Read Masana CAWA'TA TUNITA 19 Bible Online

CAWA'TA TUNITA 19 - Masana bible

CAWA'TA TUNITA 19

¹Hay vulatita Sunda-wuralawna sa ma'na co hay Sodoma hiɗi Gomora, nisi fi Lot musi goy hay vun-galana vi Sodoma. Hay li ma Lot wisiya, nam fok kulo'o kay ŋafsi irsiya, nam girif gaa voksi kay nagata.

²Nam disiya: Humgiya nigi sa ŋulona vanu, nan siɗawgiya kay nigi ma cuk vo hay ziyna vi sa ma sunda vigiya, nigi ma muz segi goyo, nigi ma buur haya, hay li ma liyn foowa goyo, nigi ma kal migiya. Nisi di'e: A'a, numa bur goy jiy hay hagana.

³May Lot giɗelsi delsiya, ta-ta nisi co'o, kal vo hay ziyna valamu, nam kot tin kisiya, nam li fun-bay-kufna, nisi ti'e.

⁴Liyn ma nisi bur gaan bay as tuwa kayni, sum sa hoyok-ziyn Sodoma co'o, nisi ŋuy ziyna; tun cawis tam gurosgurayn pa ta-ta tam sa busayna, sum sa hoyok-ziyn tokay noŋ kaf.

⁵Nisi yi Lot nisi dumu: Sum sa cukay vo hay ziyna vaŋ henjeni ka arige? Naŋ cuksiyay goy jiy tuma'a kay numa min bur hiɗi nisiya.

⁶Lot kali goy tisiya hay vun-galana, nam duk vun-ziyn kulo bugolomu.

⁷Nam disiya: Bosiyonna, nan siɗawgiya ligi va ma jooɗige!

⁸Humgiya, guro-boyna van ka ma' sa bay bur tam sa tuwa, nan min marsi goy tigiya, nigi as li tisiya va ma nigi mina, may sumun lakŋi nigi li va ma joo tisiɗige, kay nisi ka lakay vo hay ziyna vanu.

⁹Nisi dumu: ɦuraŋis goyo, nisi hot di'e: San zawni co jaray kayn ki pul ɦawa nala, may nam min ka kitata vaya kayn kay mige? Humaŋ ŋaa'a, numa min laŋ naŋ joo suwsi nisiya. Nisi tun caw zut Lot hiɗi dono'o, nisi co goboyo kay kus vun-ziyna.

¹⁰Sa sunda-wuralawna meɗ ɓisi ay goyo, vi Lot kalaf tisi hay ziyna, duk vun-galan kulo'o.

¹¹Sum nisina sa ka moli hay vun-ziyna nisi duksi irsi goy tisoŋ', tun cawis tam sa gurayn pa ta-ta tam sa ŋulona', nisi tamtam ta-ta kay gar vun-ziyna, may liyam ma fi kisi mayɗi.

¹²Sa sunda-wuralawna di tam Lot: sa vaŋ mara ka tan su? La kunoŋ kla goor vaŋ ma jufu lebo ta ca'a kla ka hay hoyok-ziyn tani ni, naŋ ma kalam goy hay liyn tani.

¹³Kay numa min ɓulak liyn tan goyo, kay tiy ma sumun tiy tuwsi kisi vok Ma-Vatɗin suwi ŋolo, Ma-Vatɗin cukma'aya kay ɓulak hoyok-ziy namna tan goyo.

¹⁴Lot kali goyo, nam kus yoboy hiɗi kuniyomna sa min yaw gurona valamu, nam disiya: Yawgi kulo'o, hingi liyn tani, kay Ma-Vatɗin min ɓulak hoyok-ziyna. May kuniyomna ɗuwum ki nam ka di law ma cen ɦawa nala.

¹⁵Hay li ma liyn tun caw fo goyo, sunda-wuralawna li Lot hiɗi dono'o nisi dumu, fokaŋ kulo'o, yawaŋ cata vaŋu hiɗi gurona vaŋ sa ma' sa ka taŋ tani, kalgiya kay a naŋ ma mit hay ɓulakka vi hoyok-ziyn tanɗi.

¹⁶Hay li ma nam tun caw ti muurayt neeɗa kayni, nisi vum ɓalamu, namu hiɗi cata valamu hiɗi gurona valam sa ma'na, kay Ma-Vatɗin min suɗum goyo. Nisi kali hiɗi namu, hinim goy gine hiɗi hoyok-ziyna.

