Read Masana CAWA'TA TUNITA 33 Bible Online

CAWA'TA TUNITA 33 - Masana bible

CAWA'TA TUNITA 33

¹Yakub poŋ iram kulo'o, nam ɗuw kayni, Esaw ka co'o, hiɗi sumuna valam kuɗum kis-fiɗi. Nam ɓuraw guron goy jar Leya, Rakel hiɗi boy sa sunda sa ma'na.

²Boyna valam sa sunda nam zlarsi goy voko hiɗi guro-misina, bugolda nam zlar Leya hiɗi gurona va'a, bugol kayni nam zlar Rakel hiɗi Yosef bugolo may.

³Nam kay tuwam kal goy voksiya, nam girif gaa kay nagat sem siɗiya ta-ta hay li ma nam co goboy tam ɓasulumna.

⁴Esaw fokay jaŋi kay ŋaf hiɗi namu, nam bowomu, vum delemu, nisi ŋaf vun-tuwsiya, nisi tiya.

⁵Esaw poŋ iram kulo'o, nam wi boyna hiɗi gurosgurayna, nam di'e: Nisi lak kuɗaŋŋi si sarige? Yakub hot dita: Lakŋi si guro sa Lawna vulsi mi ma sunda vaŋŋa.

⁶Boyna valam sa sunda co'o, nisi hiɗi gurona visi kaf girif gaa'a;

⁷Leya hiɗi gurona va' kaw co'o, nisi girif gaa'a kaw, bugol kayni, Yosef hiɗi Rakel co'o, nisi girif gaa'a.

⁸Esaw di'e: Faray ŋol ma nan ŋafamna kayni naŋ naram mi gige? Yakub hot dumu: Kay fi slugota vok ir mulanna.

⁹Esaw di'e: Ɓasunna, nan kaw slena van ka ŋolo, ŋomaŋ slena vaŋ maŋu.

¹⁰Yakub hot dumu: May naɗi, nan siɗawaŋu, la nan fi slugotawa hay vok iraŋ gasiya ni, slen ma nan vulaŋgin kayn naŋ ma vumu; kuɗ kayni nan ɗuw vokaŋ kayn nam ki vok Lawn nala, kay naŋ van hiɗi firita.

¹¹Vulda ta nan vulaŋga kayni naŋ ma va' vige. Kay Lawn hoban hiɗi slugota, kay va ma kiɗanu may loɗi. Yakub so tuwam tam Esaw ta-ta nam vi vulda na'ta.

¹²Esaw di'e: Tuɗaya, tunay goy hay hagata; nan min tun vokaŋu.

¹³Yakub hot dumu: Mulanna, naŋ wi ala gurosgurayn kayn nisi maŋaya. Lo fokŋa hiɗi luwayna ma guron kuɗum ci miira ka kanu kaw; la nan tuɗum gosoyo hay fatta kepta ɦawa, farayn vat ɗawn goy kafe.

¹⁴Mulanna, tuɗaŋis maŋ jew sa ma sunda vaŋu, nan ma tuɗis man ŋali, tunis bugol farayna hiɗi gurosgurayna, nan nilamsis man ŋali ŋali, ta-ta nan ma coys goy vi mulanna hay Seyir.

¹⁵Esaw di'e: La nala nan hin gal sumuna van sara'ays kuɗaŋ neɗe'. Yakub di'e: Kayn kay mige? Hinan fi slugota vok iraŋu tuta, mulanna.

¹⁶Hay buur na'ta Esaw sli hagata kal hay Seyir.

¹⁷Yakub kali hay Sukkot, nam in ziy malam namu, vi guru mi luwayn kaw. Kuɗ na'ta liyn namna nisi yum ala Sukkot.

¹⁸Hay hotta vi Yakub hay Padan-Aram pa kayni, nam co hiɗi sle'ta hay hoyok-ziyn Sikem, hay nagat Kanaan. Nam vi guruna valam goy voro.

¹⁹Gal sinen ma nam vi guɗukŋa valam hayamna nam gusum hay ɓam gurona vi Hamor ma bum Sikemna, nam gusa' ir kesita* kis kep.

²⁰Nam in giwin-ma-ɗifin kulo hay liyn namna, nam tunum selem ala El, mi Lawna vi Israyel.