Read Masana CAWA'TA TUNITA 20 Bible Online

CAWA'TA TUNITA 20 - Masana bible

CAWA'TA TUNITA 20

¹Abraham fokays hay Mamre pa kali hay nagat ta gal kayamta. Nam cuk ziyna valam jar Kades hiɗi Sur. Kal mus hay Gerar neeɗa kaw.

²Abraham di kay cata valam Sara ala na' ti ɓasulumta. Kay na'ta Abimelek mul ma Gerar gi suniya, nam vi Sara.

³Bugol kayni Lawna vul tuwam kir Abimelek hay duwayt henjeta dum ala: Humaŋu, naŋ ma fi mitta kuɗ cata ta naŋ va'ta, kay na'a jufa' ka'a.

⁴Abimelek may bur ta' noŋɗi. Nam ka di'e: Bum-Sumuna, sa ma ɗigera naŋ as cum goy nala de su?

⁵Nam kay tuwam dan ala na' ti ɓasulumta, na' kaw ala nam mi ɓasu'na ɗisu? Nan li kayni may hiɗi dikga ta wuratɗi, hiɗi dikga ta jootɗi lay.

⁶Lawn dum lo hay duwayta ala, nan wi ala naŋ li kayni hiɗi dikga ta wastaɗi, kuɗ kayni nan telaŋu kay li suluk katanu, nan may malaŋ hagat kay buur hiɗi na'ɗi kayn kay na'ta.

⁷Wulin kayni cat na'ta naŋ vula' mi sa namna; kay nam mi sa ma Jobta, nam ma siɗaw kaŋu, naŋ ma mus iriya. May la naŋ hota'ɗi, waŋ goy kaŋ ŋaa ala naŋ ma mita, naŋ hiɗi sa faŋŋa kafe.

⁸Abimelek fok kulo graw culum, nam yi sa sunda valam kaf, nam visi labar namna; tuwsi muɗ nar huyum'.

⁹Abimelek yi Abraham kaw, nan dumu, naŋ lum tuma nala kayn mi mige? Suluk ma ŋol ki kayn nala naŋ maram kan hiɗi mulda van kayn nan lum taŋ joo mi mige? Naŋ lum tan kayn mi law ma sa nagay a lumɗi.

¹⁰Abimelek di tam Abraham: wulin naŋ li nala kayn hiɗi varta ta anige?

¹¹Abraham di'e: Nan vari kuɗ hayan kayn ala: la li ŋalɗi, nagat tani sa ma li nar kuɗ Lawn may haya'ɗi kla, ɗawn nisi ma can goy kuɗ cata van klasige!

¹²May hay gasit kayni, na' ti goor-bunta, buma kep, may vuɗa' ti sunɗi. Na' muɗi ti cata vanu.

¹³Hay li ma Lawn gan irani goy gine hiɗi ziyna vi bun kayni, nan ka di Sara ala: La nak min lan slugo'o ni, liyn kaf ma nay coowa hayamuna, nak ma di ala nan mi ɓasukŋa.

¹⁴Abimelek yaw luwayna hiɗi fok-dimina, yaw sa sunda sa jufayna hiɗi sa boyn kaw, vulsi mi Abraham; nam vulum Sara cata valamu.

¹⁵Abimelek di'e: Nagata van waŋis vokaŋ tiriŋ-tiriŋŋi, liyn ma kiraŋ ŋaan kaf naŋ as cuk ziyna vaŋ hayamu.

¹⁶Nam hot di tam Sara: Humagu, nan vul gurju ta ɗeŋga birim kep mi goor-bugŋa, gurju na'ta ma li mi va ma bar kagu vok nisi sa ka hiɗi nakŋa kafe. Vok sumun kaf lawta vag ma li ɗigere.

¹⁷Abraham siɗaw Lawn kay Abimelek, namu hiɗi cata valamu hiɗi sa sunumna kaf Lawn yersi goyo; nisi muɗ vuɗ guro'o.

¹⁸Kay sum sa hay ziyna vi Abimelek kaf Lawn muɗsi gediya, kayn kuɗ Sara cata vi Abraham.