Read Masana CAWA'TA TUNITA 13 Bible Online

CAWA'TA TUNITA 13 - Masana bible

CAWA'TA TUNITA 13

¹Abram fokis hay Egipte pa, kal hay gal ma kayamna, namu, cata valamu hiɗi slena valam noŋ kafe. Lot ka kuɗum lay.

²Abram ay hiɗi slen ŋolo: farayn ka lay, gurjut ka lay, or ka lay.

³Nam tuɗis hay gal ma kayamna ta-ta co Betel, nam co hay liyn ma guɗukŋa valam ays ini jew hayna, jar Betel hiɗi Ay.

⁴Hay liyn ma nam in giwin-ma-ɗifinnis jew hayna. Hay liyn namna Abram yi sem Ma-Vatɗin hay vunamu.

⁵Lot kaw nam tuɗ kuɗ Abram kilan fok-dimina valam ka'a, luwayna valam ka'a, guɗukŋa valam ka kaw.

⁶Liyn ma nisi lakay hayna kiɗa goy kisiya, as a nisi lak hayam ma' petɗi kay farayna visi biyay zututu, liyn may asam noŋɗi.

⁷Sum sa ŋom farayna vi Abram hiɗi sa ŋom farayna vi Lot tun caw cirep tuwsiya. Hay na'ta sum sa Kanaaniyana hiɗi sum sa Feresiyena ay ziy hay nagata.

⁸Abram di tam Lot: Nan siɗawaŋu, nan min ala nan hiɗi naŋu ci-wayt ma fok jarayɗi, jar sa ŋom farayna vanu hiɗi sa ŋom farayna vaŋuɗi kaw, kay nay ɓosiyom tuwayna.

⁹Wulin kayn nagat tay goy vokaŋ hiriŋ hiriŋ ɗisu? ŋaat kayni naŋ ma ja jaraŋ goy hiɗi nanu. La naŋ min tuɗ hay gal ma gulla, nan na man hay gal ma jufna, la naŋ min tuɗ hay gal ma jufna, nan na man hay gal ma gulla.

¹⁰Lot cuk iram goyo, nam wi liyn ma beɗna vi Yordan, liyn namna pet ay ŋulomo, vunam ta-ta hay Sowar. Kay jew a Ma-Vatɗin ɓulak nagat Sodoma hiɗi Gomora goy kayni, liy namna ay ki jardeŋŋa vi Ma-Vatɗin nala, ki nagat Egipte nala.

¹¹Lot vilekem mi liyn ma beɗna vi Yordan, nam hur vokomu hay gal ma kuɗuwna. Ki kayn nala jarsi ja goyo.

¹²Abram li ziy hay nagat Kanaan, Lot li ziy hay hoyok-ziy ma gaa beɗna, pi guɗukŋa valam kulo'o, ta-ta hay Sodoma.

¹³Sum sa hay Sodoma nisi joo ŋolo, nisi li suluk ŋolo kat Ma-Vatɗina.

¹⁴Hay li ma Abram jaram ja goy hiɗi Lot jana, Ma-Vatɗina dumu: Poŋaŋ iraŋ kulo'o, hay liyn ma naŋ coli zawni, ɗuwaŋ hay gal ma gaana, gal ma kayamna, gal ma kuɗuwna hiɗi ma vulatina kaw;

¹⁵kay nagat ta naŋ ka ɗuwa'ta zawni kaf, nan min vula' maŋ naŋu, mi jafna vaŋ ma bugolaŋŋa kaw, kay dok-doko.

¹⁶Nan ma biyaŋ jafaŋ haca-haca ki buɗufna ma kay nagat nala: La sa asi a ŋa buɗufna, nam ma ŋa jafna vaŋ kaw.

¹⁷Fokaŋ kulo'o, ŋuyaŋ nagata kuɗ fiyokŋa va'a hiɗi buɗukŋa va' kafe, kay nagat na'ta nan min vulaŋga.

¹⁸Abram pat guɗukŋa valam kulo'o, nam kaliya musi jar gu-ma'asna vi Mamre, goboy hiɗi Hebron. Ɗawni nam in giwin-ma-ɗifin mi Ma-Vatɗina.