Read Masana CAWA'TA TUNITA 41 Bible Online

CAWA'TA TUNITA 41 - Masana bible

CAWA'TA TUNITA 41

¹Bugol busat kal ma' kayni, mulla Farawn duwayt dumu ala: nam ka coli goboy hiɗi niy-lumna.

²Nam ɗuw na kayni, luwayn siɗiya, ma ɗoriya ma ɗuw jifiy ŋolo jikay goy hay niy-lumna pa, tun caw ti hatna kel niyna.

³Luway hen siɗiya ɗuw lo'ot ŋolo ŋokay kaw, jikay kulo bugolomu, goy hay niy-lumna pa, nam lak goy galamu, goy kel niy-lumna.

⁴Luway ma siɗiya ma lo'otna ma ŋokayna lig luway ma siɗiya ma duw ŋaana ma ɗorayna. Farawn zliy kulo hay senda.

⁵Nam hot nig sen lo, duwayt tara'a dum lo: Nam wi yam-wan siɗiya: ŋulo'o, jifiy kaw day kulo hum zok-wata ta kepta pa.

⁶Yam wa hena siɗiya guray ɗiweŋ-ɗiweŋ', yalam goy waray ki simeɗ ma may kuɗuw pana, nam day kulo bugolda.

⁷Wan ma yalam guray ɗiweŋ-ɗiweŋŋa lig wa ma ŋulona ma niyiy ŋaana. Farawn zliy kulo may. Kayni ti duwayt ta dumta.

⁸Hay li ma liyn fo goyo, Farawn dikam may tun suk loɗi. Nam gi sun kay sum sa li gul-yalda hiɗi sum sa wi-yalla hay Egipte kafe. Farawn visi sem duwayta ta dumta goyo, may sa ma as dumti cawa' goyo may noŋɗi.

⁹Nala ma ŋolla vi sum sa ket dolayn mi mulla sli ditiya di tam Farawn: Vaydi human ganawa kay joo ma nan li'e.

¹⁰Bur mara'a Farawn dikam ɓulak kat sa sunumna; nam gan daŋgaya hay ziyna vi ma ŋol ma ŋom sa daŋgayna, nanu hiɗi ma ŋolla vi sa kot tin mi mulla.

¹¹Hay henjet tara kepe duwayt duma vun tuwma ca; gige-gige jarma'a fa' cawa' ma di di goyna ŋray ca ki duwayta ta dumta nala.

¹²Goor-joriyo ma Hebren ka hay liy namna kepe, namu mi gorvona vi ma ŋolla vi sa ŋom mulla. Numa vum sem duwayt ta duma'ta, nam duma'ta cawa' goyo.

¹³Van li'e ki nam duma caw duwayt goy nala, Farawn hotan hay lopna vanu, ma ŋolla vi sa kot tina nam ɓalam kulo tam guna may.

¹⁴Mulla Farawn gi sunda kay gar Yosef, nisi kalamay goy hay ziy ta daŋgayna gosoy na kay', nam wel yalam goyo, cuk sligar mara'a, kali kat mulla Farawn.

¹⁵Farawn di tam Yosef: Duwayt danu sa ma danti cawa' goy may noŋɗi. Nan hum ala la san vaŋ sem duway ta dumtawa, naŋ da' cawa' goyon litige?

¹⁶Yosef hot di Farawn ala, may mi nanɗi. Mi Lawna ma as di caw duwayt goy hay liya'a mi Farawn.

¹⁷Wulini Farawn di tam Yosef: Duwayt dan kayn ala nan ka coli kel niy lumna zaw.

¹⁸Duw na kayni, luway ma ɗorin siɗiya ma ɗuw ŋaa'a, jiki goy hay niy lumna pa, tun caw ti hatna kel niy-lumna.

¹⁹Luway hegen siɗiya jikay kulo bugolom pa, luway namna ŋokaya, ɗuw lo'ot ŋolo, sliw may talam noŋɗi, hay Egipte noŋ kaf nan bay wi luway ma ŋolay ki kayn nala tuwa.

