Read Masana CAWA'TA TUNITA 28 Bible Online

CAWA'TA TUNITA 28 - Masana bible

CAWA'TA TUNITA 28

¹Isaak yi Yakub, gum bolo, ka dum ala: Naŋ ma sli ca jar guro-boy sa hay Kanaanɗi.

²Fokaŋ kulo'o, tuɗaŋ hay Padan-Aram, hay ziyna vi Betuwel ma bum suŋŋa, naŋ ma sli cat jar gurona vi Laban ɓasum suŋŋa.

³Lawn ma Gaŋeraŋ-Petna ma gaŋ bolo, nam ma hinaŋ vuɗ gurona, biyaŋ ŋolo kaw, kay a naŋ ma muɗ mi bum jaf-sumun ŋolo.

⁴Bolda ta nam ga' mi Abrahamta nam ma vulaŋga ta', vula' mi jafna vaŋ lay, kay a nagat ta Lawn vula'ays mi Abraham, ta naŋ musi haya' wulin ki rogoy nala damni, na' ma muɗ goy vaŋu.

⁵Isaak gi ir Yakub, nan kali hay Padan-Aram, goy vi Laban goora vi Betuwel ma Arameena, namu mi ɓasun Rebekka, sum Yakub hiɗi Esaw.

⁶Wulini Esaw wi ala Isaak gi bolawa kay Yakub, nam gum iramawa hay Padan-Aram kay sli cata, hay li ma nam gum bol kaw nam dum ala nam ma sli cat jar gurona vi Kanaanɗi.

⁷Nam wiyawa kaw ala Yakub humi kuɗ vun bulumu hiɗi sulumu, nam kali hay Padan-Aram kaw.

⁸Nala Esaw wi ala gurona vi Kanaan may kir bulum Isaak ŋaaɗi.

⁹Esaw tun iram kat Ismayel. Nam sli cat tara' ay tam segena. Nam sla' kayni ti Mahalat ɓasum Nebayotta. Na' ti goota vi Ismayel goora vi Abraham.

¹⁰Yakub fokis hay Ber-Seba pa kali hay Karan.

¹¹Nam co hay liyn mara'a, nam bur gaa haya, kay fatta ay ɗigiya, nam sli hiɗiyna, tunum gaa kuɗ yalam ɗigali, nam bur hay liy namna.

¹²Duwayt ka dum ala: Gu-ma-jikŋa vunam piys gaa kay nagat pa, sinem coy ta-ta kulo dukalawna. Nam ɗuw kayni sunda-wuralawna ka jik talamu. Jik misi kulo'o, hotay misi gaa'a.

¹³Ma-Vatɗina ka coli kulo sin gu-ma-jikŋa, nam ka di'e: Nanu mi Ma-Vatɗina, Lawna vi buŋu Abraham, Lawna vi Isaak kaw. Nagat ta naŋ buri ka'ta waŋŋi, nan min vula' maŋ naŋu hiɗi jafna vaŋu.

¹⁴Jafna vaŋu ma li ŋolo ki ŋesl ma gaa kay nagata nala; vun-liyna vaŋ ma kal ta-ta hay gal ma vulatina hiɗi gal ma kuɗuwna, gal ma gaana hiɗi ma kayamna, jaf-sum sa hay nagat noŋ kaf ma fi bolda ɗawn kuɗaŋ naŋu.

¹⁵Humaŋu, nan ka hiɗi naŋu, nan ma ŋomaŋu hay liyn kaf ma naŋ tuɗ haya, nan ma hotaŋay hay nagat tani, nan as hinaŋ goyɗi ta-ta va ma nan daŋ kalamna ma li goyo.

¹⁶Yakub zliy kulo'o hay semda, nam di'e: Dolay nan kiranɗi kayn Ma-Vatɗin ka hay liyn tan gasiya.

¹⁷Nam li nari, nam di'e: Liyn tan sa liwimɗi, ziyna vi Lawn ka tani, vun-galana vi wuralawn ka tani.

¹⁸Yakub fok kulo graw culum culum; nam sli hiɗiy ma nam tunum kuɗ yalam ɗigalla, nam molom kulo ɗiŋiriŋi, nam ɦok mul hay yalam ma kulona.

¹⁹Liyn namna nam tunum selem ala Betel, may hoyok-ziyn yum jew ala Luz.

²⁰Yakub yi va kalamu nam di'e: La Lawn ka hiɗi nanu, la nam ŋoman hay rogoy ta nan la'ta kayni, la nam vulan fu ma ti'e, vulan sligar ma cuk tanu kaw,

²¹la nan hotawa hiɗi sle'ta hay ziyna vi bunu, hay na'ta Ma-Vatɗin ma muɗ mi Lawna vanu.

²²Hiɗiy namna na nan jakam kulo ɗiŋiriŋ zawni ma muɗ mi ziyna vi Lawna, nan ma vulum gal-ma-doogona vi sle ma nam vulanti kafna.