Read Masana CAWA'TA TUNITA 40 Bible Online

CAWA'TA TUNITA 40 - Masana bible

CAWA'TA TUNITA 40

¹Bugol slen kayni, sa ma kot dolayn mi mulla hiɗi sa ma kot tin mi mulla li va ma joo'o kat sa ma ŋolla visiya, mulla vi Egipte.

²Farawn muɗ ɦiy ŋolo kat sa ŋulon ma' lakŋi, ma ŋolla vi sa kotom dolayna hiɗi ma ŋolla vi sa kotom tina.

³Nam cuksi kalaf hay ziyna vi ma ŋolla vi sa ŋom daŋgayna, hay ziyn ma daŋgayna ma Yosef ka ti daŋgayn hayamna.

⁴Ma ŋolla vi sa ŋom daŋgayna vulsi hay ɓam Yosef, Yosef ka sunsiya. Nisi lakay hay daŋgayna ir liyn neeɗa.

⁵Hay henjet kepe, sa ma kot dolayna vi mulla hiɗi ma kot tina vi mulla sa ay duki hay daŋgayna, duwayt disi vun tuwsi kafe, gigekaw min hum caw falamta goy kay tuwamu.

⁶Yosef co katsiya hay graw culumta, nam ɗuwsi kayni, voksi turkusiya.

⁷Nala sa ŋulona vi mulamna sa ka hiɗi nam hay daŋgayna nam jobsi ala: Vaydi nigi ka hiɗi vokgi turkusiya kay mige?

⁸Nisi hotom dita: Duwayt duma'a, may sa ma duma'ta cawam goy mayɗi. Yosef disiya: Ma da' dira' goyna mi Lawn kepɗi su? Nigi dan duway na'ta ay tige.

⁹Ma ŋolla vi sa vul dolayn mi mulla di caw duwayta valam mi Yosef. Nam ka di'e: Duwayt dan kayn ala nan wi gu gulda-guldan goy vokan zaw.

¹⁰Gu gulda-gulda namna ɓalam ɓetay goy ɦidi. Hay li ma nam wulawa, nam ɓo'o, vuɗna valam niy goyo.

¹¹Tasata vi Farawn ay hay ɓanu. Nan yaw vuɗna vi gulda-guldana, nan keslem hay tasata vi Farawn, nan vul tasat na'ta hay ɓam Farawn.

¹²Yosef dumu: Caw duwayt na'ta kayni: Ɓam gulda-gulda ma ɦidin kayni mi buur ma ɦidina.

¹³Hini buur ɦidi, Farawn ma slaŋ kulo'o, ma hot musaŋ hay lopna vaŋu; naŋ ma hot vul tasata hay ɓam Farawn lo, ki naŋ ka li jewe hay li ma naŋ ay li lop ma kot dolayna nala.

¹⁴May hay li ma naŋ hotawa hay sle'tana, humaŋ ma gaaŋ kan gi ge. Nan siɗawaŋu kay naŋ ma di law ma ŋaan kanu, naŋ ma di yoboy ma ŋaan kanu vok Farawn, naŋ ma kalanis goy hay ziyd zawn kalge.

¹⁵Kay nanu, nisi kulani kayn goy hay nagata vi sa Hebren pa, tan kaw nam may li va ma joo'o ma nan as ti daŋgay kalamɗi.

¹⁶Ma ŋolla vi sa kot funa wi ala Yosef di caw duwayt goy hay liya'a, nam di'e: Nan kaw, duwayt dan ala: Zlarakŋ hiɗi ka lakay kulo kan lak', hiɗi fu ma haɓna hayamu.

¹⁷Hay zlarakŋ ma kulo fiyok suwna, tin ma koti mi Farawn ka hayam kuɗ jafam pete, ɗiliy hay kuta; layayn ka tum kulo kan hay zlarakŋa.

¹⁸Yosef hot dita di'e: Caw duway na'ta kayni: Zlarakŋ ma ɦidin kayn mi buur ma hini ɦidina.

¹⁹Hini buur hiɗi, mulla Farawn ma kaŋ yaŋ goyo, ma balaŋ kulo kat guna, layayn ma taŋ sliwaŋu may.

²⁰Co hay buurta ɦidita, hay buurta vi vu'da vi Farawn kayni, nam li yuldeta kay sa sunda valam kafe, ma ŋolla vi sa kot dolayna hiɗi ma ŋolla vi sa kot funa, nam slisi yisi kulo'o jar sa sunda valam kafe.

²¹Ma ŋolla vi sa kot dolayna nam hot tunum hay lopna valamu, kay nam ma tun tasata gaa vok Farawn lo.

²²May ma ŋolla vi sa kot funa nam ɓalam kulo kat guna, ki Yosef di caw duwayt goy nala.

²³Ma ŋolla vi sa kot dolayna min var kay Yosef loɗi, yalam jok Yosef goyo.