Read Masana CAWA'TA TUNITA 22 Bible Online

CAWA'TA TUNITA 22 - Masana bible

CAWA'TA TUNITA 22

¹Bugol slen kayni, Lawna wak Abraham, nam dumu: Abraham! Nam hot dita: nanis zawni.

²Lawn di'e: Vaŋ goora vaŋ Isaak ma vuɗi kepna ma hayaŋ kalamna, tuɗaŋ hay nagata vi Moriya, ɗawni naŋ ma ŋalam goy ɗifin, kulo kay hiɗiyta ta nan min daŋ ka'ta.

³Abraham fok kulo graw culum culum; gan kurona valamu, yaw sa sunda sara kuɗum ma', vi goora valam Isaak may. Nam mun gu ma ŋal ɗifinna kalamu, kali hay liyn ma Lawn dum kalamna.

⁴Hay buurta ɦidita, Abraham poŋ iram kulo na kayni nam wi liy namna ay goy gine ta'.

⁵Abraham di tam sa sunda valamu: Lakgi tani hiɗi kurona, nan hiɗi goor ma joriyon zawni numa tuɗ goy ɗawni kay li girifta, numa ma hotay katgiya.

⁶Abraham yaw guna ma ŋal ɗifinna, tunum kay goora valam Isaak, kuta hiɗi kewna nam yawam hay ɓalamu may, nisi ma' pet kali kuɗ tuwsiya.

⁷Isaak ka job Abraham ala: Bunu, kuta hiɗi kewn ka'a, may goor ɦu-dimi ma nay lum ɗifinna ka ara mayge?

⁸Abraham hotom dit ala: Awa goora vanu, Lawn kay tuwam ma vulay goor ɦu-dimi ma li ɗifin hiɗi namna. Nisi ma' pet ka tuɗ kuɗ tuwsiya.

⁹Hay li ma nisi co hay liyn ma Lawn dum kalamna cona, Abraham in giwin-ma-ɗifinna kulo'o, jak gun gaa kuɗumu, nam jun goora valam Isaak, burum kulo kay giwin-ma-ɗifinna, kulo kay guna.

¹⁰Abraham meɗ balam goyo, nam sli kewt aya kay ŋat goora valamu.

¹¹Sunda-Wuralawna yumi goy hay wuralawn pa dumu: Abraham, Abraham! Nam hot dit ala: nanis zawni.

¹²Sunda-wuralawna dumu: tun ɓaŋ kat goorɗi, li va talamɗi noŋo, wulin kayn nan waawa ala naŋ li nar kuɗaŋu, kay goora vaŋ ma kaŋ kepna kaw naŋ min telem goy kanɗi.

¹³Abraham poŋ iram kulo'o, ɗuw bugolom na kayni, ɦu-gamalan ka jar gu-biremna zaw, kay miyokom ka slewi tam guna, nam kal but ɦu namna, ŋalam ɗifin baŋal goora valamu.

¹⁴Liy namna Abraham tunum selem ala Jehova-Jire.[8] Kay ta-ta vaydi nisi ka di ala: Lawn kay tuwam ma vul va kulo kay hiɗiyta valamu.

¹⁵Sem ma ma'na lo sunda-wuralawna yi Abraham ay kulo hay wuralawn pa,

¹⁶dum ala: Nan yi va kanu kay tuwanu: Din mi nan Ma-Vatɗina! Kay naŋ li van kayni, goora vaŋ ma kaŋ kepna naŋ may telem goy kanɗi,

¹⁷Nala nan ma gaŋ bolo, nan min biyaŋ jafaŋu ŋolo ki mislek ma dukalawna hiɗi ŋesl ma kel niy-lum ma ŋolla nala, jafna vaŋu ma kol kay sa gawt kisina.

¹⁸Kuɗ jafna vaŋu, sum sa gaa hay nagat noŋ kaf ma fi bolda, kay mige naŋ human vunanu.

¹⁹Abraham hot tam sa sunda valamu, nisi yaway kulo'o kali kuɗ tuwsi hay Ber-Seba, kay Abraham ay musi ziy haya.

²⁰Bugol slen kayni, nisi mar labara tam Abraham ala: Humaŋu, Milka kaw vuɗ guro'o mi ɓasuŋŋa Nakor:

²¹Guro nisin kayni: Ut ma vuɗi jewna, Buz ɓasulumna, Kemuwel bum Aram,

²²Kesed, Hazo, Pildas, Yidlaf hiɗi Betuwel.

²³Betuwel vuɗ Rebekka: Nisi kayni si guro sa glafandi sa Milka vuɗsi mi Nakor ma ɓasum Abrahamna.

²⁴Cata gorvota valamu ya' Rewma: Na' kaw vuɗ Tebak, Gaham, Tahas hiɗi Maaka.