Read Masana CAWA'TA TUNITA 35 Bible Online

CAWA'TA TUNITA 35 - Masana bible

CAWA'TA TUNITA 35

¹Lawna di tam Yakub: Fokaŋ kulo'o, tuɗaŋ hay Betel, musaŋ ɗawni; ɗawni naŋ ma in giwin-ma-ɗifinna mi Lawn ma vul tuwam kiraŋŋa hay li ma naŋ pir kay ɓasuŋŋa Esaw.

²Yakub di tam sum sa hay ziyna valamu hiɗi nisi sa ka kuɗum kafna, Lawayn ma pulla ma ka jargin kaf nigi ma cukum goyo, ligi tuwgi goy peldete, muɗgi sligar ma cuki tigina.

³Nay min fok kulo'o, kay nay min kal hay Betel, ɗawni nan min in giwin-ma-ɗifinna tam Lawna, nam ma hum siɗawta vanu hay li ma nan ka vun-zlata, nam ma ay hiɗi nanu hay rogoyta van ta nan la'ta kafe.

⁴Lawayn ma pulla ma ka hay ɓisin kaf nisi vulum mi Yakub, hiɗi tuju ma humna kafe, Yakub pum gaa kuɗ gu-terebintena* ma ka goboy hiɗi Sikem.

⁵Bugol kayni nisi kaliya, narta vi Ma-Vatɗina nig kay hoyok-ziyn kaf ma ka ŋuyi tisi goboyna, sumun kayni may jaŋ kuɗ gurona vi Yakub loɗi.

⁶Yakub hiɗi sum sa kuɗumna kaf co hay Luz ta ya' Betel, hay nagat Kanaan.

⁷Nam in giwin-ma-ɗifinna hay liyn namna. Liyn namna nam tunum selem ala El-Betel; kay kayni mi liyn ma Lawn vul tuwam kiramu hay li ma nam pir goy kay ɓasulumna.

⁸Debora ta sunda vi Rebekka mita; nisi pa' hay Betel, gaa kuɗ gu-ma'asna ma nisi tunum selem ala «gu-ma'as ma tiyna».

⁹Bugol hotta vi Yakub hay Padan-Aram, Lawna vul tuwam kiram lo, nam gum bolo.

¹⁰Lawn dumu: Semda vaŋu Yakub, may nisi ma yaŋ Yakub loɗi, may semda vaŋ ma muɗ ala Israyel. Nisi vulum semda ala Israyel.

¹¹Lawn dumu: Nanu mi Lawna ma Gaŋeraŋ-Petna. Vuɗaŋ guro'o, biyaŋ ŋolo, jafna ma ŋol suw kaf ma may goy hayaŋ pa, muliyana ma vuɗay goy hay naŋ pa.

¹²Nan ma vulaŋ nagata ta nan vula' mi Abraham hiɗi Isaak, nagat na'ta nan min vula' mi jafaŋ ma bugolaŋŋa.

¹³Lawna kali kulo'o, goy hay liy namna pa bugol nam kus yoboyn hiɗi Yakub kusna.

¹⁴Yakub in liyn ma ɗiŋiriŋŋa kulo'o, hay liyn ma Lawn law hiɗi namna. Yakub jak hiɗiyn kulo kay tuwamu, nam ɦok sle ma vulda kalamu, ɦok mul kalam lay.

¹⁵Liyn namna ma Lawn law hiɗi namna Yakub tunum selem ala Betel.

¹⁶Nisi yaways hay Betel pa; liyn hini voksi gine neeɗa kay co hay Eufrata, hay na'ta Rakel puka, pukka sla' vuna' ŋolo;

¹⁷hay li ma na' ka tiy kay pukka kayni, cat ta puk-boyna da'a: Tuwag li narɗi, kay goor mara ka hayag lo.

¹⁸Hay li ma sukka va' ka kal goyo, kay na' ka mita, na' tun sem goor namna ala Ben-Oni; may bulum tunum selem ala Benyamin.

¹⁹Rakel mita, nisi pa' hay hagata vi Eufrata ta ya' Betlehemta.

²⁰Yakub mola' yam-usa' kulo ɗiŋiriŋi, yam-usa' ma moli kulo ɗiŋiriŋŋa ta-ta vaydi kaw nam ka zaw.

²¹Israyel kaliya, nam vi guɗukŋa valam goy bugol Migdal-Eder.

²²Hay li ma Israyel ka musi ziy hay liy namna kayni, Ruben kaliya, nam bur hiɗi Bilha, cat ta gorvota vi bulum Israyel. Bulum hum labar namna. Gurona vi Yakub noŋ kaf ay doogo yam ma'.

²³Gurona vi Leya: Ruben; goor ma vuɗi jewna vi Yakub, Simeyon, Levi, Yuda, Isakar hiɗi Zabulon.

²⁴Gurona vi Rakel: Yosef hiɗi Benyamin.

²⁵Gurona vi Bilha ta sunda vi Rakel: Dan hiɗi Neftali.

²⁶Gurona vi Zilpa ta sunda vi Leya: Gad hiɗi Aser, nisi kayni si gurona vi Yakub sa nam vuɗsiyay hay Padan-Aram.

²⁷Yakub co tam bulum Isaak hay Mamre, hay Kiryat-Arba, ta ya' Hebron, liyn ma Abraham hiɗi Isaak li ziys hayna.

²⁸Busata vi Isaak li noŋ pet kis hiɗi diram dok-glafandi.

²⁹Sukam kal goyo nam mita. Nisi pum jar sumuna valamu, nam mit kayn viy busay takay-takay'. Gurona valam Esaw hiɗi Yakub pumu.