Read Masana CAWA'TA TUNITA 27 Bible Online

CAWA'TA TUNITA 27 - Masana bible

CAWA'TA TUNITA 27

¹Isaak tun caw muɗ maari, iram muɗ wi ŋaaɗi, ta-ta nam muɗ wi noŋɗi. Nala nam yi Esaw goora valam ma ŋolla: Nam dumu: goora vanu! Esaw ala nan zawni.

²Isaak di'e: Wulin kayni nan muɗi maari, buur ma mitta co kanna may kiranɗi.

³Wulin kayni naŋ ma gan tuwaŋu, yawaŋ ŋuloŋŋa vaŋu hiɗi ɓarawta, tuɗaŋ goy sine'e, can muuray ci'.

⁴Naŋ ma kotan tina ki nan ka minim nala, naŋ maranta, nan tum ti', kay ciwta vanu ma gaŋ bolo jew a nan mita.

⁵Rebekka hum va ma Isaak di mi goora valam Esaw. Esaw kali fulu, kay gar muura, kay maramu.

⁶Bugolda na' di tam Yakub goora va'a: Humaŋu, nan hum del buŋ ka di tam ɓasuŋŋa Esaw ala:

⁷Tuɗaŋ garan muuru, naŋ kotanta nan ti'e; nan min gaŋ bolo vok Ma-Vatɗina jew mitta vanu.

⁸Wulin kayni goora vanu, humaŋ lawta ta nan daŋgit ɗawni.

⁹Naŋays jar fokŋa, yawan guro fok-meen ay ma', nan min kotaŋ ti namna mi buŋu ki nam ka minim nala.

¹⁰Naŋ ma tuɗ tin namna mi buŋu, kay nam gaŋ bolo jew mitta valamu.

¹¹Yakub hot dit mi sulum ala: Humagu, Esaw tuwan ŋusu, may nan ŋus may tanɗinge.

¹²Kla, la nam taman tuwanawana, nan muɗ kiram ɗawn mi sa ma sini, nan mara' kan ɗawn ti be'da, may ti boldaɗi klasige.

¹³Sulum dumu: Goora vanu, hin beɗ na'ta nig kan nanu, naŋ humaŋgi mi vunanu, naŋays yawaŋ fok namna aya.

¹⁴Yakub kaliya yawam aya, nam maram mi sulumu, hiɗi fok namna, na' kot tin ma ŋaana ki Isaak ka minim nala:

¹⁵Bugol kayni Rebekka yaw sligara vi goora va' ma ŋolla Esaw, sligar ma ŋaana ma ka lakay kulo vo ta'a, na' cukum tam Yakub goora va' ma goora,

¹⁶na' ɗutum bak-fokŋ ɓalamu, ɗutum hen kulo delemu may.

¹⁷Sliwna hiɗi funa ma na' kotomna na' vulum hay ɓam goora va' Yakub.

¹⁸Nam ma tam bulumu ka dumu: Bunu! Bulum ala: Nan waŋŋi, goora vanu, naŋ mi gige?

¹⁹Yakub hot di bulumu: Nan mi Esaw goora vaŋ ŋolla, nan lumi kayn mi va ma naŋ dan kalamna, nan siɗawaŋu kay naŋ ma mus kulo'o, naŋ ma ti sliw muur ma nan kotomina, kay ciwta vaŋ ma gan bolo.

²⁰Isaak di tam goora valamu: Ele! Naŋ fumi gosoy nala su? Nam hot dita: Maram vok iran gosoy mi Ma-Vatɗin Lawna vaŋu.

²¹Isaak di tam Yakub: Naŋay goboy tanu goora vanu, nan tamaŋ tige, kay nan min wi'e la naŋ mi goora van Esaw lebo namɗi su?

²²Yakub ma goboy tam bulum Isaak, Isaak tamam tuwamu di'e: Kayni mi della vi Yakub may kayni mi ɓam Esaw.

²³Nam may wumɗi, kay ɓalam ay ŋusu ki ɓasulumna Esaw nala, nam gum bolo may.

²⁴Nam di'e: Naŋ zawn mi goora van Esaw gasi su? Nam hot dita: Mi nanu.

²⁵Isaak di'e: Naŋ vulan va ma tinay yo, hinan ti kuɗ sliw muura vi goora vanu, kay ciwta van ma gaŋ bolo. Yakub vulum va ma tina, nam ti'e, nam maram vinna kaw, nam ci'e.

²⁶Wulin kayni Isaak dumu: Goora vanu, naŋay yo, bowan kaŋu.

²⁷Yakub ma goboyo, nam bowomu. Hista vi sligara valamu cuk hay cin Isaak; nam gum bolo di'e: Goora vanu his ki sine ma Lawn gum bol nala.

