Read Maru 1SAMUELA 30 Bible Online

1SAMUELA 30 - Maru bible

1SAMUELA 30

¹Shid' ba kyo thao re Davi we' yao" byu qe wa Ziglag khyo joe" lo: ako". Amaleg byu qe wa Yuda mung"- mug: thao shad' gye li" zin: gemung: Ziglag re gye li" khe' ako". Yao: bam wa vogaung: re ngha" pye' mung:

²Myiqe alhab' re taung" yu: ako". Yao: bam wa dayaug rere: mase' pye' ngad: ako". Ngadqere: yao: bam phao: lo" gelao" yaug khao: ngo" re yao: bam we' daga" jhui" lo" byaug: ako".

³Davi we' yao" byu qe joe" lo" gelao"- vogaung: re ngha" pye' mung: yao: bam: yham sang myhi" jham- yao: bam: yauggai myiqe: zo: qe alhab' jhui" lo" byaug ko" rure lo" myao: ako".

⁴Davi we' yao" byu qe wa ngug li" gemung: yao: bam gyai myaung: sho' mathang ko" ngad: ra".

⁵Davi nho: yham sang myhi" tao ngad ko" ra" Ahinoam we' Abigai tao re lhao" re: jhui" lo" byaug: ako".

⁶Ana" Davi wa gyai qug: khai: qhug' na: ra". Pe"mung:ga"re yao" byu qe alhab' wa yao: bam: zoshao qe seim" byaug yang: yao: re laug baui: yang pye' se' pye' nae" kyaug' nhin" na: ako". Ngadqere: yao" Mao"So ASANG wa yao: re qam: byid' ra".

⁷Davi wa Ahimeleg nho: yauggai zo: khinjaung pho" Abiatha re- ai: khinjaung bau: lo, kao: re ngojhao" cili ri:- ga: ta" ra". Abiatha re: aire yao jhao" ciye: byid' ra".

⁸Davi wa ASANG re ai: gye li" zin: mo; thao ngo cao" khe' zai i? Ngo yao: bam re myhi nae" i? ga: myid' ra". ASANG wa yao: bam: thao cao" khe' wa,- nao yao: bam re myhi: li" nae". Amung: taung" lo" ra" mo, re qo" khyad' yu: li" nae"- ga: tau" ra".

⁹Aimung: Davi we' yao" byu khyaug' yo zo: wa aimae" to" lo" ako". Yao: bam Beso qid zo: gyaung: khyo joe" ye: gelao"- daqhae: wa aimae thang: na: ako".

¹⁰Davi wa byu byid yo we' yao" gyaung: khyo khyo xo' ye" lo" ra". Gatau shid' yo zo: wa qid gyaung: zo: re gau: nae" saung" myaung: gemung: nhaung thao" mae thang: na: ako".

¹¹Davi we' daga" ngad mo, wa seyo mae Egutu zolau: dayaug we' jho" qhug' gemung: Davi jhao" jhui" lo: ako". Yao: bam wa yao: re zo:ve qid-

¹²Pho' ham" shi: kyaug'- sabyi shi: kyaug' shid' poe yao: re byid: zho" ako". Yao: aire bin: zo: thao- yao" qam: dam: bo: li" ra". Yao: wa sam ba lam: lam: pe" re: mazo: mashaug' na: lo: ra".

¹³Davi wa yao: re- ni" asang khag' ngad: i? Nao khai: mae" ngad: i? ga: myid' ra". Yao: wa ngo wa Egutu byu Amaleg byu dayaug: nho: jeim pho" ngad:- ngo no yang: nga" asang wa ngore to: co' ru sam ba ngad va".

¹⁴Ngonhaung" wa Yuda mung" mug: thao shad' mae" Kheretid byu qe we' Khaleb kaung qenho: mug: myid mae gye yezin: mung: Ziglag vogaung: re ngha" pye' co' ra" ga: tau" ra".

¹⁵Davi wa ai: gye li" zin" ra" mo, jhao" nao ngore qo" jhui" ye: nae" i? ga: myid' ra". Yao: wa nao ngore mase' nae"- mangad: lao" nga" asang: lo, khyo ma ab byid: nae" ein: ra" khyo ASANG: mang mae ngore dao:so: byid' ngad: re wa ngo nao re jhui" ye: nae"- ga: tau" ra".

