so" ra".

³⁴ASANG wa nao re dae te' nae" rumae" ngore tam" pye' ra". Ngadqere: nao ngore hin hin mali" qhug' re wa Naba nho: byu qe alhab' wa ne, seim mae shid: li" genae" ra" khyo daui: na: ra" Israel byu qe: Mao"So mang re lao: yang: ngo jham tang" ra"- ga: tau" ra".

³⁵Ai: thao Davi wa Abigai yang yao: re vin: li" byid' rure khae: yu mung:- yao: re yham khyo tug' lo" wa,- dasang: kho: wa,- nao o: rure ngo kad' nae"- ga: ta" ra".

³⁶Abigai wa yham mae kho:kham zo: man" ra" zo: shaug' poe zo" na: ra" Naba jhao" tug' lo" ra". Yao: wa yhid yid: ru we' gyai pyo" na: ra". Aimung: thao: ba ne, seim joe" sho' Abigai wa yao: re pe" mata" kyo: ngad: ra".

³⁷Yao: yid: gyang" li" thao re Abigai wa ja: khao: ngo" yao: re ta" kyo" ra". Yao: wa mo; lo" mung: gaug jam: shid: lo" byaug: ra".

³⁸Daxe ba thao re ASANG wa Naba re se' mung: yao: shid: lo" ra".

³⁹Naba shid va" khyo re Davi the' gyo: lao"- yao: wa- ASANG: re caung:khin" ra"- yao: wa ngore maphug' makhyad' kad' ru qhid' mae" lage, phaug' byid: va" ru we' yao" daui daui yaug shad' ra" mau" kad' nae" rure tam" pye' byid' ava". ASANG wa yao" makhyang" ru qhid' mae" ASANG wa Naba re qobo dae byid' ava"- ga: ta" ra". Ai: thao Davi wa byu nhao: ke' yang: Abigai re lo,xo' yu nae" akhang" mho' ke' ra".

⁴⁰Yao" daui daui mo, wa Abigai jhao" Khame khyo ye: mung: yao: re- yao" yham sang myhi" kad' nae" nao re yao: jhao" jhui" lo" nae" ngonhaung" re nhao: ke' ra"- ga: ta" ako".

⁴¹Abigai wa myid gaung khyo goe; gyo" mung: ngo wa yao" daui daui yaug ngad: yao" daui daui mo; khyid re cid' byid: nae" jin" jin" ngad: ga" tau" ra".

⁴²Yao: wa phyad za: to" mung: loze dao mae do; zaung: ra". Yao" nho: daui daui myiqe: nau" ngo" yaug bocao mung: yao: wa Davi nho: daui daui mo, we' daga" cao" ye: mung: Davi nho: yham sang myhi" boe" lo: ra".

⁴³Davi wa Yezre mae" Ahinoam re lo, xo' yu: to: gau ngad: mung: ana" Abigai re: yao" yham sang myhi" boe" lo: ra".

⁴⁴Ai: au: re- Sholu wa Davi nho: yham sang myhi" boe" lo: ra" yao" myiqe: zo: Mikha re Galim vogaung: mae" Laisha nho: yauggai zo: Palti re byid: zho" pye' ra".