²⁰Luway ma lo'otna ma sliw may talamɗina lig luway ma ɗori ma siɗiyana, ma kali goy jewemna.

²¹Nam ligim kalaf hayam kaf, san as wi ala nam ligi kalaf hayamu noŋɗi; kay nam hini dok-dok lo'ot ki nam ay jew nala. Bugol kayni nan zliy kulo'o.

²²Hay duwayt lo nan wi yam wan siɗiya, ir hayam hobiya, jifiya kaw, nam day kulo hum zok-wata ta kepta.

²³Yam-wa hena siɗiya lo, ir may hayamɗi, guray ɗiweŋ-ɗiweŋ, ŋalay goyo kay simeɗ ma may gal kuɗuw pana, nam day kulo bugol hena.

²⁴Yam wa ma ŋokayna lig yam wa ma ŋaana ma siɗiyana may. Nan vi caw duway na'ta mi sum sa li gul-yalda, may sa may danti cawa' goy noŋɗi.

²⁵Yosef di tam Farawn: Duwayt daŋ kayni kay va kepe; Lawn ɗekem kiraŋ kayn mi va ma nam min lumna.

²⁶Luway ma ŋaana siɗiya kayni ti busat siɗiya, yam wan ma ŋaan siɗiya kayni ti busat na'ta ta siɗiyat lay. Kayn ti duwayta na'ta kepta.

²⁷Luway ma siɗiya ma sliw may talamɗi, joo'o kaw, ma jikay kulo'o bugol ma jewna, kayni ti busat siɗiya, yam-wan ma siɗiya ma ir may kiramɗi, ŋalay goyo kay simeɗ ma may kuɗuw pana kayni ti busata ta siɗiya ta mayt ma li haya.

²⁸Nala, ki nan di taŋ naŋ Farawn nala, Lawn ɗek goy kiraŋ kayni va ma nam min li'e.

²⁹Humaŋu, hay busat siɗiya lo, tin ma li asay ŋolo hay nagat Egipte noŋ kaf.

³⁰Bugol kayni mayta ma li'e ir busat siɗiya lo; sumun yisi ma jok busata ta nisi fi asta haya'ta, hay nagat Egipte kaf, mayt ma cim sumuna.

³¹Mayt na'ta co ɗawni na' ma li ŋolo, ta-ta tin ma li jew hay nagata sa muɗ wum loɗi.

³²La duwayt hoti di Farawn sem ma', kayn min ɗek ala lawt kayni coli dono kay Lawn vatiya, Lawn min li law na'ta gosoyo.

³³Wulin kayni, Mulla Farawn, garaŋ sa ma wida valam ka'a, sa ma yali, colaŋgi kulo ŋol kay nagat Egipte.

³⁴Naŋ ma tun sa sunda vaŋ goy hay nagat kafe, kay nisi ma tar gal ma vaslna vi wana jar busat siɗiya ta tin ka haya ŋolda lakŋi.

³⁵A nisi ma tok wana jar busat ta ŋaat ta coyt ɗawni; a nisi ma tok alkamarena kuɗ gaŋeraŋa vaŋu, a nisi tok sle ma tina hay hoyok-ziyn ma ŋulona, tunaŋ sa ŋomomna kaw.

³⁶Tin namna ma li ŋomiya kay nagata, kayni kay busata siɗiya ta mayt ma li haya'a hay nagat Egipte ɗawni; nala mayta ma cim sum sa hay nagatɗi.

³⁷Lawta kayni cuk kuɗ hay Farawn hiɗi sa sunda valam kafe.

³⁸Farawn di tam sa sunda valamu: Sa mara ma Ŋusta vi Lawn hobay hayam ki kayn mala nay as a fum su?

