Read Masana CAWA'TA TUNITA 37 Bible Online

CAWA'TA TUNITA 37 - Masana bible

CAWA'TA TUNITA 37

¹Yakub li ziy hay Kanaan, kayni ti nagata ta bulum ays musi haya'ta.

²Kayni mi jafna vi Yakub. Hay li ma busata vi Yosef co doogo yam siɗiya, nam ka ŋom farayna hiɗi guro-biyomna; nam ka kuɗ tuwsi hiɗi gurona vi Zilpa hiɗi gurona vi Bilha, boyna vi bulumu. Law ma nisi dum joona nam ka tuɗ dum mi bulumu.

³Israyel min Yosef suw gurona valam segen kaf, kay nam vuɗum kayni hay maarta valamu; nam kotom sligara ma tuwam jaray ŋolo.

⁴Guro-biyom segena vi ala bulum minim suwsi nisi kafe, nala nisi kaam gawi, min ka kasla ma ŋaa'a hiɗi nam loɗi.

⁵Yosef duwayt dumu, nam da' goy mi guro-biyonna, nal nisi kaam gaw suwa.

⁶Nam ka disi ala humgi duwayt ta dumta natige:

⁷Nay ka goy sine'e kay jun alkamarena, ɗuw ma kayni, ma nan junumna col kulo'o, figi nigin ŋuyumu, girif gaa vokomu.

⁸Guro-biyomna dumu: Naŋ ma ti mul kuma'a su? Lebo naŋ ma muɗ ma ŋolla vuma'a su? Nala nisi kaam gaw ŋol suwa kuɗ duwayta ta dumta hiɗi law ma nam ka dumna.

⁹Duwayt tara'a dum lo, nam da' goy mi guro-biyomna. Nam ka disi ala duwayt tara danawa lo: Nan wi fatta hiɗi tilla hiɗi mislekŋa doogo yam kep ka girif gaa vokanu.

¹⁰Nam da' goy mi bulumu hiɗi guro-biyomna. Bulum lawam ɦiya, ka dum ala duwayt na'ta ta daŋga cawa' min ɗek mige? Naŋ min ala nan hiɗi suŋu hiɗi guro-biyoŋŋa numa nays girif gaa vokaŋ su?

¹¹Guro-biyomna tun caw lum hunoyo, may bulumu yalam may jok kay lawt kaynɗi.

¹²Guro-biyom Yosefna kal goy hay Sikem, kay ŋom farayna vi busiya.

¹³Israyel di tam Yosef: Guro-biyoŋŋa ka goy Sikem ŋom farayna ɗisu? Naŋaya, nan min gaŋ kuɗsiya. Nam hot dit ala nan humiya.

¹⁴Israyel di tam Yosef: Nan siɗawaŋu: tuɗaŋ saray guro-biyoŋŋa tige: La nisi ka ŋaa'a, Farayn kaw ka malam ŋaa'a ni, naŋ ma hotan labariya. Nam gum kayn hay liyn ma lokŋa vi Hebron; Yosef kal hay Sikem.

¹⁵San fum goy hay sinen gar kila'. San ka jobom ala naŋ garam mige?

¹⁶Yosef hot dita: Nan gar guro-biyonna. Nan siɗawaŋu naŋ dan kay liy ma nisi ka ŋom farayn hayamna tige.

¹⁷San ka dum ala nisi say tan loɗi, kay nan humsi law lak' ala tuɗay hay Dotan. Yosef kali kuɗsiya, nam fisi hay Dotan.

¹⁸Nisi wumi goy gine'e pa Jew a nam co tisi goboy kayni, nisi ŋra vunsiya kay cum goy mati,

¹⁹nisi ka di jar-tuwsi ala: Bum duwayt ɗaw tuɗayni.

²⁰Wulin kayn nigiyaya, caygit goyo, gaygit hay kaar lakŋi; nay ma di ala muur ma siy mutumawa, la duwayta valam muɗ muɗtige kaw nay ma wi'e.

²¹Ruben hum labar namna, nam hulotom goy hay ɓisiya. Nam disiya, nay ma cum goy matɗi.

²²Ruben disiya, ɦokgi busuw goyɗi, nigi ma gum hay kaata ta hay fulda zawni; tungi ɓigi talamɗi. Nam ka gar kay butum goy hay ɓisiya, kay hotom tam bulumu.

²³Hay li ma Yosef co tam guro-biyomna, nisi fokom sligara valam ma talamni goyo, sligar namna ma cuki talamna tuwam ɗoy ŋolo.

²⁴Nisi vumu, gum hay kaata, kaat na'ta goy soya, kay niy may haya'ɗi.

²⁵Bugolda nisi lakay gaa'a yam tuwsiya kay ti'e. Nisi cuk irsi goy na kayni, irsi wi sum sa Ismayella ka tuɗay hiɗi lamgan zaw. Nisi may goy hay Galaad pa; lamgana visi ay hobay hiɗi urdi ma hisna ma yum aromatna; ma kor-tuwna[11] hiɗi ma yum mirr, nisi ka naram hay Egipte.

²⁶Yuda di tam guro-biyomna: Nay ci goor-buyn goyo, ŋayam busuwam gaa kaw kayn nay fum kuɗum mi mige?

²⁷Nigiyaya, gusaygit goy hay ɓam sum sa Ismayella, caygit goyɗi, kay nam mi goor-buyna, nam mi sliway naya. Guro-biyomna hum lawta valamu.

²⁸Hay li ma sa li filiwna sa Madiyanna ka capa, nisi sli Yosef ay goy hay kaata, nisi gus Yosef goy hay ɓam sa Ismayella ir gurjuta sikel* dok-ma', sum nisina kalam hay Egipte.

²⁹Ruben hotay vun-kaata; nam ɗuw na kayni Yosef may hay kaata loɗi. Nam jet sligara valam goyo,

³⁰nam hot tam guro-biyomna ka di'e: Goor may loɗi, nanu nan ma li linige?

³¹Nisi yaw sligar-tuwna vi Yosef, nisi ci ɦuna, cuk sligar hay busuwna.

³²Sligara ma tuwam ɗoy dak-dakŋa nisi jokom mi busiya, kay di busi ala; sligar cani numa fumiya, saraŋgi tige, nam mi sligara vi goora vaŋ lebo namɗi su?

³³hay li ma Yakub wi sligar namna, nam di'e: Hih! yawn mi sligara vi goora vanu, muur ma siy mutumawa, Yosef jetay goy kay muura.

³⁴Nam jet sligara valam goyo, jun sligar-bolla furamu, tun sligar hayamu, nam ti do'ol goora valam ir buur ŋolo.

³⁵Guro malam sa jufayna hiɗi sa boyna kaf co'o kay teŋem iramu; may nam min vi teŋ-irta noŋɗi. Nan di'e: Nan min mit gaa kuɗ goora van hiɗi do'olla. Nam ka ti do'ol goora valamu.

³⁶Sum sa Madiyanna gus Yosef goy hay Egipte hay ɓam Potifar ma ŋolla vi sojena sa ŋom mulla Farawn.