Read Masana CAWA'TA TUNITA 26 Bible Online

CAWA'TA TUNITA 26 - Masana bible

CAWA'TA TUNITA 26

¹Mayta li hay nagata. May ti mayta ta li hay liyna vi Abrahamtaɗi; Isaak kali tam Abimelek mulla vi Filistina hay Gerar.

²Ma-Vatɗin vul tuwam kiramu dumu: naŋ ma kal hay Egipteɗi, naŋ ma mus hay nagat ta nan min ɗekaŋ ka'ta.

³Naŋ ma mus hay nagat na'ta tani, nan ka hiɗi naŋu, nan ma gaŋ bol lay, kay liyn kayni nan min vulum maŋu hiɗi jafna vaŋ kaf. Nan ma hob vun va ma nan yum kan tam buŋ Abrahamna.

⁴Nan ma biyaŋ jafna vaŋu ki mislek ma dukalawn nala; liyn kayn kaf nan ma vulum maŋ naŋu hiɗi jafna vaŋ kaf. Jaf-sumun hay nagat noŋ kaf fi bolda ɗawn kuɗ jafna vaŋu.

⁵Kay Abraham human vunanu: Dita vanu, vun-ma-gatna vanu, sle ma nan colomna hiɗi gatta van kaf nam li kuɗa'a.

⁶Nala Isaak mus hay Gerar.

⁷Hay li ma sum sa hay hoyok-ziyn ka job kay cata valamu, nam ka hotsi dit ala ti ɓasulumta. Kay nam ka li nari, kay la nam daawa ala na' ti cata valamu, sum sa hay hoyok-ziyn ɗawn ma cum goyo kla, kay Rebekka na' ira' kulo tuni jifiy ŋolo.

⁸Kay musta valamu hay liyn kayni ka ɦur voka' dok-dok, fat tara kep Abimelek ɗuw hay ir-ziyda, nam wi kayni Isaak ka liw hiɗi cata valam Rebekka waŋ'.

⁹Abimelek yi Isaak aya, nam dumu: Na' ti cata vaŋ gasi, may naŋ di ala na' ti ɓasuŋga kay mige? Isaak di'e: Nan di nala kayni hiɗi varta ta ala nan ma fi mitta kuɗa' klasige.

¹⁰Abimelek di'e: Hini ne' ɦawa a sa jarma'a bur hiɗi cata vaŋu, goboy a naŋ marma joot kuma'a ɗisu?

¹¹Abimelek vul dit kayni goy tam sumun kaf ala: La sa tun ɓalamawa tam san kayni lebo tam cata valamu, nam ma fi cita-goyta.

¹²Isaak cuk jafna hay nagat na'ta, wan ma nam feɗem hay busat na'tana nam yaw sem kis suwa, kay Ma-Vatɗina gi bol kalamu.

¹³Nam muɗ faraya, farayna valam wul vokomu vokomu, ta-ta nam muɗ faray dono ŋolo.

¹⁴Farana vi faray gurayn ka lay, farana vi faray ŋulon ka lay, sum sa sunumna ŋol lay. Nala sum sa Filistina tun caw lum suluku.

¹⁵Kaara ma sa sunda vi bulum Abraham comisna nisi tosomu, hobom hiɗi nagan kafe.

¹⁶Abimelek di tam Isaak, vaŋ tuwaŋ goy hay nagata vuma'a, kay naŋ muɗi dono suwma'a.

¹⁷Isaak kaliya, nam musi hay boŋoloŋŋa vi Gerar.

¹⁸Kaara ma nisi jugoɗomis hay liyna vi bulum Abraham, ma sum sa Filistin tosom goy bugol mitta vi bulumna, nam hot yawam kulo'o, nam hot yi kaar namna hiɗi semda ma bulum tunumisna.

¹⁹Sa sunda vi Isaak jugoɗ kaata tara'a hay boŋoloŋŋa lo, kaata niya' riŋ goyo.

²⁰Sum sa ŋom fokŋa hay Gerar tun caw nef sa fi Isaakŋa. Nisi di'e: Niyn vuma'a. Kaat na'ta nisi tuna' se' ala Esek, kay nisi nef tuwsi hiɗi namu.

²¹Sa sunda valamu co kaat tara'a lo, nisi nefsi kuɗa' lo, nam tuna' se' ala Sitna.

²²Nam vi tuwam goy hay liy namna, co kaat tara'a lo, kaat na'ta nisi nefem kuɗa' loɗi, nam tuna' se' ala Rehobot, kay nam di'e: Wulin kayn Ma-Vatɗin hinay liynawa hiriŋ-hiriŋ' yo, nay ma li faray ŋolo hay nagat tani.

²³Nam fokays ɗawni kali Ber-Seba.

²⁴Ma-Vatɗin vul tuwam kiram hay henjeta dumu: Nanu mi Lawna vi buŋu Abraham, tuwaŋ li narɗi, kay nan ka hiɗi naŋu; nan ma gaŋ bolo, nan ma biyaŋ jafaŋ ŋolo, kuɗ sa ma sunda van Abraham.

²⁵Nam in giwin-ma-ɗifinna, yi semda vi Ma-Vatɗina, pi guɗukŋ kulo'o, sa sunda vi Isaak jugo' kaar hay liy namna.

²⁶Abimelek coy talamu hay Gerar pa, banamna Ahuzat ka kuɗumu, Pikol ma ŋolla vi sojena valam ka kuɗum kaw.

²⁷Isaak di tisiya: Nigi co kuɗan kay mige? Nigi lakŋi si sum sa kaan gawi, sa digiɗanay goy hay nagata vigi panɗi su?

²⁸Nisi hot dita: Numa waawa ala Lawn ka hiɗi naŋu. Kuɗ kayni numa di ala nay ma yi va kaya jar-tuwaya, numa min ala nay ma junay bonota.

²⁹Naŋ ma yi va kaŋ ala naŋ as luma va ma jooɗi, numa kaw may laŋ va ma jooɗi, numa hinaŋ kali goy kayn hiɗi sle'ta. Wulin kayn naŋ ma sa ma bolda vi Ma-Vatɗin ka kaŋu.

³⁰Nam kotsi tina, nisi ti'e ci'e kaw.

³¹Nisi yaw kulo graw culum culum, nisi yi slen kisiya, jun bonot jar-tuwsiya. Isaak hinsi kala, nisi kali kayn jarsi toyaya.

³²Hay buurta na'ta sa sunda vi Isaak maram labara kay kaata ta nisi jugoɗa'ta. Nisi dum ala na' coy niyo.

³³Nam tun sem kaata na'ta ala Siba, kuɗ kayni hoyok-ziy namna ka yum ala Ber-Seba ta-ta vaydi.

³⁴Esaw busata valam coy dok-fiɗi, nam sli Yudit goota vi Beeri ma Hetiyena, hiɗi Basmat goota vi Elon ma Hetiyena kaw.

³⁵Guro nisina muɗi mi va ma ges dik Isaak hiɗi Rebekka.