³⁹Farawn di mi Yosef: Kay Lawna ɗekaŋ slen kaynawa kaf kiraŋu, nala sa ma wida valamu hiɗi yalda valamu ŋray hiɗi naŋu may loɗi.

⁴⁰Nan min tunaŋ ŋol kay ziyna vanu, sumuna van kaf ma hum kuɗ va ma naŋ di'e, nan suwaŋ kayni kay nan musi kulo kay zlamda-mulda tuta.

⁴¹Farawn di tam Yosef: Humaŋu, nan hin nagata Egipte hay ɓaŋ kafe kay naŋ ma da' lawa'a.

⁴²Farawn pat wayta valam ta hay ɓalamta goyo, ga' bam Yosef; nam cukum sligar ma ciliyn talamu, nam gum jaɓna ma ora kelemu may.

⁴³Nam musum kulo kay kekena ma tuni bugol falamna, nisi ka siwel bugolom ala: Girifgi gaa'a! Ki kayn nala Farawn hin nagat Egipte kaf hay ɓam Yosef kay nam da' lawa'a.

⁴⁴Nam hot di mi Yosef ala: nanu mi Farawn, hay nagat Egipte tani, la bay naŋu sa as tun ɓalam tam vaɗi.

⁴⁵Farawn tun sem Yosef ala Safnat-Paneyah;[12] Asnat goota vi Poti-Fera, mul-ma-ɗifinna ma hay On nam vulumti ca'a. Yosef kali goyo kay poy nagata Egipte.

⁴⁶Hay li ma Yosef co vok Farawn mul ma Egipten kayni, busata valam coy dok-hiɗi; nam hin Farawn, kali ŋuy nagat Egipte kafe.

⁴⁷Jar busat ta siɗiya ta slen ma li'e kayni, slen li kay nagat ŋolo.

⁴⁸Slen ma li hay nagat Egipte jar busat siɗiya lakŋi Yosef tokom kafe, nam tok sle ma tina kulo hay hoyok-ziyn ma ŋulona, hoyok-ziyn marige kaf, wan ma hay sine ma goboy talamna, nam tokom hayamu.

⁴⁹Yosef tok alkamarena, ŋray ca ki ŋesl ma goloŋ kel niy-lum ma ŋolla nala, nam ŋol suwa ta-ta nisi as a ŋaɓam loɗi, kay nam suwi ŋol zutut ku'u.

⁵⁰Jew a mayt co kayni, Yosef vuɗ guron ma', vuɗumti kayn ti Asnat goota vi Poti-Fera, mul ŋol ma-ɗifinna hay On.

⁵¹Goor ma vuɗ jewna Yosef tunum selem ala Manase, kay nam di'e Lawn jokan yanawa kay lasta ta nan fa' kafta, nam jokan yanawa kay ziyna vi bunu kaw.

⁵²Goor ma ma'na nam tunum selem ala Efrayim, kay nam di'e: Lawn vulan jafawa hay nagata ta nan ti haw haya'ta.

⁵³Busat ta siɗiya ta slen li haya' ŋolo hay nagat Egipteta kalawa.

⁵⁴Busata vi mayta ta siɗiyata tun caw ma'a, kayn ki Yosef di nala. Mayt li hay nagat noŋ kuɗulu, may hay nagat Egipte sle ma tin ka'a.

⁵⁵Hay li ma sum sa Egipten kaf mayt visiyawa, nisi tun caw tiy tam Farawn kay vulsi va ma tina. Farawn di tam sum sa Egipten kaf ala: Tuɗgi kat Yosef, ligi va ma nam min digiya.

⁵⁶Dalan li ŋolo hay nagat kaf. Liyn ma Yosef ŋay wan hayamna nam malam vunam goy kafe, nam gus alkamaren goyo hay ɓam sum sa Egiptena. Mayt ka li ŋol suwa hay nagat Egipte.

⁵⁷Nagat heta kuɗulu kayni ka co hay Egipte kat Yosef kay gus alkamarena; kay hay nagat kaf dalan ka ŋolo.