Read Maru 1SAMUELA 29 Bible Online

1SAMUELA 29 - Maru bible

1SAMUELA 29

¹Israel byu qe Yezre lao: khaung: mae" qid thug' mae jamu kad' na ko" au:- Philisti byu qe wa yao: bam: gyetab alhab' Apheg jo, qo mae zang" ham: na: ako".

²Philisti kho:kham ngo" zo: wa yao: bam: gyezo: dayo tab,- dataung tab kad' mung: to" li" ako". Davi we' yao" byu qe wa kho:kham Akhisha we' daga" nhaung thao" mae cao: ye" ako".

³Philisti zug: qe ai bam re myao gelao" ai: Hebre byu qe cemae pe" kad' na: ako" i? ga: myid' ako". Akhisha wa- Ceyaug Israel kho:kham Sholu nho: zug: Davi ngad:- ana" yao: wa ngo we' daga" na: lo: ru gyai myao" va" yao: ngojhao" joe" li" ra" ba na mae" ana" joe" sho' yao: pe" kad' shad' va" rure ngo mamyao- ga: ta" ra".

⁴Ngadqere: Philisti zug: qe Akhisha re nhag yo: mung: yao: re- byu aiyaug re nao byid' to" ra" vogaung: khyo dam: tug' nhao: ke' wa,- yao: re ngonhaung" we' daga gye poe khyo daye: nhao wa,- jho" zin" na: au: yao: wa ngonhaung" re gye tug' zin" re tug' zin: nae".

⁵Ngonhaung" byu qe shid: ru khyo" yang yao" asang: yang yao: re myo,nho byid' ru qo" yu nae" ru wa yao" qhid' mae" khoqhi" gai: ra" khyo ngad: ra" i? Aitho' mago" yao: bam go" nhan" zo" re" Sholu wa dataung yaug se' ava"- ngadqere: Davi wa datug re se' ava"- ga: yao" khyo re myiqe: qe nghaui" caung: ko" ra" yaug wa ce: Davi ngad: ava"- ga: ta" ako".

⁶Akhisha wa Davi re nao wa ngore jhaug' zaug yaug ngad: ra" khyo re daui: na: ra" Israel nho: Mao"So re lao: yang: ngo jham tang" ra". Ngo wa nao re ngo we' daga" ye: mung: gyekhe' poe mae yebokhe' nae" rure ngo ngaui: ra". Nao ngojhao" joe" li" ra" ba na mae" ana" joe" sho' nao mae qobo ngo mathe' myao- Ngadqere: kho:kham gatau qe wa nao re ma o ko" ngad: ra".

⁷Aimung: ngaui pyo: yaug yo za: yham khyo phao: lo" wa,- yao: bam mangaui: ru pe" daja: re: dakad' wa,- ga: ta" ra".

⁸Davi wa ngo pe" kad' shad' va" i? Nao ta" ru we' dakhyo:- nao re ngo caung da" qhid: lo: ra" ba mae" ana" ba joe" sho' ngo mae nao qobo mamyao ngad: re wa ni" gyevo jham re khe' zin: nae"- nga" kho:kham asang nao we' daga" pe"mung: maye: nae" i? ga: ta" ra".

⁹Akhisha wa ngo myid vang" ra"- ngo wa nao re Mao"So: mug: lagyo: qhi" jhaug' zaug yaug khyo" jho: ra". Ngadqere: kho:kham gaje qe wa ngonhaung" we' gye poe khyo maqo" ye: ga: ta" ako".

¹⁰Aimung: Davi we"- ne, kao Sholu re to: co' mung: ngojhao" li" ko" ra" mo, alhab' wa no' mae" yab so: to" mung: mug: bo" we' to" lo" ca" nae" ngad: ra"- ga: ta" ra".

¹¹Aimung: Davi we' yao" byu qe wa thao: ba ne, seim no' Philisti khyo tug' phao: lo" nae" to" lo" ako". Philisti byu qe wa Yezre khyo ye" lo" ako".