Read Masana CAWA'TA TUNITA 34 Bible Online

CAWA'TA TUNITA 34 - Masana bible

CAWA'TA TUNITA 34

¹Dina goot-cata ta Yakub vuɗa' kay Leyata kali goyo kay ɗuw guro-boy sa hay nagatna.

²Sikem goora vi Hamor yerimana vi nagata iram tun ka'a, nam moka' dono'o, bur hiɗi na'a, ɓulaka'a.

³Dikam jun dono ŋolo tam Dina goota vi Yakub; goot-cat kayni nam mina' ŋolo ta-ta nam fi law ma haya'na.

⁴Nam di tam bulum Hamor: Goot-cat kayni naŋ jobaŋ ka'a nan min sla'a.

⁵Yakub hum labara ala goota valamu ɓulakay kay Sikem. Hay na'ta gurona vi Yakub ay goy sine kuɗ luwayn tuwa. Yakub min di vaɗi ta-ta nisi co tuwa.

⁶Hamor bum Sikem co tam Yakub kay dum law na'ta.

⁷Gurona vi Yakub hotay vo'o kuɗ luwayn pa, hay li ma nisi hum labar namna; diksi ɓulaka, nisi muɗ ɦiy ŋolo, kay Sikem lum kayni mi law ma yawi hay Israyel, kay nam bur hiɗi goota vi Yakub, kayni mi va ma as a liɗi.

⁸Hamor sli ditiya: Goora van Sikem dikam juni dono ŋolo tam goota vigiya, nan siɗawgiya kay nigi ma vulumti ca'a.

⁹Jungi bonot hiɗi numa'a; nigi vulma guro-boyna vigiya, nigi kaw yaw guro-boyna vuma'a.

¹⁰Nigi as li ziy hiɗi numa dari, nagat waŋŋi ka hay ɓigiya, lakgi haya'a, ligi filiwna, figi farayn ŋol lay.

¹¹Sikem di tam bum-goota hiɗi ɓosiyo'na: Hinan fi slugota vok irgi fige, nala la nigi jobanti mige kaw nan ma vulgita.

¹²Nigi joban faray ma ɗumna ŋolo, joban sle ma vul ɦawan ŋol lay, nan min vulgi sle ma nigi dan kalamna kafe; may goot-cat kayni nigi ma vulanti ca'a.

¹³Gurona vi Yakub hot dit mi Sikem hiɗi bulum Hamor; nisi hot dit ta mileta kay Sikem ɓulak ɓasusit Dina goyo.

¹⁴Nisi disiya: Kayni may mi va ma numa as a lumɗi, a vul ɓasuma'ta goy mi sa ma bay ka gosayna, kayn mi law ma kuma ir zulo'o.

¹⁵La nigi min ala numa hum kuɗ dita vigiya, nigi kaw ma muɗ ki numa nala, kayn di ala sumuna vigi sa jufayn kaf ma ka gosaya.

¹⁶Nala numa ma vulgi gurona vuma'a, numa kaw ma yaw gurona vigiya, numa as li ziy hiɗi nigi dari, nay ma muɗ goy mi jaf ma kepna may.

¹⁷May la nigi min hummaɗi, la nigi min ka gosayɗi, numa vi goota vuma'a, numa kalma'a.

¹⁸Lawta visi cuk kuɗ hay Hamor hiɗi goora valam Sikem.

¹⁹Sa ma joriyon kayni min vi yalam kay li law na'ta loɗi, kay nam min goota vi Yakub. Hay ziyna vi bulum kayni sumun kaf slum yalam kulo'o.

²⁰Hamor hiɗi goora valam cuk goy hay vun-galana vi hoyok-ziyna, nisi ka di tam sum sa hay hoyok-ziyn ala:

²¹Sumun kayni min lak hiɗi naya hay sle'ta; nay hinsi lak hay nagata, hinsi li filiwi, nagat ka hiriŋ-hiriŋ' a nisi lak haya'a, nay as yaw gurona visi boy may naya, nay as a vulsi gurona vay lay.

²²May sum nisin kayni la nay min ala nisi lak hiɗi naya, a nisi muɗ goy jaf ma kepna hiɗi naya kayni, say sumuna vay sa jufayn kaf ma ka gosaya ki nisi nala kaw.

²³Farayna visiya, slena visiya hiɗi luwayna visi noŋ kaf ma muɗ ir vayaɗi su? Nay ma vi dita visiya, kay nisi lak hiɗi naya.

²⁴Sum sa co tok hay vun-galana vi hoyok-ziyn kaf hum dita vi Hamor hiɗi goora valam Sikem; sum sa jufayn kaf ka gosaya, kayn di ala sum sa co hay vun-galana vi hoyok-ziyn kafe.

²⁵Hay buurta ɦidita, hay li ma nisi ka ci las ŋolo kayni, gurona vi Yakub sa ma'na: Simeyon hiɗi Levi sa ɓosiyom Dina, yaw kew-gaferaŋa visi hay ɓisiya, nisi mok hoyok-ziyna, sum sa hay hoyok-ziyn may varay ala law ma fisiyaɗi, may nisi ci sum sa jufayn goy kafe.

²⁶Hamor hiɗi goora valam Sikem kaw nisi cisi goyo, nisi kal hay ziyna vi Sikem, nisi vi Dina, bugolda nisi cukay goyo.

²⁷Gurona vi Yakub kaf mok sum sa tuwsi fi milla, nisi vurum hoyok-ziyna, kay sumun kayni ɓulak ɓasusita.

²⁸Nisi yaw farayna vi sum nisina, luwayna hiɗi kurona, slen ma hay hoyok-ziyna hiɗi ma ay goy hay sinena kafe.

²⁹Farayna vi sum nisina nisi vurumum kafe, boyna visiya hiɗi gurona visiya, hiɗi slen ma ka hay ziyna kafe.

³⁰Ki kayn nala Yakub di tam Simeyon hiɗi Levi: Nigi viyan liynawa kiranu, kay nigi muɗanawa bisi kir sum sa hay nagatna, kir sum sa Kanaaniyana hiɗi sum sa Feresiyena. Nanu sumuna van kiɗaya; wulin ɗawn nisi ma tok tuwsi kay mokonu, vatan jafan ɗawn goyo, nan hiɗi ziyna van noŋ kafe.

³¹Nisi hot dumu: Basuma'ta san as lasa' ki na' ti cata-viyuwta nala kayn as su?