Read Masana CAWA'TA TUNITA 12 Bible Online

CAWA'TA TUNITA 12 - Masana bible

CAWA'TA TUNITA 12

¹Ma-Vatɗina di tam Abram: Wulin kayni hinaŋ nagata vi sumiyaŋ ta naŋ vuɗi haya'ta, hinaŋ ziyna vi buŋ kaw, tuɗaŋ hay nagata ta nan min ɗekaŋ ka'ta.

²Nan ma muɗaŋ jafaŋ ŋolo, nan ma gi bol kaŋu, nan ma muɗaŋ seŋ tiy ŋolo. Sum segen ma fi bolda ɗawn kuɗaŋ naŋu.

³Sum sa laŋ ŋaana, nan ma gisi bolo, Sum sa laŋ joona, nan ma beɗsi goyo. Jaf-sumun gaa hay nagat noŋ kaf fi ŋaat ɗawn kuɗaŋ naŋu.

⁴Abram kaliya ki Ma-Vatɗin di talam nala, Lot kali hiɗi namu kaw. Hay li ma Abram kal goy hay Karan, busata valam coy dok-siɗiya yam vasl.

⁵Abram vi cata valam Saray kuɗumu, hiɗi Lot goora vi ɓasulumna kaw, nisi yaw farayna visi kuɗsi kaf, hiɗi gorvo sa nisi gussi hay Karan kaf kaw. Nisi kaliya kay co hay nagat Kanaan, nisi coya hay nagat na'ta.

⁶Abram ŋuy nagata ta-ta nam co hay liyn ma yum Sikem, nam co gaa kuɗ gu-sliganna ma hay More. Hay na'ta ay ziy hay nagat kayni si sum sa Kanaaniyana.

⁷Ma-Vatɗina vul tuwam kir Abram, nam dumu: Nagat waŋŋi nan min vula' mi jafna vaŋu. Goy hay liy namna Abram in giwin-ma-ɗifinna tam Ma-Vatɗina ma vul tuwam kiramu.

⁸Goy hay liy namna pa, nam kali hay liyn ma hiɗiyna hay gal ma kuɗuwna vi Betel, ɗawni nam in guɗukŋa valamu, Betel hay galam ma vulatina, Ay hay galam ma kuɗuwna. Nam in giwin-ma-ɗifinna mara'a tam Ma-Vatɗin lo, nam yi sem Ma-Vatɗin hay vunamu.

⁹Abram tuɗi vokom lo lo, nam kali hay gal ma kayamna.

¹⁰Hay na'ta mayta ni gaa kay nagata; nala Abram kali li ziy ɗawni hay Egipte, kay mayta ka ŋolo hay nagata.

¹¹Hay li ma nam goboy co kulo hay Egipte, nam di tam Saray cata valam ala: Humagu, nan wi ala nak ti cata ta jifiy ŋolo.

¹²Hay li ma sum sa Egipten irsi wagawa, nisi ma di ɗawn ala nak ti cata vanu, nisi ɗawn ma can goyo, hinag nak iriya may.

¹³Nan siɗawagu, nak ma di ala nak ti ɓasunta, kay a nisi ma lan ŋaa'a kuɗag naku, a nan ma hin iri ɗawn kuɗag naku.

¹⁴hay li ma Abram co hay Egipte, sum sa Egipten ɗuw kayni na' jifiy ŋol ku'u.

¹⁵Sum sa ŋulona vi Farawn kaw irsi wa'a, nisi tiya' se' vun Farawn, nisi mara' hay ziyna vi Farawn.

¹⁶Nam li Abram ŋaa ŋolo kuɗa'a; Abram nisi vulum fok-dimina, nisi vulum luwayna, vulum kuro ma jufayna hiɗi ma boyna, sa sunda sa jufayna hiɗi sa boyna, nisi vulum lamgan lay.

¹⁷May kuɗ Saray cata vi Abram, Ma-Vatɗina hin zumalda ŋolda nig gaa'a kay mulla Farawn hiɗi ziyna valamu.

¹⁸Farawn yi Abram, nam dumu: Lawta naŋ la' tan na kayn ti law mige? Naŋ may dan ala na' ti cata vaŋuɗi kay mige?

¹⁹Naŋ dan ala na' ti ɓasuŋga, kay na'ta nan sla' ca'a naɗi su? Wulin kayn cata vaŋ zawni, vaŋga, tuɗaŋ hiɗi na'a.

²⁰Farawn vul hagat tam sumuna valamu kay nisi ma gi ir Abram, nam hiɗi cata valamu hiɗi sle ma ir visin kaf.