Read Masana CAWA'TA TUNITA 3 Bible Online

CAWA'TA TUNITA 3 - Masana bible

CAWA'TA TUNITA 3

¹May guyna ay hiɗi yalla suw muuriyan ma hay sinen kafe ma Lawn kotomna. Nam di tam cata: Lawn digi gasi ala gun ma hay sinen kaf lakŋi nigi su?

²Cata hot dit tam guyn ala: Numa ti vuɗna vi guna ma ka hay sinena.

³May Lawn di tuma ala: gu ma hay way-sinen zawni nigi tumɗi, tun ɓigi talamɗi lay, kay a nigi ma mitɗi.

⁴Bugolda guyna di tam cata: nigi may mit noŋ ne'ɗi;

⁵may Lawn wi ala, hay buur ma nigi tumawa, irgi ma mal goyo, nigi ma muɗ ki nam nala, nigi as wi ŋaata hiɗi joota.

⁶Cata wi gun kayn nam ŋaa'a; kay ti'e, nam ɗuw kira' jifiy ŋolo kay san fi yal kuɗumu; na' ja vuɗna valamu, tumu may. Bugol kayni na' vul mi jufa'a nam ti'e kaw.

⁷Wulini wulini nisi ma' pet irsi mali goyo, nisi wiyawa ala nisi ka goy nala'a. Nisi ja hum gu-gumna, junum kuɗsi bagasiya.

⁸Hay li ma liyn laawa vulatiya, Ma-Vatɗina ka poy hay sinena. Nisi hum della valamu. Sana hiɗi cata valamu ŋay tuwsi goy gine'e hay vok ir Ma-Vatɗin Lawna, goy jar gu ma hay sinena.

⁹May Lawn Ma-Vatɗin yi sana, nan jobomu: Naŋ ka arige?

¹⁰Sana hotom dita: nan hum della vaŋu hay sinena, nan liy nari kay tuwan goy nala'a, kay na'ta nan ŋay tuwanu.

¹¹Lawna hot jobomu: Sa ma ɗekaŋ ala naŋ coli zawn goy nala'an mi gige? Naŋ ti kuɗ vuɗ-guna ma nan daŋ ala naŋ tumɗin klasige?

¹²San hotom dita: Cat ta naŋ vulantita, na' vulan kuɗ vuɗ-guna, nan tumu.

¹³Lawn Ma-Vatɗina job cata: van kayni nak lumu kay mige? Cat hotom dita: Guyna ɗutanu, nan ti'e.

¹⁴Lawn Ma-Vatɗina di tam guyna: Kay naŋ li van kayni, naŋ beɗay goyo jar muuriyan ma hay sinen kaf, naŋ ma sab hiɗi hayaŋu, hay buura vi irita vaŋ kaf naŋ ma tum mi buɗufna vi nagata.

¹⁵Nan min tun gawt jaraŋ hiɗi na'a, jar jafna vaŋu hiɗi jafna vi cata. Jafna va'a nam ma munaŋ yaŋ goyo, naŋ ma calam dubukamu may.

¹⁶Nam di tam cata: Nak ma ziy guron hayag hiɗi makka ŋolo, nak ma vuɗ guron hiɗi tuw-tita, darta vag ma zutag kat jufagu, may nam ma ti mul kagu.

¹⁷Bugolda nam di tam Adam: Kay naŋ hum kuɗ cata vaŋu, naŋ ti kuɗ gu ma nan vulaŋ gatta kalam ala naŋ tumɗina, kay na'ta nagat beɗay goyo kuɗaŋ naŋu, wulin kayni, hay buura vi irita vaŋ kaf naŋ ma fi tina vaŋ hiɗi zumalda.

¹⁸Nagata ma dayaŋ gu-zigiyna hiɗi olla, naŋ ma tum mi hadaf ma hay sinena.

¹⁹Naŋ ma fi tina vaŋ hiɗi ɦiɓiyn hay vokaŋu, ta-ta naŋ ma hot gaa hay nagata ta naŋ may goy haya' pata. Kay naŋu mi buɗufna, naŋ ma hot hay buɗufna lo.

²⁰Adam tun sem cata valam ala Eva, kay sum sa irin kaf na' ti susiya.

²¹Lawn Ma-Vatɗin kot sligar bakŋa mi Adam hiɗi cata valamu, nisi cukum tisiya.

²²Ma-Vatɗin Lawn di'e, san wulini muɗi ki nay nala, kay nam wi ŋaata hiɗi joota, nala nay ma telemu, hinim a nam meɗ ɓalam goyo yaw kuɗ guna vi irita kay tumu, a mus iri dok-doko loɗi.

²³Kay na'ta Lawn Ma-Vatɗin digiɗim goy hay sinen Edena, kay nam ma zum nagata ta nam may goy haya' pata.

²⁴Ki kayn nala nam digiɗ Adam goyo; hay gal ma kuɗuwna vi sinena nam lak sa kerubena* valamu, nisi ka hiɗi kew-gaferaŋa hay ɓisiya, nam wile'e ki sin-kuta nala, nisi ka ŋom hagata vi guna vi irita.