Read Maru 1SAMUELA 4 Bible Online

1SAMUELA 4 - Maru bible

1SAMUELA 4

¹Ai: ayo, mae Philisti byu qe wa Israel re- gyekhe' nae" zang" ham: ako". Aimung: Israel byu qe wa gye yekhe' ako". Israel byu qe wa Ebeneza jo, qo mae jamu yekad' na mung:- Philisti byu qe wa Apheg jo, qo mae jamu kad' na: ako".

²Philisti byu qe wa Israel byu qere gye zin" ako". Gyai thin: ra" khyo" bin: zin: thao- yao: bam wa Israel byu qere zin" aung: pye' gemung: gye poe mae byu byid taung re se' pye' ako".

³Na: dang: ra" mo, jamu khyo phao: joe" lo gelao"- Israel au: jhaung qe wa ASANG wa ana" ba pe"mung: ngonhaung" re Philisti byu qe: lo, mae seim" nhao: i? Ngonhaung" we' daga" ye: nae" we' ngonhaung" re ngonhaung" nho: gyevo qe: lo, mae" khyad' yu nae" qhid' mae" Shilo mae ASANG: Dao: Thang" Ban" re lo" yu gelang: ga: ta" ako".

⁴Airumung: yao: bam Shilo khyo lagyo: qere nhao: ke' mung: kherubin dao mae eib na: ra" qam: bo: thao" ra" ASANG: Dao: Thang" Ban" re yu nhao: ke' ako". Eli nho: yauggai zo: tao ngad ko" ra" Hophni we'- Phineha tao wa ai: Dao: Thang" Ban" we' daga" cao" li" ako".

⁵Dao: Thang" Ban" joe" li" lao" Israel byu qe wa bau: yang: myid gaung nan" sho' thoe qi: ke' yang: hug' ako".

⁶Philisti byu qe wa ai: zag: hug' thoe re the' gyo: gemung: Hebre byu qe: jamu mae zag: hug' na: rure alhab' tae" gyo" qu" shige,- Pe" ga" ru ngad ko" laug' i? ga: ta" ako".ASANG: Dao: Thang" Ban" Hebre byu qenho: jamu mae joe" li" va" khyo re yao: bam ba: ako".

⁷Yao: bam gyaug mung:- So daso yao: bam: jamu khyo joe" li" ava". Ngonhaung" seim" va" qhid' phyao: ceru: khonhae" re: ngonhaung" mae maboe" qu"-

⁸Ce: qam: so' bo: ra" so jham: lo, mae" ngonhaung" re khag' qo" khyad' yu nae" i? Ai: so jham wa din"pyad' yo mae Egutu byu qere se' pye' ra" so jham ngad: ako".

⁹Philisti byu qe we"- (lhe: myid bo ge,) gai lo: qeru: khe' zin: ge,- mangad: re- yao: bam ngonhaung" jeim doe, ko" ruwe' dakhyo: ngonhaung" re: Hebre byu qenho: jeim qe boe" lo" nae". Aimung: gai lo: qeru: khe' zin: ge,- ga: ta" ako".

¹⁰Philisti byu qe wa gyai thin sho' khe' zin: gemung: Israel byu qere khe' aung: pye' ako". Israel byu qe wa yao: bam: yham khyo tao" phao: lo" ako". Ai: mae myo: sho' qo" se' pye' ako". Israel gyezo: sam taung se' pye' qhug' ako".

¹¹Mao"So: Dao: Thang" Ban" wa taung" yu: pye' qhug' ru we' Eli nho: yauggai zo: tao ngad: ra" Hophni we' Phineha shid' tao: geim" se' pye' qhug' ako".

¹²Benyamin kaung mae" byu dayaug wa gyekhe' poe mae" Shilo khyo tao" phao: lo mung: ai: ba re yao: joe" lo: ra". Yao" nhag' kaug' rure qhu" nae" qhid' mae" yao" mai bau: jham re lao" cad' pye' mung: yao" au: dao mae myid zhai: gag: sheim: yang: kad' ra".

¹³Dao: Thang" Ban" we' sin: yang gyai myid: ci" na: ra" Eli wa khyoyae mae" zaung tao" dao mae zaung: jo, yang: qu" mo; na: ra". Byu aiyaug wa vogaung: geim" lau thoe hau" nhao" ke' mung: yaug khao: ngo" wa gyaug: ngug: ako".

¹⁴Eli ai thoe re the' gyo: mung: ce: thoe jham pe" we' sin" ru ngad: i? ga: myid' ra". Byu aiyaug wa Eli re lau dao: yeta" kyo: nae" qhid' mae" hin hin za: ye" lo" ra".

¹⁵(Ana" Eli wa gug xe: she' zin ngad mung: alaug bin sho' myo, jid: ava".)

¹⁶Byu aiyaug wa ngo wa gyekhe' poe mae" phao:- loe; lo: ru ngad:- ana" ba cekhyo joe" sho' tao" lo: ru ngad:- ga: ta" ra". Eli wa yao: re- nga" zo: we" pe" ru: i? ga: myid' ra".

¹⁷Lau dao: cilo yaug wa Israel byu qe wa Philisti byu qe mae" tao" phao: ako". Qu" gyaug qu" lhaung sho' ngonhaung" re aung: pye' avako". Ai: tho' mago" ni" yauggai zo: Hophni we' Phineha shid' tao: geim" re: se' pye' qhug' avako". Amung: Mao"So: Dao: Thang" Ban" re taung" yu: pye' ru qhug' ava"- ga: ta" ra".

¹⁸Byu aiyaug Dao: Thang" Ban" we' sin: yang: ta" thug' lao" Eli wa kham: mo" dung: nhae mae" yao" zaung tao" mae" nhaung thao" khyo ngo; gyo" lo" ra". Yao: wa gyai mao: mung: xau yaug ngad yang: lang zang: lo" pye' khyug' mung: shid: lo" ra". Yao: wa Israel byu qere zin lam byid xe au: jhaung kad' lai: lo: ra".

¹⁹Eli nho: dau mo"- Phineha nho: yham sang myhi" wa gaung la" ra". Khau nae" ayo, ngad: ava". Yao: wa Mao"So: Dao: Thang" Ban" taung" yu: pye' qhug' ra" khyo- yao: vao we' yao" yham sang pho" shid: ra" khyo re the' gyo: lao"- nyag din taung" zoshao khau: ke' ra".

²⁰Yao: shid: lo" na: au:- yao: re bao" byid' ra" myiqe: myhi" wa yao: re- qhao" wa,- nao yauggai zo: qo" ava"- ga: ta" ra". Ngadqere: yao: wa matae" gyo: lo:- pe" matau: ngad: ra".

²¹Yao: wa ai: zonau" re Ikhabod ga: mhang" byid' ra". Ai: lajheim: wa Mao"So: phungbao wa Israel byu qemae" phao: byaug va" ga: ru ngad: ra" Mao"So: Dao: Thang" Ban" wa taung" yu pye' qhug' ra" khyo re:- yao" yao: vao we' yao" yham sang pho" shid: lo" rere: qang yang: ta" ru ngad: ra".

²²Mao"So: Dao: Thang" Ban" wa taung" yu qhug' va" ruyang Mao"So: phungbao wa Israel byu qe mae" phao: byaug va" ga: yao: ta" ra".