Read Masana CAWA'TA TUNITA 32 Bible Online

CAWA'TA TUNITA 32 - Masana bible

CAWA'TA TUNITA 32

¹Laban fok kulo graw culum culum, nam fet yam gurona valam goyo, gisi bolo. Bugol kayni nam hot hay ziyna valamu.

²Yakub sli hagata valamu; sunda-wuralawna ŋaf hiɗi namu.

³Hay li ma Yakub wumu, nam di'e: Kayni mi liyn ma musta vi Lawna. Liyn namna Yakub tunum selem ala Mahanayim.

⁴Yakub cuk sa sunda vokomu tam ɓasulumna Esaw, hay Seyir, hay nagata vi Edom.

⁵Nam di tisiya: Nigi ma di tam mulanna Esaw ala: Sa ma sunda valam Yakub ka dumis ala: Nan li ziy ay goy vi Laban, nan ay musi ɗawni ta-ta vaydi;

⁶Luwayna van ka lay, kuron ka lay, fok-dimin ka lay, sa sunda sa jufayna hiɗi sa boyn ka lay, nala nan gi sundis tam mulanna kayn kay nan ma fi slugot vok iram fige?

⁷Sa sunda hotay tam Yakub, nisi di'e: Numa tuɗi kat ɓasuŋŋa Esaw; nam ka tuɗi kiraŋu, hiɗi sumun kuɗum kis-fiɗi.

⁸Yakub tuwan muɗ nar, ŋolo, sutiyam to'o, sum sa ka kuɗumna hiɗi luwayna, hiɗi fokŋa hiɗi lamgana nam ɓurawsi irsi goy ma'.

⁹Nam di'e: La Esaw coyawa, vok hena nam mokomawa ci sumunawa ni, hena ma hinna ma suɗ tuwamu.

¹⁰Yakub di'e: Lawna vi bunu Abraham, Lawna vi bunu Isaak, Ma-Vatɗina, ma dan ala hotaŋ hay nagata vaŋu ta naŋ vuɗi haya'ta, nan min laŋ ŋaa'a!

¹¹Nan kiɗay goyo tam slugota hiɗi gasita ta naŋ la' tam sa ma sunda vaŋu; kay nan ɦaw niy-lumna Yordan ay kulo'o hiɗi zugulda vanu, wulin kayni nan min poŋ vokŋa van goy ir ma'.

¹²Nan siɗawaŋu, naŋ ma butan goy hay ɓam ɓasunna Esaw butge, kay nan ka li nari kay nam ɗawn ma co calan goyo, guron hiɗi sumaysi lay.

¹³Kay naŋ di'e: Naŋ min lan ŋaa'a, naŋ min biyan jafan ki ŋesl ma goloŋ kel niyna nala, naŋ min lan jafan ŋolo ta-ta sa fi a ŋaɓamɗi.

¹⁴Yakub bur hay liy namna. Nam yaw kuɗ sle ma ka hay ɓalamna kay li vulda mi Esaw ɓasulumna.

¹⁵Nam yaw fok-mee ma boyna kis-ma' hiɗi fok-ŋekŋ dok-ma', fok-dimi ma boyna kis-ma' hiɗi fok-gamalan dok-ma'.

¹⁶Lamga ma boyn dok-ɦidi hiɗi gurona valam ma ci miir kuɗumu. Luway ma boyn dok-fiɗi hiɗi luway ma jufayn kuɗum doogo. Kuro ma boyn dok-ma' hiɗi kuro ma jufayn kuɗum doogo.

¹⁷Nam vulum hay ɓam sa sunda valamu, poŋom iram goy valamu valamu, nam di tam sa sunda valamu: Tuɗgis vokanu, nigi ma hin jar farayn poŋi goy valamu valamu.

¹⁸Sa ma tuni vokŋa nam ka dum ala: Hay li ma ɓasunna ŋafaŋawa, la nam joboŋawa ala naŋ mi sana vi gige? Naŋ min tuɗ arige? Farayn vokaŋ kayn vi gige ni,

¹⁹naŋ ma hot dit talam ala: Mi farayna vi Yakub ma sunda vaŋu, kayni ti vulda ta nam ga'ay tam mulanna Esaw, nam kay tuwam kaw ka tuɗi bugolma ɗaw.

²⁰Nam vul dit kayni hay vun sa ma ma'na, ma ɦidina hiɗi nisi kaf sa ay bugol farayna ala nigi ma di tam mulamna Esaw ki kayn nala, hay li ma nisi ŋafawa hiɗi namuna.

²¹Nigi ma di ala: Ɗuwaŋu sa ma sunda vaŋu Yakub kaw ka tuɗi bugolma ɗaw. Kay nam ka di tuwam ala: Nan ma basam dikam gaa'a hiɗi slen ma nan min vulumta ma ka tuɗ vokan kayni, bugolda ɗawni nan ma wum iramu, nam ma van hiɗi firit klasige.

²²Sle namna ma nam vulumna tunis vokomu; hay henjet na'ta nam bur hay guɗukŋa.

²³Hay henjet na'ta nam fok kulo'o, yaw boyna valam sa ma'na, boy sa sunda valam sa ma'na, hiɗi gurona valam sa doogo yam kepna, nam haw giɗer Yabok kulo'o.

²⁴Nam yawsiya, haw niy-lum ma riŋŋa kulo hiɗi nisiya, slena valam kaf nam ɦawam kulo'o.

²⁵Yakub hin musi valam kepe, nala san kep ŋaf hiɗi namu, ta-ta goboy liyn fo goyo.

²⁶Hay li ma san kayni wi ala nam as kol kay Yakub loɗi, nam ci Yakub hay cilwamu, Yakub cilwam ɦuroɗa hay li nam ka ŋaf hiɗi san kayni.

²⁷San kayni di'e: Naŋ hinan tuɗa kay liyn cal ɗawn goyo. Yakub dumu: La naŋ bay gan bolo, nan as hinaŋ tu'ɗi.

²⁸San jobomu: Seŋ anige? Nam ala yan Yakub.

²⁹Nam dum lo ala: Vok ɗawni semda vaŋ may Yakub loɗi, may ma yaŋ ala Israyel, kay naŋ ŋaf hiɗi Lawna, hiɗi sumun lay, may naŋ kola.

³⁰Yakub jobom ala: Nan siɗawaŋu, naŋ ma ɗekan kay semda vaŋu. Nam hot dita, naŋ joban semda van kay mige? Nam gum bolo hay liy namna.

³¹Yakub yi sem liy namna ala Peniyel, kay nam di'e: Iran wi Lawnawa goy haraŋ puɗak', may ciwta van suɗi goyo.

³²Fatta day kulo'o hay li ma nam jik goy kay Peniyel, nam ka tuɗ dirlaya kay cilwamu.

³³Ta-ta vaydi kaw gurona vi Israyel may mut sutay ma tam ciliwnɗi, kay Lawn ci Yakub kayni kay sutayna valam ma kay cilwamna.