Read Masana CAWA'TA TUNITA 30 Bible Online

CAWA'TA TUNITA 30 - Masana bible

CAWA'TA TUNITA 30

¹Hay li ma Rakel wi ala na' tay vuɗ guro mi Yakubɗi, na' tun caw li hunay mi ɓasu'ta: Na' di tam Yakub: Naŋ vulan guro'o, la naɗina nan mita.

²Yakub dikam ɓulak ŋolo tam Rakel, nam di'e: Nan telag a vu'ɗi kayn nan mi Lawn su?

³Na' di'e: Bilha goot ta sunanta zaw kaŋŋi, buraŋ ta'a, na' vuɗan goor man nan ɗaw, hinan fi guro man kuɗa'a.

⁴Bilha ta sunda va'a na' vulumti ca'a. Yakub kaliya nam bur ta'a.

⁵Bilha sli haya, na' vuɗ goor mi Yakub.

⁶Rakel di'e: Lawn kan kitata vanawa hay haga'a, kay nam human delanawa, vulan goorawa. Na' tunum selem ala Dan.

⁷Bilha ta sunda vi Rakel sli hay mara lo, na' vuɗ goor mara mi Yakub.

⁸Rakel di'e: ɓasunta nan dura'ti kayn mi duura vi Lawna, may nan kolawa. Na' tunum selem ala Neftali.

⁹Hay li ma Leya wi ala na' may vuɗ loɗi, na' vi ta sunda va' Zilpa, vula' ca mi Yakub.

¹⁰Zilpa ta sunda vi Leya vuɗ goor mi Yakub.

¹¹Leya di'e: Nan fi ŋaatawa yo, na' tunum selem ala Gad.

¹²Zilpa ta sunda vi Leya vuɗ goor mara mi Yakub lo.

¹³Leya di'e: Nan fi sle'tawa yo, kay guro-boyn ma di ala sle'ta kanu. Na' tunum selem ala Aser.

¹⁴Ruben kali goyo hay liyn ma feɗna vi Alkamarena, nam fi vuɗna vi mandragoora[10] hay sinena, nam maram mi sulum Leya. Rakel di tam Leya, nan siɗawagu, mandragoora ma goora vag maram yawn nak vulan mag vulge.

¹⁵Leya da'a: Wulin kayn jufan kag viya, kayn may asagɗi su? lebo nak yaw mandragoora vi goora van lo kayn litige? Rakel da'a: Yo, ŋaa'a, hay henjet ta vaydita nam ma bur hiɗi naku kay vuɗ mandragoora vi goora vagu.

¹⁶Hay li ma Yakub may goy hay sinen vulatit pa, Leya ŋafam iram goy jiya dumu: Vaydi naŋ ma bur ɗawn kalaf kuɗanu, kay nan gusaŋ hiɗi vuɗ-mandragoora vi goora vanu. Hay henjet na'ta nam bur hiɗi na'a.

¹⁷Lawn hum siɗawta vi Leya, na' vi haya, na' vuɗ goor ma vaslna mi Yakub.

¹⁸Leya di'e: Lawn wurakanawa yo, kay nan vul goota ta sunanta mi jufanu. Na' tunum selem ala Isakar.

¹⁹Leya sli hay mara lo, na' vuɗ goor ma karkiyana mi Yakub.

²⁰Leya di'e: Lawn lan vuldawa yo; wulin ɗawn jufan ma mus hiɗi nanu, kay nan vuɗum guron karkiya noŋo. Na' tunum selem ala Zabulon.

²¹Bugol kayni na' vuɗ goot-cat kep lo, na' tuna' semda va' ala Dina.

²²Lawn humam gum kay Rakel; nam hum siɗawta va'a, muɗa' vuɗa.

²³Na' sli haya, na' vuɗ goor kepe, na' di'e: Lawn yaw zulota vanawa goyo.

²⁴Na' tunum selem ala Yosef, na' di'e: Lawn vulan goor mara vul loge.

²⁵Hay li ma Rakel vuɗ Yosef vuɗna, Yakub di tam Laban: Naŋ hinan tuɗa, kay nan min tuɗ hay nagata vanu.

