Read Masana CAWA'TA TUNITA 31 Bible Online

CAWA'TA TUNITA 31 - Masana bible

CAWA'TA TUNITA 31

¹Yakub hum dita ta gurona vi Laban ka da' ala: Yakub yaw slena vi buyawa kafe, wulini nam muɗi faray ŋol kayn hiɗi slena vi buya.

²Yakub ɗuw Laban kayni, dik Laban may buti goy talam ki jew nala loɗi.

³Bugol kayni Ma-Vatɗina di tam Yakub, wulin kayni hotaŋ hay nagata vi sumiyaŋu, hay nagata ta naŋ vuɗi haya' pata, nan ka hiɗi naŋu.

⁴Yakub yi Rakel hiɗi Leya aya, kay nisi ka goy kuɗ farayna. Valam hay sinena.

⁵Nam di tisiya: Bugi nan ɗuwum kayni, dikam may buti goy tan ki jew nala loɗi; may Lawna vi bunu nam ka hiɗi nanu.

⁶Nigi kay tuwgi kaw wi ala bugiya nan sunum kayn hiɗi donota van noŋ kafe.

⁷May bugi ɗuwan ki va ma liw nala, wurakŋa vanu nam muɗum muɗ muɗ sem doogo. May Lawn may malam hagat kay nam lan va ma jooɗi.

⁸Hay li ma nam di ala fokŋ ma jarayna nam vanu, fokŋ kaf vuɗ gurona valam kayn jaraya, hay li ma nam di ala, fok ma tuwam zlubara nam vanu, fokŋ kaf vuɗ gurona valam kayn tuwam zlubari.

⁹Lawn yaw farayna vi bugiya, nam vulanta.

¹⁰Hay li ma fokŋ ka fila, nan poŋ iran kulo kayni, duwayt dan ala fok-gamalana ma ka fil ma boyn kayni tuwam jaraya tuwam zlubari lebo sergeɗe.

¹¹Nala sunda-wuralawna di tan hay duwayt ala: Yakub, nan hot dit ala nanis zawni.

¹²Nam di tanu: Poŋaŋ iraŋ kulo'o ɗuwaŋu: fok-gamalana ma ka fil fok-meen kaf kayni nam jaraya, zlubari hiɗi sergeɗe, kay slen kaf ma Laban ka li taŋu nan wumawa.

¹³Nanu mi Lawna vi Betel, liyn ma naŋ ɦok mul kay liyn ma ɗiŋiriŋŋa, liyn ma naŋ yi va kaŋŋa. Wulin kayni fokaŋ kulo'o, kalaŋ goyo hay nagat kayni, hotaŋ hay nagat ta naŋ vuɗi haya'ta.

¹⁴Rakel hiɗi Leya hot dit talam ala: Numa'a ir faraya lebo voco vuma ka hay ziyna vi buma'a lo su?

¹⁵Numa wulin kayn kiram ki sum sa pul naɗi su? Kay nam gusma goy gusu, faray ma kuma'na ti kalam ti' lay ɗisu?

¹⁶Faray ma Lawn yawam goy hay ɓam buma' kafn kayni nam vuma'a hiɗi gurona vuma'a. Wulin kayn slen ma Lawn daŋgi kafna naŋ ma lumu.

¹⁷Yakub fok kulo'o, boyna valamu hiɗi gurona valamu nam ɓesi kay lamgana.

¹⁸Farayna valamu hiɗi slena valamu, ma nam fum hay Padan-Aram noŋ kaf nam yawamu, tun iram kat bulum Isaak hay nagat Kanaan.

¹⁹Hay li ma Laban kali goy ka ɗuŋus fok-dimina valam goy kayni, Rakel kul lawayna valam bugolom yilak'.

²⁰Nala Yakub ɗut Laban ma Arameena, kay nam may dum kay pirta valamɗi.

²¹Nam piriya, hiɗi slen ma ir valamna kafe, nam fokay kulo'o, ɦaw niy-lumn kulo'o, tun iram kat hiɗiyta vi Galaad.

²²Hay buurta hiɗit kayni, labar co tam Laban ala Yakub pirawa.

²³Laban yaw ɓosiyomna kuɗumu, nam tuɗ ir buur siɗiya kay slum selemu nam fum kay hiɗiyta vi Galaad.

²⁴May Lawna vul tuwam kir Laban ma Arameena hay duwayta hay henjeta; ka dum ala: Laŋ ŋali, naŋ ma di va ma joo'o mi Yakubɗi.

²⁵Laban co tam Yakub, Yakub vi guɗukŋa valam kulo kay hiɗiyna; Laban hiɗi ɓosiyom sa kuɗumna kaw vi guɗukŋa visi kulo kay hiɗiyt Galaad.

²⁶Laban di tam Yakub, naŋ lum nala kayn mi mige? Naŋ ɗutan kay mige? Naŋ kali hiɗi gurona vanu ki sum sa naŋ yawsi ay vun duura hiɗi kew-gaferaŋa nala kay mige?

²⁷Naŋ piray goy ŋayaya kay mige? La naŋ ɗutan ɗutiɗi, dan di goy jeweni, nan hinaŋ kal ɗawni hay firita hiɗi nulla, hay cina vi darayna hiɗi dilla.

²⁸Naŋ may hinan hagat kay nan fet yam gurona van goy noŋɗi, naŋ lum kayn mi law ma ɦay-ɦaya.

²⁹Donota van ka'a kay laŋ va ma joo'o, may Lawna vi buŋu dan henjet a la: Laŋ ŋali kay naŋ ma li va ma joo'o tam Yakubɗi.

³⁰Wulin kayn naŋ kaliyawa, kay laata vi ziyna vi buŋ ka caŋu, Lawayna van naŋ kulumi kay mige?

