Read Masana CAWA'TA TUNITA 11 Bible Online

CAWA'TA TUNITA 11 - Masana bible

CAWA'TA TUNITA 11

¹Hay na'ta sumun hay nagat noŋ kaf vunna visi ma nisi dumna ay kepe, yoboy ma nisi di hiɗi namna ay kepe kaw.

²Nisi yaway hay gal ma kuɗuwn pa, nisi fi liyn ma beɗna hay Sineyar, nisi lak hayam ziya.

³Nisi ka di jar-tuwsiya: Tuɗaygiya, caygi brikŋa, gaygit hiɗi kuta. Brikŋa muɗi mi hiɗiyna visiya, naga ma dirginna muɗi mi zomona ma sliraɓam jaramna may.

⁴Nisi ka di jar-tuwsi ala: Tuɗaygiya, inaygi hoyok-ziyn ma ŋolla hiɗi simdira, nay ma inim fiyoko ta-ta sinem co kulo dukalawn goŋ'. Nay ma tiyay say goy tiy, kay nay ma mer goy kay yam nagat siɗak-ɗakɗi.

⁵Bugol kayni Ma-Vatɗina jikay gaa'a kay ɗuw hoyok-ziyna hiɗi gulmunna ma gurona vi sumun ka inimna.

⁶Ma-Vatɗin di'e: Yo! sum nisin tani jafsi kepe, vunna visi kep lay, van kayni mi tun-cawta visi ɦawa, hini wulin ɗawni, va ma nisi daawa ala nisi min lumu ni, sa ma as telsi kalam may loɗi.

⁷Nay tuɗaygiya, jikaygi gaa jarsiya, ɓurawsi vunsi goyo, kay a nisi ma hum vun tuwsi loɗi.

⁸Hay liy namna pa Ma-Vatɗina hinsi mer goy kay nagat pete, nisi hin inda vi simdir namna.

⁹Nisi yi sem liy namna ala Babel,[5] kay hay buur namna kayni sum sa ka kay nagat pete Ma-Vatɗina ɓurawsi vunsi goyo, hay liy namna pa kaw nam mer jaf-sumun kaf goy kay nagata.

¹⁰Kayni mi jafna vi Sem: Hay li ma busata vi Sem co kis, nam vuɗ Arpaksad, kayn di ala busat ma' bugol niy ŋol ma de gaa kay nagatna.

¹¹Bugol vu'da vi Arpaksad, Sem li busat kis-vasl lo, nam vuɗ guro-jufayna hiɗi guro-boyna.

¹²Hay li ma busata vi Arpaksad co dok-ɦidi yam vasl cona, nam vuɗ Selah.

¹³Bugol vu'da vi Selah, Arpaksad li busat kis-fiɗi hiɗi diram ɦidi, nam vuɗ guro-jufayna hiɗi guro-boyna.

¹⁴Hay li ma busata vi Selah co dok-ɦidi, nam vuɗ Heber.

¹⁵Bugol vu'da vi Heber, Selah li busat kis-fiɗi hiɗi diram ɦidi, nam vuɗ guro-jufayna hiɗi guro-boyna kaw.

¹⁶Hay li ma busata vi Heber co dok-ɦidi yam fiɗi; nam vuɗ Peleg.

¹⁷Bugol vu'da vi Peleg, Heber li busat kis-fiɗi hiɗi diram dok-ɦidi lo; nam vuɗ guro-jufayna hiɗi guro-boyna kaw.

¹⁸Hay li ma busata vi Peleg co dok-ɦidi, nam vuɗ Rehu.

¹⁹Bugol vu'da vi Rehu, Peleg li busat kis-ma' hiɗi diram zleeŋe lo, nam vuɗ guro-jufayna hiɗi guro-boyna kaw.

²⁰Hay li ma busata vi Rehu co dok-ɦidi yam ma cona, nam vuɗ Serug.

²¹Bugol vu'da vi Serug, Rehu li busat kis-ma' hiɗi diram siɗiya lo; nam vuɗ guro-jufayna hiɗi guro-boyna kaw.

²²Hay li ma busata vi Serug co dok-ɦidi cona, nam vuɗ Nakor.

²³Bugol vu'da vi Nakor, Serug li busat kis-ma' lo, nam vuɗ guro-jufayna hiɗi guro-boyna kaw.

²⁴Hay li ma busata vi Nakor co dok-ma' yam zleeŋe, nam vuɗ Terak.

²⁵Bugol vu'da vi Terak, Nakor li busat kis hiɗi diram doogo yam zleeŋe lo; nam vuɗ guro-jufayna hiɗi guro-boyna kaw.

²⁶Hay li ma busata vi Terak co dok-siɗiya cona, nam vuɗ Abram, Nakor hiɗi Haran.

²⁷Tan kayni mi jafna vi Terak: Terak vuɗ Abram, Nakor hiɗi Haran. Haran vuɗ Lot may.

²⁸May Haran mit jew bulum Terak, nam mit hay nagat ta nam vuɗ haya'ta, kayn di ala Ur hay Kaldee.

²⁹Abram hiɗi Nakor yaw boyo: Cata vi Abram semda va' ala Saray, cata vi Nakor semda va' ala Milka, na' ti goota vi Haran bum Milka hiɗi Yiska.

³⁰Saray na' gediya, tay vuɗ goorɗi.

³¹Terak vi goora valam Abram hiɗi goor-ŋolona valam Lot goora vi Haran kuɗumu, hiɗi Saray cata vi goora valam Abram kaw, Nagat Ur hay Kaldee nisi hina'a, kay tuɗ hay Nagat Kanaan. Nisi co hay nagat Karan, nisi lak haya' ziya.

³²Terak li busat kis-ma' hiɗi diram vasl, nam mit hay nagat Karan.