Read Masana CAWA'TA TUNITA 38 Bible Online

CAWA'TA TUNITA 38 - Masana bible

CAWA'TA TUNITA 38

¹Hay li namna kayni, Yuda ja jaram goy hiɗi guro-biyomna, kal goy tam sa ma hay Adullam yum Hira.

²Ɗawni Yuda wi goota vi sa ma Kanaaniyana yum Suwa, nam sla' ca'a, nam bur ta'a.

³Na' sli haya, vuɗ goor kep, na' tunum selem ala Er.

⁴Na' vi hay mara lo', na' vuɗ goor mara'a, tunum selem ala Onan.

⁵Na' vuɗ goor mara lo, na' tunum selem ala Sela; hay li ma na' vuɗumna, Yuda ay goy hay Kezib.

⁶Yuda sli cat mi goor malam ma ŋolla ma yum Er, cat na'ta ya' ala Tamar.

⁷Er goora vi Yuda ma ŋolla nam kir Ma-Vatɗin suluku, nala Ma-Vatɗin cum goy mati.

⁸Nala Yuda di tam Onan: Tuɗaŋ buraŋ kat cata vi basuŋŋa, naŋ ma musa'a, vuɗaŋ jaf hay sem ɓasuŋŋa.

⁹Hay li ma Onan wi ala jaf ma vuɗ'n ɗawni may hay selem namɗi, hay li ma nam ka bur tam cata vi ɓasulumna, nam hin tuwam day goy gaa butuwu, kay nam min ala goor ma vuɗ hay baŋal ɓasulumnaɗi.

¹⁰Va ma nam lum ki kayn nana firi Ma-Vatɗinɗi, nala Ma-Vatɗin cum goy mati.

¹¹Nala Yuda di tam kunomta Tamar: Musag duhulu hay ziyna vi bugu, ta-ta goora van Sela muɗ ŋol tuwa. Nam di nala kayni kay tuwam ka li nari ala Sela ɗawn ma mit ki ɓosiyomna nala klasige. Tamar kaliya, na' mus hay ziyna vi bu'a.

¹²Buur kali ŋolo, cata vi Yuda, goota vi Suwa mitawa. Hay li ma tiyna va' vatawa, Yuda hiɗi banamna Hira ma Adullamna kali hay Timna kuɗ sum sa ka ɗuŋus fok-dimina valam goyna.

¹³Nisi co di Tamar ala: Humagu, kunogŋa ka co kulo hay Timna kay ka ɗuŋus fok-dimina valam goyo.

¹⁴Na' fok sligara va' ma duhulla goy ta'a, na' bar sligar ta'a, ŋay tuwa'a, na' mus goy vun hagata ta hay Enayim, hay hagata vi Timna. Kay na' wi ala Sela muɗi ŋolo, may nisi may vula' ca malamɗi.

¹⁵Hay li ma Yuda wa'a, nam var ala na' ti cata gawlaŋga, kay ya' ay baraya.

¹⁶Nam co ta'a hay hagata ka di ta'a: Hinan bur tagu. Kay nam may wi ala na' ti kunomtaɗi. Na' dumu: Naŋ bur tan ɗawni, naŋ wurakanti mi mige?

¹⁷Nam di ta'a: Nan ma jokag goor ɦu-meena ay kepe jar farayna vanu. Na' dumu: Naŋ as deŋan va mara'a jew a naŋ jokomay su?

¹⁸Nam di ta'a: Nan as deŋakgi ɗawn mi mige? Na' di'e: Naŋ ma vulan tuju ta keleŋga hiɗi jaɓ ma kuɗa'na hiɗi zugul ma ka hay ɓaŋ kayni. Nam vula'ta. Nam bur ta'a, na' cap vi haya.

¹⁹Na' fokay kulo'o kaliya; sligar ma baray ta'na na' fokom goyo, hot cuk sligara va' ma duhulla.

²⁰Yuda jok goor hu-meen ay hay ɓam banamna ma Adullamna a nam naram mi cata kay yawam slena valam ma nam deŋa'tinay goyo. May nam fi catɗi.

²¹Nam job sum sa hay liy namna ala: Cata ta gawlaŋga ta ka coli hay hagata vi Enayimta ka wulin arige? Nisi di'e: Gawlaŋ may co tan sem kep noŋɗi.

²²Nam hot tam Yuda dumu: nan may fa' noŋɗi. Sum sa hay nagat kaw di ala gawlaŋ tay hoyok-ziyna visi noŋɗi.

²³Yuda di'e: Hina' ŋom sle namna, muɗay tuway a sumun panayɗi. Kay nan gaŋ hiɗi goor ɦu-meena, may naŋ fa'ɗin tuta.

²⁴Til ɦidi bugolda, sumun co di Yuda ala: Kunoŋga Tamar li tuwa'awa goy gawlaŋi, ɗuwaŋu, kuɗ tuwa' ma na' lum gawlaŋŋa wulini na' viy haya. Yuda di'e: Vigit goy jiya, ŋalgit goyo.

²⁵Hay li ma nisi va'a kay ŋala' goy kayni: na' ka di tam kuno'na ala: Van hay mi mul slen yawni; nan siɗawaŋu, naŋ ma ɗuwum tige, tujuta hiɗi zigew ma kuɗa'na hiɗi zugul kayni mulamna mi gige?

²⁶Yuda wumu, nam di'e: Nan joo'o suwa' na'a, kay nan min vula' mi goora van Selaɗi. Nam min bur ta' mara loɗi.

²⁷Hay li ma liyna vi pukka va' coowa, ɗuw na kayn guro-ŋonayn ka kalaf haya' ma'.

²⁸Hay li ma na' ka puka, hena kal ɓalam ay goy jewe; cata ta puk boyn vum ɓalamu, junum zigew ma slawn ɓalamu, na' di'e: Kayn kali goy jewna.

²⁹May nan hot ɓalam kulo'o. Ɓasulum hena kali goy jewemu. Cat ta puk boyn di'e: Naŋ hawami baŋa marige? na' tunum selem ala Peres, min di'e: Haw baŋana.

³⁰Bugolda ɓasulumna ma nisi jun zigew ma slawn hay ɓalamna kali goyo. Nisi tunum selem ala Zerak.