Read Masana CAWA'TA TUNITA 14 Bible Online

CAWA'TA TUNITA 14 - Masana bible

CAWA'TA TUNITA 14

¹Van li nala hay buura vi Amrafel mulla vi Sineyar, Aryok mulla vi Ellazar, Kedorlawmer mulla vi Elam hiɗi Tideyal mulla vi Goyim.

²Nisi fok duura hiɗi Bera, mulla vi Sodoma, hiɗi Birsa mulla vi Gomora, hiɗi Sineyab mulla vi Adma, hiɗi Semebeer mulla vi Seboyim, hiɗi mulla vi Bela ta ya' ala Sowar.

³Muliyan nisina tok tuwsi kaf hay lokŋa vi Sittim, hay liyna vi niy-lum ma Mandana.

⁴Ir busat doogo yam ma, nisi ka gaa kuɗ gaŋeraŋa vi Kedorlawmer, may hay busata doogo yam ɦidita, nisi mak kalamu.

⁵Hay busata doogo yam fiɗita, Kedorlawmer hiɗi muliyan sa kuɗumna kaf nisi co'o, nisi dur sum sa Refayimna kol kisiya hay Asterot-Karnayim, nisi kol kay sum sa Suzim hay Ham, nisi kol kay sum sa Emim hay Save-Kiryatayim.

⁶Nisi kol kay sum sa Horiyena kulo kay hiɗiyta vi Seyir, ta-ta tam gu-ma'asna ma ka hay Paran, goboy hiɗi fulda.

⁷Bugolda nisi hota, co hay En-Misfat ta ya' Kades, sum sa Amalekŋa nisi kol kisiya, kuɗsi vo hay nagata visiya, nisi kol kay sa Amoriyana sa ka hay Hatsason-Tamar kaw.

⁸Nala mulla vi Sodoma hiɗi mulla vi Gomora, mulla vi Adma hiɗi mulla vi Seboyim, hiɗi mulla vi Bela ta ya' Sowar kaw nisi kot tuwsiya kay li duura hay fulda vi Sittim.

⁹Kay dur Kedorlawmer mulla vi Elam, Tideyal mulla vi Goyim, Amrafel mulla vi Sineyar hiɗi Aryok mulla vi Ellazar. Muliyan segen kuɗ tuwsi fiɗi, segen kuɗ tuwsi vasl may.

¹⁰Liyn ma boŋoloŋŋa vi Sittim ay hobay hiɗi kaara ma koti hiɗi zomona; mulla vi Sodoma hiɗi mulla vi Gomora muni jaŋi, nisi cuki gaa'a hay kaara; dirsi ma hinina piri goyo kay hiɗiyta.

¹¹Sa kol kisina yaw farayna vi Sodoma hiɗi Gomora noŋ kaf, sle ma tina visi noŋ kaf lay, kali hiɗi namu.

¹²Lot goora vi ɓasum Abram ma ka musi hay Sodoma kaw nisi vumu, nisi yaw slena valam noŋ kaf, nisi kaliya.

¹³Sa mara ma piray goy vun duura mar labar namna mi Abram sa ma Hebrena, Abram ay musi ziy jar gu-ma'asna vi Mamre ma Amoritna, ɓasum Eskol hiɗi Aner, sa bonot juni jarsi hiɗi Abramna.

¹⁴Hay li ma Abram hum ala ɓasulumna kaw viy kisi gorvo'o kayni, jar sa sunda valamu nam yaw sumun kis-ɦidi, hiɗi diram doogo yam glafandi, sum sa gaŋay ŋolo sa vuɗi vo valamu kaw. Nam vulsi sle ma duur kisiya, sli sem muliyan nisina ta-ta hay Dan.

¹⁵Nam ɓuraw ir sumuna valamu kay mok sa gawta hay henjeta. Nam kol kisiya, digiɗsi ta-ta hay Hoba, ta ka goboy hiɗi Damas.

¹⁶Farayn kaf nam hotomiya; Lot ma ɓasulumna hiɗi slena valam noŋ kaf nam hotsiyaya, boyona hiɗi sumun kaf kaw.

¹⁷Hay li ma Abram hoti vo vun duura ma nam kol kay Kedorlawmer hiɗi muliyan sa hiɗi namna hotna, mul ma hay Sodoma kali goyo kay ŋafam iramu hay liyn ma boŋoloŋŋa vi Save, kayni mi boŋoloŋŋa vi mulla.

¹⁸Melkisedek, mul ma hay Salem, maram funa hiɗi vin ma cina. Melkisedek ay mi mul-ma-ɗifinna vi Lawn ma Kulo-Jamna.

¹⁹Nam gi bol kay Abram mi di'e: Bolda ka kay Abram hay semda vi Lawn ma Kulo-Jamna, ma ka ŋom wuralawna, ma ka ŋom nagata kaw.

²⁰Bolda ka kay Lawn ma Kulo-Jamna, nam ma vulaŋ sa gaw kaŋŋa hay ɓaŋu. Abram vulum gal-ma-doogona vi slen kafe.

²¹Mul ma hay Sodoma di tam Abram: Naŋ ma vulan sumuna, may farayn kaf nam maŋu.

²²Abram ka hotom dita: Nan sli ɓanawa kulo'o vok Ma-Vatɗina, Lawn ma Kulo-Jamna, ma ka ŋom wuralawna hiɗi nagat kafna.

²³Sle ma ir vaŋ kaf lakŋi nan as vi kuɗum kep noŋɗi, baraw ma duɓarayɗi, zigew ma cin tuguruɗi kaw, kay a naŋ ma di ala muɗan faray naŋuɗi. Nan may sli vaɗi.

²⁴May tina vi joriyo sa tuɗ kuɗanna tuta. Sum sa tuɗ hiɗi nanu ki Aner, Eskol hiɗi Mamre nala, nisi as yaw ir fisin misiya.