¹⁶Amung: yao: wa yao: bam jhao" Davi re jhui" ye" ra". Gye li" zin: mo, wa jo, qo khyi" khao: ngo" mae zo: yang: shaug' yang: poe kad' yang: abyo asin: na: jo; ako". Pe"mung:ga"re yao: bam wa Philisti mung" mae we' Yuda mung" mae" lanyab jham xo sho' qo" sham" yu: ako".

¹⁷Thao: ba mug: bo" myi: re Davi wa yao: bam re yekhe' zin: mung: myi" thao joe" sho' khe' zin" ra". gola:u zaung yang: phao: lo" ko" ra" zolau: byid yo mae" je yang: yao: bam mae" dayaug re: maloe, ko" ngad: ra".

¹⁸Davi wa yao" yham sang myhi" tao bobo mung: Amaleg byu qe taung" lo" ra" byu yaug khao: ngo" we' ja: khao: ngo" re khyad' yu: ra".

¹⁹Daja: re: mabyaug ngad: ra". Davi wa yao" byu qe alhab' nho: yauggai myiqe: zo: qe we' Amaleg byu qe taung" lo" ra" lanyab alhab' re dam: the' yu: ra".

²⁰Yao: wa yao kyaung"- nung: kyaung" jham rere: dam: the' yu mung: yao" byu qe wa yao: bam qhid' au: mae gug'nyhug' alhab' re keim: mung:- ceru wa Davi sang: ra"- ga: ta" ako".

²¹Ai: thao Davi wa yao: we' daga" cao" ye: nae" saung" qam: nhang: mung: Beso qid zo: mae na co' ko" ra" mo, jhao" dam: tug' lo: ako". Yao: bam wa qhid' khyo li" mung: Davi we' yao" byu qere li" tug: yu ako". Davi wa yao: bam jhao" do, ye: mung: yao: bam re ngaui bau: taung" ye au" ra".

²²Ngadqere: Davi we' cao" ye: va" mo, mae" byag cag' qe we' byugao: qe daqhae: wa- yao: bam wa ngonhaung" we' daga" macao: li" ko" ngad: ra". Aimung: ngonhaung" wa yao: bam re lonyab mabyid: nae"- yao: bam wa yao: bam yham sang myhi" jham we' zoshao qe jhui" yu mung: lo" geshao:- ga: ta" ako".

²³Ngadqere: Davi wa nga" mao:nhaung: qe we" ASANG ngonhaung" re byid' to" ra" ja: re naonhaung" ceru magai: kad' ngad: ra". Yao: wa ngonhaung" re gug: gam byid: mung: gye li" zin: mo, re aung: doe; ru ngonhaung" re byid' ra".

²⁴Naonhaung" ta" rure khag' re: magai: vang" ngad: ra". Alhab' mo, wa gae bam dakhyo: za: jho" gae ca" ra". Zokho nyhang" byid: ra" mo, we' daga" nhaung thao" mae na yaug khag' ngadqere: gye poe khyo ye" ra" yaug we' dakhyo: za: gae bam qo" ca" ra"- ga: ta" ra".

²⁵Davi wa ceru re tarha" khyo" kad' ra" ai: ayo, mae" Israel mung" mae aire cao" ako".

²⁶Davi khyo tug' joe" lo lao"- yao: wa lanyab damyo" re yao" ba nam qe we' Yuda mung" mae" au: jhaung qere ce: mungdao: we' daga" vhin: ke' byid' ra". Aimung dao: wa- ASANG: gyevo qemae" ngonhaung" sham" yu: ra" lanyab jham mae" naonhaung" qhid' mae" jhaung qhu" vhin: ke' ra"- ga" ru ngad: ra".

²⁷Yao: wa Bethela mae" mo, rere:- Yuda mung" mug: thao shad' Rama mae" mo, rere:- Yati vogaung: jham ngad: ra".

²⁸Aroe- Siphmod- Esthemoa-

²⁹we' Raka- mae" mo, rere: Yerahme kaung mae" mo, rere:- Kenid byu qere-

³⁰Horma- Borashan- Athag- we'

³¹Hebron vogaung: jham mae" mo, rere:- amung: aijham re yao: we' yao" byu qe na lae" joe" qin" ra" jo, qo alhab' khyo vhin: ke' ra".