Read Maru 1SAMUELA 3 Bible Online

1SAMUELA 3 - Maru bible

1SAMUELA 3

¹Ai: gyo: mae Samuela wa Eli nho: khyo shid' ra" qao: mae na mung: ASANG re caung da" byid' na: au: ASANG mae" mungdao: wa dajhid' dathao za: joe" li" mung: yao: mae" qhu" lho jham wa gyai myaung: ra" ayo, ngad: ra".

²Damyi mae- ana"- myo, alhab' alaug jid va" ra" Eli wa yao: yao" qe, mae yab: jo; ra".

³Samuela wa gyang" lho" ra" Dao: Thang" Ban" jo, ra" gyang" lho" jo, qo mae yab: jo; ra". Mug: bo" qid myikaug' myi: de; jo; shi" au:- ASANG wa Samuela re khai: ra". Samuela wa- cemae na:- ga: tau" ra".

⁵Ailao" yao: wa Eli jhao" tao" ye: mung: nao ngore khai yang: cemae ngo joe" li" va"- ga: ta" ra". Ngadqere: Eli wa nao re ngo makhai yab qo khyo dam: lo" wa,- ga: tau" ra". Aimung: Samuela wa yab qo khyo dam: lo" ra".

⁶ASANG wa Samuela re dam: khai: ra" zoshao: wa khai yaug ASANG ngad: rure maba ngad: ra". Pe"mung:ga"re ASANG wa yao: re qhid' phyao: khonhae" re" dao: majhau: qu" ngad: ra". Aimung: yao: wa to" yang: Eli jhao" ye: mung:- nao ngore khai yang: cemae ngo joe" li" va"- ga: ta" ra". Ngadqere: Eli nga" zo: we"- nao re ngo makhai yab qo khyo dam lo" wa,- ga: tau" ra".

⁸ASANG wa Samuela re sam lhang ein: lhang dam: khai ra". Ailao" yao: to" mung: Eli jhao" ye: yang:- nao khai mung:- cemae ngo joe" li" va"- ga: ta" ra". Ailao" ai: zoshao re khai: na yaug wa ASANG ngad: rure Eli beim" li" ra".

⁹Aimung: yao: wa Samuela re- yab qo khyo dam: lo" wa,- yao: nao re dam: khai yang: ngad: re- ASANG we" dao: jhau la,- ni" daui daui yaug ngo tae" gyo" na: ein: ta" wa,- ga: ta" ke' ra". Aimung: Samuela wa yab qo khyo dam: phao: lo" ra".

¹⁰ASANG wa joe" li" mung: aimae li" ye; jo, yang:- qhid' re yao: khai qu" ru we' dakhyo:- Samuela we" Samuela we"- ga: khai: ra". Samuela wa- jhau la,- ni" daui daui yaug tae" gyo" na:- ga: phaug' tau" ra".

¹¹ASANG wa yao: re- daba re- aikhyo re the' gyo" ra" mo,- mo; lo" sho' ngad genae" ra" qu" gyaug qu" lhaung sho' mung: ra" mau" daja: Israel byu qe: dao mae ngo kad' nae".

¹²Ai: ba na mae- Eli nho: yham khaung re kyaug' nhin" ra" mau" alhab' aqhid mae" thao" sho' kad' thug' ke' nae".

¹³Yao" yauggai zo: tao wa- ngore makhyang: mashab ra" dao: jhau: to: vako" ruyang yao" yham khaung re apyad ato qobo dae byid: nae" ein: ngo yao: re ta" to: gau ngad va". Yao: shid' tao airu: kad' na: rure Eli ba ngadqere: yao: tao re matam" pye' ngad: ra".

¹⁴Aimung: qu" gyaug qu" lhaung sho' ra" qobo: nho: boe" thug' li" ra" athao re pe" xeim: ngaui" yang re:- pe" xeim" yang re: maqo" yu: pye' ein: rure Eli nho: yham khaung re ngo jhaug' za: ta" hau: va"- ga: ta" ra".

¹⁵Samuela wa mug: bo" sho' yab qo mae na: jo; ra". Ai: thao yao: wa to" mung: ASANG: yham kham: jham re phung" ra". Yao: wa qhu" lho we' sin: yang: Eli re gyaug yang mata" kyo: ngad: ra".

¹⁶Eli wa yao: re- nga" zoshao Samuela we"- ga: khai: mung:- Samuela re: asang we"- cemae na: ga: tau" ra".

¹⁷ASANG nao re pe" ta" ra" i? Ngo re dazug' to: la,- yao: ta" gu: ja: khao: ngo" nao ngore mata" kyo: re wa Mao"So wa nao re dae xo sho' qobo dae byid' li" nae"- ga: myid' ra".

¹⁸Airumung: Samuela wa ja khao: ngo" yao: re ta" kyo" ra". Yao: wa daja: re: mazug' to: ngad: ra". Ailao" Eli wa yao: wa ASANG ngad: ra". Yao" qhid' mae" gai: thao" naehab ngad: ru pe" ja: rere: yao: kad' li" nae"- ga: ta" ra".

¹⁹Samuela wa qi" qhang: li" mung: ASANG wa yao: we' daga" ngad yang: Samuela ta" ru ja: khao: ngo" wa jab byang" lo: ra".

²⁰Airumung: Israel byu qe alhab' mung"dan: dashad' mae" dashad' jao: sho' Samuela wa gaigai: yao: ASANG: lapa ngad: rure ba: ako".

²¹ASANG wa Samuela re na qhu" mung: yao: re dao: jhau: qu" ra" Shilo mae yao: yao" gaung re xo' yang: qhu" byid' ra". Samuela dao: jhau lao"- Israel byu qe alhab' mo, tae" gyo" ako".