Read Masana CAWA'TA TUNITA 21 Bible Online

CAWA'TA TUNITA 21 - Masana bible

CAWA'TA TUNITA 21

¹Ma-Vatɗina humam hot gum kay va ma nam dum tam Sara, va ma nam dum ta'na nam hobom vunamu.

²Sara vi haya, na' vuɗ goor mi Abraham kep hay maarta va'a. Vuɗum hay liyn ma Lawn ŋaɓa'tisna.

³Goor namna ma Sara vuɗumna Abraham tunum selem ala Isaak.

⁴Hay li ma buurta vi Isaak co glafandi, Abraham kaam gosaya, ki Lawn dum nala.

⁵Hay li ma Isaak vuɗ kayni, busata vi Abraham coy kis.

⁶Sara di'e: Lawn muɗanawa va ma cene. La gigekaw humawa nam ɗawn ma cen kuɗanu.

⁷Na' hot di'e: Sa ma di mi Abraham fat tara kep ala Sara ma vuɗaŋ gooro mi gige? Dolay kayn nan vuɗum goorawa hay maarta valamu.

⁸Isaak wuliya, nisi kaam vunam goyo, hay buur ma nisi kaam vunam goyna Abraham li yuldeta ŋolda.

⁹Goora vi Hagar ta Egipteta ma na' vuɗum mi Abrahamna, Sara wum kayni nam ka pan goora va' zaw;

¹⁰na' di tam Abraham: Cata gorvot kilani naŋ ma digiɗa' goyo hiɗi goora va'a, kay goora vi cata gorvot zawni as yaw vocot daar hiɗi goora van Isaakɗi.

¹¹Lawt kayni ɓulak dik Abraham ŋolo, kay Ismayel kaw mi goora valamu.

¹²May Lawn di tam Abraham: Naŋ ma ɓulak dikaŋ kuɗ lawta vi goora vi cat ta gorvotɗi, la Sara jobaŋ kay mige kaw naŋ ma huma'a, kay jafna vaŋ ma gasin ma may ɗawn goy hay Isaak pa.

¹³Goora vi gorvota vaŋ kaw nan ma lum jafam ŋolo, kay nam kaw mi jafna vaŋu.

¹⁴Abraham fok kulo graw culum; nam sli funa, hob huurta hiɗi niyna, nam vulum mi Hagar, na' tunum pela'a, nam vula' goor kaw, ga' ira'a may. Na' kaliya, na' viy goyo hay fulda vi Ber-Seba.

¹⁵Hay li ma niy ma hay huurta vatawa, na' bur goor gaa kuɗ popo mara waŋ may.

¹⁶Na' kal mus goy vokomu jarsi ŋray ca ki sa ɓe ɓarawt goy nala, kay na' di'e: Iran ma wi mitta vi goora vanɗi, na' mus goy vokomu, tiy hiɗi dela' kulo ŋolo.

¹⁷Lawn hum della vi goora; Sunda-wuralawna vi Ma-Vatɗina yi Hagar ay kulo hay wuralawn pa di ta'a: Hagar, mayɗin mige? tuwag li narɗi, kay hay liy ma goor buri waŋŋi Lawn humum delemawa.

¹⁸Fokag kulo'o, slag goora, vum ɓalamu, kay nan min biyam jafam ŋolo.

¹⁹Lawn mala' ira' goyo, na' wi kaata ta hiɗi niyna, na' kaliya hob huurta va'a, vul mi goora nam ci'e.

²⁰Lawn ŋom goora, nam wul kulo'o, nam li ziyna valam hay fulda, nam muɗi mi sa ma li gawna.[7]

²¹Nam li ziyna valam hay fulda vi Paran, sulum slum cata ay goy hay Egipte.

²²Hay liyn namna, Abimelek co'o hiɗi Pikol ma ŋolla vi sojena valamu, nam di mi Abraham ala: Lawn ka hiɗi naŋu hay slen ma naŋ ka lum kafna.

²³Wulin kayn naŋ ma yi va kaŋ vokan tani hiɗi sem Lawna ala naŋ ma ɗutanɗi lay, ɗut gurona hiɗi guro-ŋolona vanɗi lay, nan hiɗi nagat ta nan ka musi haya'ta naŋ as luma ŋaa'a ki nan li ŋaat taŋ naŋ kayn nala lay.

²⁴Abraham di'e: Awa nan yi va kanu.

²⁵May Abraham law Abimelek kay kaata niyna ta sa sunda valam sla' hiɗi donota.

²⁶Abimelek hot dumu: Hay! Li law namna kayn gige kaw may kiranɗi; naŋ may dan goy jewɗin ke, nan hum law namna damn vaydi.

²⁷Abraham yaw fok-dimina hiɗi luwayna, nam vulum mi Abimelek, nisi jun bonot jar-tuwsiya.

²⁸Abraham yaw fok-dimi ma joriyon siɗiya, nam lakam goy valamu.

²⁹Abimelek di Abraham: Fok-dimi ma joriyon siɗiya lakŋi naŋ lakam goy valamu kay mige?

³⁰Abraham hot dumu: Fok-dimi namna ma siɗiyan lakŋi naŋ ma yawamu, kay nam lakŋi ma ɗek goy ala kaata na'ta jugoɗa' mi nanu.

³¹Kuɗ kayni liy namna nisi tunum selem ala Ber-Seba, kay kayni mi liyn ma nisi yi va kisi jar-tuwsiya.

³²Nisi jun bonot hay Ber-Seba. Bugol kayni Abimelek hiɗi Pikol ma ŋolla vi sojena valamu fok kulo'o, hotay hay nagata vi Filistina.

³³Abraham pi gu-tumuura hay Ber-Seba; hay liy namna nam yi sem Ma-Vatɗina Lawn Ma-Vatɗin hay vunamu.

³⁴Abraham li ziy hay nagata vi sa Filistin noŋ ta-ta'.