²⁶Naŋ ma vulan boyna vanu hiɗi gurona vanu sa nan sunaŋ kisina, kay nan min tuɗa; kay naŋ wi lop ŋol ma nan laŋgina.

²⁷Laban dumu: Hinan fi slugota kuɗaŋ fige. Nan wi goy ŋaa ala Lawn gan bol kayn kuɗaŋ naŋu;

²⁸naŋ ma tunan wurakŋ kanu, nan min vulaŋga.

²⁹Yakub dumu: Naŋ wi'e, nanige nan sunaŋu, hiɗi nanu farayna vaŋ muɗi ir nanige.

³⁰Kay faray ma ay hay ɓaŋ ne' jewanna muɗi ŋolo, Lawn gaŋ bol kayn kuɗan nanu, wulin kayn nan li lop kay ziyna van kay tuwan ɗawn citige?

³¹Laban di'e: Nan ma vulaŋgi mi mige? Yakub hot dumu: Naŋ may vulan vaɗi, la naŋ min li kuɗ va ma nan min daŋgin ɗawni, nan min ŋom farayna vaŋ mara'a lo.

³²Vaydi nan min poy jar farayna vaŋ kaf, fok ma tuwam jarayna hiɗi ma tuwam zlubara hiɗi ma tuwam wuran kaf naŋ ma lakam goy valamu, jar fokŋa vaŋ kaf kayni ma tuwam jarayna hiɗi ma tuwam zlubara nam mi wurakŋa vanu.

³³Gasita van ma li di-goyt kanu hay jifinta, hay li ma naŋ coyawa ɗuw wurakŋa vanu na, faray ma tuwam jarayɗi lay, zlubarɗi lay, wuraɗi layna, la nam ka jar fok-meena vanu hiɗi guro fok-dimina vanu ni, nan kulum kayn kuliya.

³⁴Laban di'e: Kayn ŋaa'a. Van ma li'e ki naŋ di nala.

³⁵Hay buur na'ta de, fok-ŋekŋa ma tuwam jarayna hiɗi ma tuwam zlubara, hiɗi ma tuwam haɓ ne' ne'na, hiɗi fok-dimina ma tuwam wurana kaw, Laban poŋom iram goyo. vulum hay ɓam gurona valamu.

³⁶Nam kalam hay liy ma jaram hiɗi Yakub tuɗ ir buur hiɗi; Dir farayna vi Laban ma hinina Yakub ŋomom may.

³⁷Yakub kus ɓam-gu ma goɗina vi gu-ziŋitna, gu-amandena hiɗi gu-riginna, nam hom ɓulokom goyo, ɓulok haɓ ma kalaf tam gun nam hinim yalam goy ɦawa'a.

³⁸Bugol kayni ɓam-gu ma nam hom tuwam goyna nam lakam hay dutay ma farayn ci niyna, hiɗi palkamna goy hay ir farayn ma co ci niyna, kay hay liy ma nam coowa ci niyna, nam ma fil tuwamu.

³⁹Farayn fil tuwam kulo goboy tam gu namna, tuwam ɗo jaraya, zlubari hiɗi sergeɗe.

⁴⁰Yakub ka ir guro fokŋ goyo, ma tuwam jarayna hiɗi ma tuwam wurana nam lakam jar farayna vi Laban. Ki kayn nala nam poŋ ir farayna valam goyo, nam min tapam jar fi Laban loɗi.

⁴¹Hay li ma fok ma ŋulona tun caw fil hen kayni, Yakub lak ɓam-gun hay dutayna, kay farayn wumu, kay nam fil tuwan kulo goboy tam ɓam-guna.

⁴²Hay li ma nam wi ala fok-dimin kayn ŋokaya, nam may bur ɓam-gun vokomɗi. Nala fok ma ŋokayna nam muɗ vi Laban may, ma ɗorayna nam vi Yakub may.

⁴³Yakub muɗ faray ŋol suwa, faray ma gurayna nam fum ŋolo, sunda sa jufayna hiɗi sa boyn kaw nam fisi ŋolo, lamgana hiɗi kurona kaw.