Read Masana CAWA'TA TUNITA 43 Bible Online

CAWA'TA TUNITA 43 - Masana bible

CAWA'TA TUNITA 43

¹Dalan jor vokom dono ŋolo hay nagata.

²Hay li ma tin ma nisi maramay hay Egipten vatawa, Yakub di tam gurona valamu: Hotgi ɗawni, gusaygi va ma tin ay neeɗa.

³Yuda ka dumu: San kayni duma goy haraŋ ala: La goor-bugin bay mar kuɗgiya, nigi as wan iran noŋɗi.

⁴La naŋ min hin goor-buman kuɗma'a, numa as tuɗa, numa as gusaŋ sle ma tin aya.

⁵May la naŋ min hinim kuɗmaɗi, numa as tu'ɗi. Kay san kayni duma ala: Nigi wan iran kayn say goor-bugin ma li ka kuɗgiya.

⁶Wulini Israyel di'e: Nigi li law ma joo'o ki kayn nala tanu kay mige? Nigi di ala goor-bugi mara ka lo kay mige?

⁷Nisi hot dumu: San kayni job kuma'a, job kay ziyna vuma'a kaw, nam duma ala bugi ka iri lo su? Goor-bugi mara ka su? Numa hot dit kayn kuɗ jobta valamu. Numa as wi ala nam job zawn kay numa nar goor-bumanisa ɗawn witige?

⁸Yuda di tam bulum Israyel, hinaŋ goor tuɗ kuɗanu, kay numa min kal ɗawni; nala numa'a hiɗi naŋu, hiɗi gurona vay kaw ma suɗay goy vun mayta.

⁹Hinim lawam kelen nanu, naŋ ma jobom vunan nanu. La nan hotomay taŋɗi, la nan maram vok iraŋɗi, naŋ ma ