Read Maru 1SAMUELA 26 Bible Online

1SAMUELA 26 - Maru bible

1SAMUELA 26

¹Zilpa mae" byu daqhae: wa Gibea mae Sholu jhao" joe" li" mung: Yuda din"pyad' yo agyeim: mae" Hakhila bam dao mae Davi vho' na: ra" khyo yao: re ta" kyo" ako".

²Sholu wa Israel mung" mae" gai: thao" ra" gyezo: sam taung we' daga" Davi re yeqho nae" Zilpa din"pyad' yo khyo ye" ra".

³Amung: Hakhila bam dao mae" khyoyae mae jamu yekad' na: ra". Davi wa din"pyad' yo mae na: jo; ashi"- Sholu yao: re qho nae" joe" li" va" khyo re Davi ba lao"-

⁴Yao: wa jin" byu qere nhao: ke' mung: aimae Sholu gaigai: yao: na: rure yemyao: ako".

⁵Yao: wa aijao" ye: mung: Sholu we' Nera nho: yauggai zo:- gyezug: pho" Abne yab ko" ra" jo, qo khyag' yequ" to" ra". Sholu wa jamu akhug mae yab mung: yao" byu qe wa yao" lhang" gam: mae jamu kad' na: ako".

⁶Ailao" Davi wa Hiti byu Ahimeleg we' Yoab nho: yao: nhaung: Abishai re- (Yao: tao: yao: myhi" wa Zeruia ngad: ra") ni" shid' yaug mae" khoyaug lam: Sholu nho: jamu khyo cao: li" genae" i? ga: myid' ra". Abishai wa ngo cao: li" nae"- ga: tau" ra".

⁷Aimung: ai myi mae Davi we' Abishai wa Sholu jamu khyo vao ye: mung: Sholu wa yao" au: tho' nhae mae" myid gaung mae yao" lhae tad' re geim: zhaug' to: mung: jamu agaung: mae yab; jo; rure yemyao: ra". Abne we' gyezo: qe wa yao" lhang" gam: mae yab: jo; ako".

⁸Abishai wa Davi re- Mao"So wa ana" myi- ni" qam: so' mae ni" gyevo re ke' to: byid' ava". Yao" lhae tad' yang yao: dadae za: thug' kyao" pye' mung: myid gaung mae geim: ze; te' to: nae". Ngo wa shid' dae mathug' nae"- ga: ta" ra".

⁹Ngadqere: Davi wa nao yao: re dae magai: te' nae". ASANG wa yao" yang khyin: to" ra" kho:kham re dae te' ra" yaug re gaigai: yao: qobo dae byid' li" nae".

¹⁰Davi wa xo' mung:- yao" ayo, joe" lao" shid: re shid- gyekhe' poe mae shid: re shid- ASANG yao: yao: Sholu re se' li" nae" rure ASANG khyo" yang ngo ba: ra".

¹¹ASANG: yang kho:kham kad' nhao: to" ra" yaug re ngo dae te' seim" rure ASANG wa tam" pye' vashao:- yao" lhae tad' we' yao" qid kang: re yu: ci yang: lo" lang: se,- ga: ta" ra".

¹²Aimung: Davi wa Sholu nho: au: tho' mae" lhae tad' we' qid kang: re yu: ci mung: yao: we' Abishai" phao: lo" ako". Aire khag' re: mamyao- pe" boe" rure maba- beim: lhao" mabeim: ko" ngad: ra". Yao: bam alhab' wa nhomeim wa khao ga: yab: jo; ako". Pe"mung:ga"re ASANG wa yao: bam alhab' mo; dao mae yab nug moe nhao: ke' byid' ra".

¹³Ai: thao Davi wa lao: khaung: gate' bug gaung khyo de; ye" lo" mung:- gug: gam: ra" vha" ngad lao"-

¹⁴Sholu gyezo: qere we' Abne re- Abne we" nga" thoe re qo" gyo" i? ga: zag: hug' ra". Abne wa- khag' zag: hug' na mung: kho:kham pho" re yab nhug' nhug' na: ra" i? ga: myid' ra".