³¹Yakub hot di mi Laban: Nan ka hiɗi narta hay dikanu, kay nan var ala naŋ ɗawn ma yaw gurona vaŋ goy hay ɓan klasige.

³²May sa ma naŋ fi lawayna vaŋawa hay ɓalamuna, nam ma ti mitta! Vok ɓosiyay sa ka tani kaf naŋ ma fek sle ma ir vaŋŋa ma ka hay guɗukŋa vanu, yawaŋga. Kay Yakub may kiram ala sle namna kulumi ti Rakeleɗi.

³³Laban kal kalaf hay guɗukŋa vi Yakub, hay guɗukŋa vi Leya hay guɗukŋa vi boy sa sunda sa ma'na, nam may fi vaɗi. Nam kali goy hay guɗukŋa vi Leya pa kal kalaf hay guɗukŋa vi Rakel.

³⁴Rakel yaw laway namna, na' lakam gaa kuɗ jaŋayna vi lamgana, na' mus kulo kalamu. Laban sar hay guɗukŋ kaf, nam may fi vaɗi.

³⁵Rakel di tam bu'a: Mulanna, dikaŋ muɗ ɦiyɗi, nan min fok kulo vokaŋɗi kayn kay slena vi boyn ka tanu. Nam gara gara, may nam fi lawaynɗi.

³⁶Yakub muɗ ɦiya, nam tun caw nef Laban: Nam sli ditiya di tam Laban: Nan cum mat vaŋ mi gige? nan laŋgi joon mi mige? Naŋ garan hiɗi dikaŋ noŋ pet kayn kay mige?

³⁷Hay li ma naŋ fek slena van kaf kayni, naŋ fi sle vaŋ hay ziyna van su? Vulaŋ sle namna goy kir ɓosiyoŋŋa hiɗi ɓosiyonna, kay nisi ma di lawta ta jarayta.

³⁸Nan li busat dok-ma' hay ziyna vaŋu, fok-dimina hiɗi fok-meena vaŋu may suroɓ goy noŋɗi, fok-gamalana ma ka jar farayna vaŋu nan mutum noŋɗi.

³⁹Fok ma muuriyan jetemi goyna nan may maraŋgaɗi, kay nan kay tuwanu ka wurakaŋga, faray ma nisi ka kulum kan falayta hiɗi henjeta naŋ ka jobom tanu.

⁴⁰Hay falayta fatta ka waranu, henjeta sle'na ka roŋanu, senda iran may wa'ɗi.

⁴¹Wulini nan li busatawa dok-ma' hay ziyna vaŋu; nan laŋ lop hay busat doogo yam fiɗi kay gurona vaŋ sa ma'na, nan laŋ lop kay farayna vaŋ busat karkiya', wurakŋa van naŋ muɗum muɗ muɗ sem doogo.

⁴²Lali Lawna vi bunu Lawna vi Abraham, namu ma Isaak li nar kuɗumna ay hiɗi nanɗi, naŋ gan irani ɗawn goy hiɗi ɓan ɦawa kiɗaŋ-kiɗaŋ'. Lawn wi lasta vanu hiɗi lop ma nan lum hiɗi ɓanna, kay na'ta kamata nam ka kitata valamawa.

⁴³Laban di tam Yakub: oyn lakŋi si gurona vanu, gurosgurayn lakŋi si gurona vanu, farayn tani mi farayna vanu, slen ma naŋ wum kafn lakŋi nam vanu, wulin nan as lum tam gurona vanu hiɗi gurona visi sa nisi vuɗsin ɗawn mi meloge?

⁴⁴Naŋaya junay bonota, jaraŋ naŋ hiɗi nanu, kay kayni ma li ti di-goyta jaraŋ naŋ hiɗi nanu.

⁴⁵Yakub yaw hiɗiyna, nam jakam kulo yam tuwam ɗiŋiriŋi.

⁴⁶Yakub di tam guro-biyomna, yawgi hiɗiyn aya, nisi yawamiya. Nisi molom kulo'o, nisi ti kulo kay hiɗiy namna.

⁴⁷Laban tun sem liy namna ala Jegar-Sahaduta, Yakub tunum selem ala Galed may.

⁴⁸Laban di'e: Hiɗiy ma molay yam tuwam tani nam ma li di-goyta jaran hiɗi naŋu. Kuɗ kayni nisi tunum selem ala Galed.

⁴⁹Nisi tunum Selem lo ala Mispa, kay Laban di'e: Lawn ma ŋomaŋ naŋ lay ŋoman nan lay hay li ma iray muɗ wi tuwam loɗin ɗawni.

⁵⁰La naŋ las gurona vanu, la naŋ kal yaw boy sara'a lo, wi jaray ɗawn mi sa loɗi, laŋ ŋali, li di goyt jaraŋ naŋ hiɗi nan ɗawn mi Lawn kay tuwamu.

⁵¹Laban di tam Yakub: Humaŋu, zawni mi hiɗiy ma nan molom kulo ɗiŋiriŋ jaraŋ hiɗi nanu.

⁵²Hiɗiy ma nay inim kulo ɗiŋirin zawni ma li di-goyt jaray ala nan as jik goy bugolomu kay kalis kataŋɗi, naŋ kaw as jik goy bugolomu kay kali katanu kay lan jooɗi lay.

⁵³Lawna vi Abraham hiɗi Nakor, Lawna vi busiya ma ka kitat jaraya. Yakub yi va kalamu hiɗi semda vi nam ma Isaak li nar kuɗumna.

⁵⁴Yakub li ɗifini kulo kay hiɗiyna, nam yi guro-biyomniya kay ti'e, nisi ti'e, cap bur kulo kay hiɗiyta.