Read Masana CAWA'TA TUNITA 25 Bible Online

CAWA'TA TUNITA 25 - Masana bible

CAWA'TA TUNITA 25

¹Abraham sli cat tara lo ya' Ketura.

²Na' vuɗum Zimran, Yoksan Medan, Madiyan, Yisbak hiɗi Suwah.

³Yoksan vuɗ Seba hiɗi Dedan. Gurona vi Dedan nisi si sum sa Asurimna, sa Letusimna, hiɗi sa Lewmimna.

⁴Gurona vi Madiyan nisi kayni: Efa, Efer, Henok, Abida, hiɗi Eldaa. Nisi kaf kayni si gurona vi Ketura.

⁵Abraham vul farayna valam kaf mi Isaak.

⁶Nam vul sle mi gurona vi boy sa sunumna lay. Hay li ma nam ka iri tuwan kayni, nam gisi irsi goy gine'e hiɗi goora valam Isaak, hay nagat ta gal kuɗuwta.

⁷Busat ma Abraham mus iri hay nagat noŋ pet kayni kis kalam dok-siɗiya yam vasl.

⁸Abraham sukam kal goyo nam mita. Nam mit hay maarta hiɗi sle'ta, busan liy kalam noŋ li, nisi burum gaa'a jar sumuna valamu.

⁹Gurona valamu Isaak hiɗi Ismayel pumu, hay zul-hiɗiyn ma hay Makpelana, hay sinena vi Efron, goora vi Cowar ma Hetiyena ɗiger vok Mamre.

¹⁰Kayni mi sinena ma Abraham gusum hay ɓam gurona vi Hetiyena. Abraham hiɗi Sara cata valam pisi kayn haya.

¹¹Bugol mitta vi Abraham, Lawn gi bol kay Isaak. Nam musi goboy hiɗi kaata vi Lahay-Roy.

¹²Kayni mi jafna vi Ismayel goora vi Abraham, ma Hagar ta Egiptet vuɗumna:

¹³Kayni mi semda vi gurona ki Ismayel: Semda visiya kuɗ vu'da visiya visiya: Nebayot ma vuɗ jewna. Kedar, Adbeel, Mibsam;

¹⁴Misma, Duma, Masa,

¹⁵Hadad, Tema, Yetur, Nafis hiɗi Kedma.

¹⁶Kayni mi semda vi gurona vi Ismayel, kuɗ farana visiya hiɗi vokŋa visiya visiya. Nisi doogo yam ma' kayni ay si sa ŋulona vi sumuna visiya.

¹⁷Ismayel li busat noŋ kaf kis hiɗi diram dok-ɦidi yam siɗiya. Bugol kayni sukka valam kal goyo nam mita. Nisi burum gaa'a jar sumuna valamu.

¹⁸Gurona valamu ziyna visi vunam ay Havila zaw ta-ta Sur, ta ka ɗiger vok Egipte hay ay hagata ta kal Asiriya, ziyna visi cuki goy vok ɓosiyosin kafe.

¹⁹Kayni mi jafna vi Isaak goora vi Abraham.

²⁰Abraham vuɗ Isaak. Hay li ma busata vi Isaak co dok-fiɗi cona, nam sli Rebekka, goota vi Betuwel, ma Arameena, ma hay Padan-Aram na'a ti ɓasum Labanta.

²¹Rebekka ay gediya, Isaak siɗaw Lawn ka'a, Lawn hum siɗawta valamu. Cata valam Rebekka sli haya.

²²Guron tun zaw zut tuwsi kalaf haya'a. Na' di'e; la ki kayn nala, nan sli haya kay mige? Na' kaliya kay job Lawna.

²³Ma-Vatɗin da'a: Jaf-sumun ma' ka hayagu, sum nisi sa ma' hayag lakŋi, hay li ma nisi kaliyawa goyo, nisi ma ɓuraw goyo. Ma kepna ma li ŋol suw hena, ma ŋolla ma hot gaa kuɗ ma goora.

²⁴Buur ma na' min pukŋ coowa; ɗuw na kayn guro ŋonayn ka haya' ma'.

²⁵Ma kali goy jew na tuwam slawi, tuwam ŋusu ki sligar-bakŋa nala. Nisi tunum selem ala Esaw.

²⁶Bugolda ɓasulumna Yakub kal ay goyo, dubuk Esaw moki kalam tep', nisi tunum selem ala Yakub. Hay li ma nisi vuɗ kayni, busata vi Isaak coy dok-karkiya.

²⁷Nisi wuliya, Esaw muɗi mi sa ma ci muura, sana vi sinena. May Yakub mi sa ma kiliŋi. Nam mus kayn gaa kuɗ guɗukŋa.

²⁸Isaak min Esaw, kay nam ti sliw muur kuɗumu; may Rebekka minim mi Yakub.

²⁹Yakub kot tin ma ŋaana, Esaw ay goy hay sinen pa, nam makay ŋolo.

³⁰Nam di tam Yakub: Nan siɗawaŋu, naŋ hinan ti kuɗ va ma iram slawn tani kay nan makaya. Kuɗ na'ta kayni nisi vul semda mi Esaw ala Edom.

³¹Yakub di'e: Naŋ gusan ŋolda vaŋ goy vaydi.

³²Esaw di'e: Nan mit ɗawn mitiya, ŋolda nan lum hiɗi na' mi mige?

³³Yakub di'e: Naŋ ma yi va kaŋ tuwa. Nam yi va kalamu, gus ŋolda valam goy mi Yakub.

³⁴Yakub vul funa hiɗi naayna ma zalayna mi Esaw. Esaw ti'e ci'e kaw, fok malam kulo cuɓaŋ-cuɓaŋ' kaliya. Ki kayn nala Esaw hin ŋolda valam muɗ kiram bisi.