¹⁵Davi wa- Abne we"- nao wa Israel mung" mae akhyag: thao" yaug mangad: i? Ni" asang kho:kham re pe"mung: magug: gam byid: i? Ana" za: ni" asang re se' pye' nae" ga: jamu khyo byu dayaug vao: ye" ava".

¹⁶Abne we"- nao wa ni" qo re lhai" pye' ava". Naonhaung" alhab' mo, shid man: ko" ra" khyo re daui: na: ra" ASANG: mang re lao: yang: ngo jham tang" ra". Pe"mung:ga"re nao wa ASANG: yang kho:kham kad' nhao: to" ra" yaug ni" asang re nao magug: gam byid: ngad: ra". Qu" wa,- kho:kham pho" nho: lhae tad' khai: mae i? Yao" au: tho' mae" qid kang: khai mae ngad: ra" i? ga: hug' ra".

¹⁷Sholu wa Davi thoe re gyo" xam: mung:- nga" zo: Davi we"- nao ngad: i? ga: myid' ke' ra". Davi wa ngad:- asang kho:kham pho" we"- ga: tau" ra".

¹⁸Amung: yao: wa- ni" daui daui yaug ngore pe"mung: cao" khe' na shi" i? Ngo pe" kad' va" i? Ngo pe" yug: shad' va" i?

¹⁹Kho:kham pho" we"- ngo ta" nae" rure tae" gyo: wa,- ngore gye kad' nhao yaug wa ASANG ngad: re wa- yao: re xeim: ngaui" byid' ru wa yao" myid re tha" nhao: li" nae". Ngadqere: aire byu: yang kad' ra" ngad re wa ASANG: nhang: kheim: wa yao: bam: dao mae zao" vashao:- pe"mung:ga"re yao: bam wa ngore ASANG: mug: myid mae" taung bug qe: so re za: ngo qo" caung:pa" ra" mung" khyo ngore khe' thug' ke' ako".

²⁰ASANG mae" va" ra" taung bug qe: mug:myid dao mae se' pye' ru ngore daqhug' nhao gela,- Israel kho:kham pho" wa kholha we' dau: ra" ngore se' nae" pe"mung: joe" li" ang: i? Yao: wa seyo: ngho' re we' dakhyo: ngore pe"mung: kung" i? ga: ta" ra".

²¹Sholu wa ngo kad' shad' va"- nga" zo: Davi we"- dam: tug' lo ri:- nao re ngo khonhae" re: dae mate' lo nae". Pe"mung:ga"re- nao wa nga" kao so' re ana" myi tang" to: byid' ava". Ngo wa ago doe; lo va"- ngo wa qu" gyaug qu" lhaung sho' ru kad' va" ga: tau" ra".

²²Davi wa kho:kham pho" we"- ni" lhae tad' cemae ngad: ra". Ni" byu qemae" dayaug cekhyo de; li" mung: li" yu: yu nhao wa,.

²³ASANG wa jhaug' zaug mung: din:man: mo, re aphug' jhaung qhu" byid' ra". Yao: wa ana" ba nga" qam: so' lo, mae ke' byid' ra". Ngadqere: ASANG: yang kho:kham kad' nhao: to" ra" yaug nao re ngo dae mate' lo:-

²⁴Ana" ba ni" kao so' re lhoe' to" ru we' dakhyo: airu: yao: ASANG wa ngore kad' mung: qug: khai: alhab' mae" ngore loe; beim nhao vashao:- ga: tau" ra".

²⁵Sholu wa Davi re- nga" zo: we"- nao re Mao"So shaman" byid: vashao:- nao kad' ra" mau" ja: khao: ngo" mae nao aung myaug: li" nae"- ga: ta" ra". Airumung: Davi wa yao" gyaung: khyo khyo lo" byaug mung:- Sholu wa yham phao: lo" ra".