Read Masana CAWA'TA TUNITA 15 Bible Online

CAWA'TA TUNITA 15 - Masana bible

CAWA'TA TUNITA 15

¹Bugol slen kayni, Ma-Vatɗina vul tuwam kir Abram, nam ka di yoboyn talam ala: Naŋ ma li narɗi Abram, kay nan ka hiɗi naŋu, nanu mi bogorayna vaŋu, wurakŋa vaŋ ma li ŋolo.

²Abram hotom dit ala: Bum-Sumun Ma-Vatɗina, naŋ ma vulanti ɗawn meloge, nan mit ɗawn bay gooro, yaw vocota van ɗawn kaw mi Eliyezer ma Damasna.

³Abram di'e: naŋ may vulan jafɗi, yaw vocota van ɗawn mi sa ma vo hay daŋŋa van ɦawa.

⁴Bugolda Ma-Vatɗin di yoboyn talam lo ala: May yaw vocota vaŋ ɗawn mi namɗi, sa ma yaw vocota vaŋŋa ma vuɗum ɗawn mi naŋ kay tuwaŋu.

⁵Ma-Vatɗin tuɗum goy jiya, ka dum ala: Ɗuwaŋ iraŋ kulo dukalawn tige, mislekŋa kayn naŋ asay kay ŋaɓam su? Nan daŋu: Jafna vaŋ kaw ma li ɗawn ŋol ki mislek kay kulon nala.

⁶Abram tun vida valam kay Ma-Vatɗina. Ma-Vatɗina ŋaɓ ɗigerta kalamu.

⁷Ma-Vatɗin hot dum lo: nanu mi Ma-Vatɗina ma vaŋay goy hay Ur hay nagat Kaldee pa, kay nan min vulaŋ nagat tani.

⁸Abram hotom dita: Bum-Sumuna Ma-Vatɗina, nan ma wi ala nagat tani ma muɗ goy vanu ɗawn hiɗi mige?

⁹Ma-Vatɗin hot dumu: naŋ ma vi putta-gunayta ta busata va' ɦidi, ɦu-meeta ta busata va' ɦidi, ɦu-gamalana ma busata valam ɦidina, gukgulina kepe hiɗi goor-gukka kepe may.

¹⁰Abram yaw sle namna, kaam iram goy ma' ma', nam lakam goy vok tuwam ca-ca', may layayna nam min kaam iram goyɗi.

¹¹Layayn ma ti sliwna cuki gaa'a kay ti sliw namna; Abram digiɗim goyo.

¹²Hay li ma fatta ɗigawa, senda-ŋolda vi Abram, narta hiɗi jufunda ŋolda co kalamu.

¹³Ma-Vatɗin di tam Abram: Naŋ ma wi ala gurona vaŋ sa bugolaŋŋa ma kal goy gorvo'o hay nagata ta may visiɗi, sumun ma lisi gorvo ŋolo, sumun ma curoɗsi ŋolo ta-ta ir busat kis-fiɗi.

¹⁴May nan ma ka kitata kay jaf sum sa lisi gorvona, bugolda nisi ma kali goyo hiɗi farayn hay ɓisi ŋolo.

¹⁵Naŋ ma hot gaa tam sumiyaŋu hiɗi sle'ta, nisi paŋ ɗawn naŋ muɗi maar muɗu'.

¹⁶Jafna vaŋ ma bugolaŋ sem fiɗin ma hotay tani, kay jiw-zlata vi sum sa Amoriyana ya' bay dab tuwa.

¹⁷Hay li ma fatta ɗigawa gaa'a, jufunda li ŋolo; ɗuw na kayni, kuta ŋolda mok nuku, hiɗi sin-kuta kaw, nam jik jar muuriyan ma kaay goyna.

¹⁸Hay liy namna Ma-Vatɗin jun bonot hiɗi Abram, nam di'e: Nagat waŋŋi nan min vula' mi jafna vaŋ sa bugolaŋŋa, fokis hay niy-lumna Egipte pa ta-ta tam niy-lumna ma ŋolla ma yum Eufrata.

¹⁹Kayni ti nagata vi sum sa Keniyena hiɗi sum sa Keniziyena, hiɗi sum sa Kadmoniyena.

²⁰Hiɗi sum sa Hetiyena, sa Peresiyena, sa Refayimna kaw,

²¹sa Amoriyana, sa Kanaaniyana, sa Girgasiyena hiɗi sa Yebusiyena.