Read Masana CAWA'TA TUNITA 39 Bible Online

CAWA'TA TUNITA 39 - Masana bible

CAWA'TA TUNITA 39

¹Nisi kal Yosef hay Egipte. Potifar ma ŋolla vi sojena sa ŋom mulla Farawn ma Egipten gusumu hay ɓam sa Israyella sa tuɗum ɗawni.

²Lawn Ma-Vatɗina ay hiɗi namu, kay bolda vi Lawn tap kuɗumu; nam ay musi hay ziyna vi mulamna, sa ma Egiptena.

³Mulamna wi ala Lawn ka hiɗi namu, kay slen kaf ma nam ka lum hiɗi ɓalamna Ma-Vatɗin ka gi bol kalamu.

⁴Yosef fi slugot vok ir mulamna, nam tunum kay li lopna valamu, tunum kay ziyna valamu, slena valam noŋ kaf nam hinimti hay ɓalamu.

⁵Hay li ma Potifar tunum kay ziyna valamu hiɗi slena valam kaf tunna, Lawn gi bol kay ziyna vi sa ma Egiptena kuɗ Yosef; bolda vi Ma-Vatɗina mus kay slena valam noŋ kaf, la mi ziyna la mi sinena kaw.

⁶Slen ma ir valamna kaf nam hinim hay ɓam Yosef, hin hay ɓalam kayn mi fun ma nam dom kulo vunamna tuta. Yosef kayni, nam wuli kulo fiyoko, nam jifiy ŋolo kaw.

⁷Bugol slen kayni cata vi mul Yosefta ira' vumu, na', ka dum ala: Buraŋ hiɗi nanu.

⁸Nam minɗi. Nam di tam cata vi mulamna: Wulin kayni hay ziyn tani, mulanna may var kay slen ma nam hin hay ɓanu noŋɗi, slen ma ir valamna kaf nam vulumawa hay ɓanu.

⁹Hay ziyn tani nam may ŋol suwan nanɗi, sle hena nam may telan kalam noŋɗi, may ti nak kepe, kay nak ti cata valamu. Joota ta ŋol ki kayn nala nan as la'ɗi, nan as li suluk kat Lawnɗi.

¹⁰Buurta kaf na' ka di Yosef, may nam minɗi, nam min bur hiɗi na'ɗi, min tap hiɗi na'ɗi.

¹¹Fat tara kep nam kal kalaf hay ziyna kay li lopna valamu, sum segen a sa vona kaf say hay liy namnaɗi,

¹²na' vi vun sligara valamu ka dumu: Buraŋ hiɗi nanu, nam hina' sligara valam hay ɓa'a, pir malam goy jiya.

¹³Hay li ma na' wi ala nam hin sligara valamawa, may nam kay tuwam piri goy jiya,

¹⁴na' yi sum sa vo hay ziyna, na' ka disiya: Duwgi tige, nam mar sa ma Hebren kayni kay liw hiɗi naya. San kayni co garanu kay bur hiɗi nanu; may nan siwel hiɗi delan kulo ŋolo.

¹⁵Hay li ma nam wi ala nan ka siwel hiɗi delan kulo ŋolo, nam hin sligara valam lak' goy galanni, piri goy jiy jaŋi.

¹⁶Na' lak sligara vi Yosef kata' laki, ta-ta jufa' co vo'o.

¹⁷Nala na' ka dum ala: Gorvona vaŋ ma Hebrena ma naŋ maramna co tan tani kay liw hiɗi nanu.

¹⁸Hay li ma nan siwel hiɗi delan kulo ŋolo, nam hin sligara valam gaa tanu pir goy jiy jaŋi.

¹⁹Hay li ma nam hum dita ma cata valam dum ala: Kayn mi va ma sa ma gorvona vaŋ lum tanu, nam muɗ hiy dono ŋolo.

²⁰Nam vi Yosef, gum daŋgaya, hay liyn ma sa daŋgayna vi mulla ay duki hayamna. Nam musi ɗawni, hay daŋgayna.

²¹Ma-Vatɗina ay hiɗi Yosef, nam li ŋaata valam talamu. Nam hinim fi slugota vok ir sa ma ŋolla vi ziyda daŋgayna.

²²Ma ŋolla vi daŋgayna hinsi kaf hay ɓam Yosef kay nam ma ŋomsiya; lop ma nisi lum ɗawn kaf dum lawam mi namu.

²³Mulla vi daŋgayna may gar a wi sle ma nam hinim hay ɓam Yosefna noŋɗi, kay Ma-Vatɗina ay hiɗi namu, slen kaf ma nam ka li'e, Ma-Vatɗin ka gi bol kalamu.