Read Maru 1SAMUELA 7 Bible Online

1SAMUELA 7 - Maru bible

1SAMUELA 7

¹Airumung: Kiriad Yearim vobyu qe wa ASANG: Dao: Thang" Ban" re ye dao: yu mung: bug gaung dalam: mae na: ra" Abinadab ga: mang: ra" yaug: yham khyo dao: vao ye" ako". Yao: bam wa aiyaug: nho: yauggai zo: Eleaza re ai: ban" qu" gam nae" qhaug' byid: yang: san: to" ako".

²ASANG: Dao: Thang" Ban" wa shid' xe zin ko myao" sho' Keriad Yearim mae jo; jo; ra". Ce: ayo, gyo: mae Israel byu qe alhab' wa bao" thaug' yu nae" ASANG re mho' yao: ako".

³Samuela wa Israel byu qere naonhaung" aung khug nhag' lam: alhab' we' ASANG shad' khyo naonhaung" dam: tug' lo nae" ngad ko" re wa- taung bug so jham alhab' we' Astared khyao dau alho jham re naonhaung" yu: pye' ca" ako". Naonhaung" yao" gaung ASANG re bin sho' qhaug' byid: mung: yao: re caung da" byid: ge,- aire yao: wa Philisti byu qe: qam: so' mae" naonhaung" re khyad' yu: li" nae"- ga: ta" ra".

⁴Aimung: Israel byu qe wa yao: bam: Bala we' Astared so alho jham re yu: pye' mung: ASANG re za: caung:pa" byid' ako".

⁵Ai: thao Samuela wa Israel byu alhab' re Mizpa jo, qo mae jho" qhug' nae"qhid' mae" byu nhao: ke' mung:- aimae ASANG re naonhaung" qhid' mae" ngo akyu" mho' byid: nae"- ga: ta" nhao: ke' ra".

⁶Airumung: yao: bam alhab' Mizpa mae zang" ham: ako". Yao: bam wa qid dajhid' re khae: yu mung: aire ASANG re qhaug' byid' ra" xeim: khyo" vhe' khyo" mung: ba geim" zo:ve jao" ako". Yao: bam wa ngonhaung" wa ASANG re qobo shad' lhoe" bam va"- ga: ta" ako". (Samuela wa Mizpa jo, qo mae Israel byu qe: phaung mae jho" ta" ngag: ra" khyo re ta" sho' pye' byid' ra".)

⁷Philisti byu qe wa Israel byu qe Mizpa jo, qo mae zang" ham: na: ko" ra" khyo re the' gyo: gelao"- Philisti kho:kham ngo" yaug wa- ai bam re gye yezin: nae" qhid' mae" yao: bam byu qe we' daga" to" ye" lo" ako".

⁸Israel byu qe aikhyo re the' gyo: mung: gyaug yang:- Samuela re Philisti byu qe: lo, mae" ngonhaung" re khyad' yu nae" qhid' mae" ngonhaung" Mao"So ASANG re mathang lo: akyu" mho' wa, ga: ta" ako".

⁹Samuela wa yao nau" dadau: re se' mung: aire xeim: ngaui" khyo" ASANG re alhab' phad' ngaui" byid' ra". Ai: thao yao: wa Israel byu qere bao" thaug' byid: nae" ASANG re akyu" mho' ra". Ailao" ASANG wa yao" akyu" mho' thoe re tau: byid' ra".

¹⁰Samuela xeim: ngaui" re ngaui" byid' na: au: Philisti byu qe gye zin: nae" qhid' au: shad' khyo qui" li" ako". Ngadqere: ai jao" ASANG wa mug: khaung mae" yao: bam re mug: dam: dam: yang: gye kad' ra". Yao: bam wa xo sho' abyo asin: shug: lo" mung: gyaug phao: lo" ako".

¹¹Israel byu qe wa Mizpa jo, qo mae" to" ye: mung: Philisti byu qere Bethkha alaug joe" sho' cao" khe' mung: khyo thao" qang" ai bam re se' ye" lo" ako".

¹²Ai: thao Samuela wa laug baui dabaui re gaug: yu mung: aire Mizpa we' Shen agyo: mae zhaug' mung:- ASANG wa ngonhaung" re khyo thao" sho' bao" thaug' byid' ava"- ga: ta" mung: yao: wa aire bao" thaug' laug zang ga: mhang" ra".

¹³Aimung: Philisti qe wa gye seim" ako". ASANG wa Samuela daui: na: ra" myhao" Israel qe: mug: myid khyo aibam jhin" vao ye" rumae" gug: gam byid' ra".

¹⁴Ekron we' Gat agyo: mae" Philisti byu qe khe' aung: yu: ra" vogaung: alhab' re Israel qe dam: qo" tug' yu: ako". Amung: Israel byu qe wa yao" mug: myid alhab' re dam: qhug' yu: ako". Israel byu qe we' Khanan byu qe: agyo: mae re: mang: dae: jo; ra".

¹⁵Samuela wa yao: daui: na: ra" myhao" Israel re eib: ra".

¹⁶Yao: wa zin khao: ngo" Bethela- Gilgala- Mizpa- khyo du" lhang lhau mung: ai: jo, qo jham mae" jho" ta" ngag: ra" khyo jham re yao: lhaung" ta" sho' byid' ra".

¹⁷Ai: thao yao: wa Rama mae" yao" yham khyo dam: phao lo mung: ai: jo, qo mae re: tarha" agyi khyo" lhaung" kad' ra". Yao: wa Rama mae ASANG: qhid' mae" phan dalam re: kad' ra".