¹⁷Hay li ma sa sunda-wuralawna kalsi goy kalla, ma hena di tisiya: Nigi ma yaw jaŋi kay suɗ irita vigiya; nigi ma ɗuw ŋorgiɗi, hay liyn ma beɗna kaf nigi ma col hayamɗi, tuɗgi jaŋi kulo kay hiɗiyta, kay a nigi ma mitɗi.

¹⁸Lot di'e: A'a, Bum-Sumuna!

¹⁹Wulin kayn nan fi slugotawa hay vok iraŋu, naŋ ɗek slugota vaŋ ta ŋoldawa goy katanu, kay naŋ suɗ ciwta vanawa. May la nan jaŋ ta-ta kulo kay hiɗiyna, ɓulak-goyt fan ɗawn goy hoyoko, nan ma mita.

²⁰Ɗuwaŋ hoyok-ziy hen tani, nam goboyo, nan na ŋay hayamu, nam gooro, hinan tuɗ ŋay hayamu. lebo nam may goorɗi su? ciw ta van suɗ goyo tuta.

²¹Sunda-wuralawn dumu: Wulin kayn nan min laŋ slugot lo, hoyok-ziy ma naŋ di kalamn zawn nan as a ɓulakam goyɗi.

²²Tuɗaŋ ŋay hayam gosoyo, nan as kay li va tuwaɗi, la naŋ bay co hay hoyok-ziy namna. Kuɗ na'ta kayni nisi vul semda Sowar mi hoyok-ziy namna.

²³Hay li ma fatta dayawa, Lot co hay Sowar.

²⁴Ma-Vatɗina hin kuta hiɗi sufre* si gaa kay Sodoma hiɗi Gomora, may vi Ma-Vatɗini pa.

²⁵Nam ŋal hoyok-ziy namna goyo, liyn ma beɗna hiɗi sum sa hay hoyok-ziyn kaf, hiɗi sle ma zumum gaa kay nagatna kaw.

²⁶Cata vi Lot ɗuw bugola'a, na' muɗ goy dol ma mandana.

²⁷Abraham fok kulo graw culum culum, kay tuɗ ɗuw liyn ma nam colis jew vok Ma-Vatɗina.

²⁸Nam ɗuw iram hay galla vi Sodoma hiɗi Gomora hiɗi naga ma galam kafna na kayni; nukŋa ka pat kulo kay nagata, ki nuk ma pat kulo' hay jurut nala.

²⁹Hay li ma Lawn ɓulak hoyok-ziy ma hay beɗna, humam gum kay Abraham; nam suɗ Lot goy hay kuta, hoyok-ziyna ma Lot ay musi hay jewna nam ɓulakam goyo.

³⁰Lot hiɗi gurona valam sa ma'na hin Sowar, nisi kal kulo'o cuk ziyna visi kulo kay hiɗiyna, kay nam li nari kay mus hay Sowar, nam hiɗi gurona valamu li ziy jar zul-hiɗiyna.

³¹Ta ŋolda di tam ta goota: Wulin kayn buy muɗi maari, hay liyn tani sa ma co garaya ki sum segen ka li hay nagat kaf nala mayɗi.

³²Nala nak nagaya, vulay dolayn mi buya, buray hiɗi namu, kay jafna vi buy ma li ŋomiya.

³³Nisi vul dolayn mi busiya, hay henje na'ta; ta ŋolda kal bur hiɗi bu'a; nam may wi buur ma na' bur talamna hiɗi fok ma na' fok kulon noŋɗi.

³⁴Hay buurta ka'ta, ta ŋolda di tam ta goota, humagu, kamat henjeta nan bur hiɗi buya; wulin kayn nay vulum dolayn vunam hay henjet ta vaydita lo, nak kaw tuɗag burag hiɗi namu, kay jafna vi buy ma li ŋomiya.

³⁵Nisi vul dolayna vun busiya hay henjeta ka'ta lo; ta goota kal buur hiɗi namu, nam may wi buur ma na' bur talamna hiɗi fok ma na' fok kulon noŋɗi.

³⁶Gurona vi Lot sa ma'na vi haya hiɗi busiya.

³⁷Ta ŋolda vuɗ goor kep, na' tunum selem ala Mowab, namu mi bum sa Mowabna ta-ta vaydi.

³⁸Ta goota vuɗ goor kep kaw, na' tunum selem ala Ben-Ami, namu mi bum sum sa Amonna ta-ta vaydi.