²⁸Lawn ma vulaŋ maɗay ma dukalawn ta, vulaŋ mul-sliw ma gaa kay nagat ta, vulaŋ alkamarena hiɗi vinna ŋolo!

²⁹Sumun ŋolo ma hot yisi gaa kuɗaŋu jaf-sumun ŋolo ma girif gaa vokaŋu! Naŋ ma mus mul kay ɓosiyoŋŋa, gurona vi suŋ ma girif gaa vokaŋu, sa ma laŋ joon nam beɗay goyo, sa ma laŋ ŋaan nam fi boldawa.

³⁰Isaak vunam ma gi bolla vat lay, Yakub kal goy lay kayni, ɓasulumna Esaw ay goy ci muur pa co may.

³¹Nam kaw kot tina, nam maram tam bulumu, nam di tam bulumu: Bunu fokaŋ kulo'o fokge, taŋ sliw muura ma nan cumina, kay ciwta vaŋu ma gan bolo.

³²Bulum Isaak dumu: Naŋ mi gige? Nam hot dita ala nanu mi Esaw goora vaŋ ma ŋolla.

³³Isaak tuwam muɗ jiriyim bat-bat' ŋol suwa. Nam di'e: Sa namna ma ci muura, maranta, kaw kayn mi gige? jew a naŋ co kayni, nan tiya, asaya. Nan gum bolo, bol na'ta ma mus kalam lay.

³⁴Hay li ma Esaw hum dita vi bulum ki kayn nala, nam tun caw tiy ŋolo, dikam ɓulakay ŋolo. Nam di tam bulumu: Bunu, gan bol man nan lay!

³⁵Isaak di'e, ɓasuŋŋa coya hiɗi ɗutta, bolda ta nan min gaŋgita nam yawa'awa goyo.

³⁶Esaw di'e: Wulin kayni nam tayanawa gaa sem ma' kayni kuɗ semda valam ta tuni ala Yabubta su? Nam sli ŋolda vanawa goy kanu, wulin kayni lo nam sli bolda vanawa! Nam di'e: Naŋ may hin bolda tara'a man nanɗi su?

³⁷Isaak hot dita di tam Esaw: wulin kayni nan tunumawa mul kaŋu, ɓosiyomna kaf nan muɗsi sa sunda valamu, nan hobomawa hiɗi alkamarena hiɗi vinna, wulin nan ma laŋgi maŋ naŋ ɗawn meloge goora vanu?

³⁸Esaw di'e: Bunu: Kayn ti bolda vaŋ noŋ ta tuta su? Naŋ gan bol lay bunu. Esaw tiy hiɗi delem kulo ŋolo.

³⁹Bulum Isaak ka dumu: Humaŋu, liyn ma musta vaŋu mul-sliwna ma gaa kay nagatna ma li hayamɗi, maɗay ma may kulo dukalawn pan li hayamɗi kaw.

⁴⁰Naŋ ma ti vunaŋ ɗawn kuɗ kew-gaferaŋa vaŋu, naŋ ma sun ɓasuŋŋa. May hay li ma naŋ poy goy buti ɗaw tani tani, jak ma nekŋa ma nam tunum peleŋŋa naŋ ma gum ɗaw tani goyo.

⁴¹Esaw gi Yakub kalaf hayam kam' kuɗ bolda ta bulum gumtita; Esaw var hay dikam ala: Buur ma tiyna vi bun co ɗawni nan ma ci ɓasunna Yakub goyo ɗisu?

⁴²Law ma Esaw dumna nisi co'o dum mi Rebekka, na' yi Yakub aya dumu: Humaŋu, ɓasuŋŋa Esaw min job yalam taŋu, nam min caŋ goyo.

⁴³Wulin kayni, goora vanu, naŋ ma human vunanu: Fokaŋ kulo'o, piraŋ goy vi ɓasunna Laban hay Karan;

⁴⁴naŋ ma mus talamu ir liyn neeɗa, ta-ta ɦiyda vi ɓasuŋŋa hot gaa tuwa,

⁴⁵ta-ta dikam ma ɦiyna vat goy taŋ tuwa, ta-ta yalam jok va ma naŋ lum talamna, nala nan ma gi sunis kay hotaŋiya. A nan ma hin goy bay gurona van sa ma'na hay fatta kepta kayn ŋaa su?[9]

⁴⁶Rebekka di tam Isaak: Wulin kayni mus ma irin muɗi kiran bisi kuɗ gurona vi Het, la naŋ sli ca jar guro-boyna vi Het ki nisin lakŋ nala, nan mus iri hay nagat tan kayn kay meloge?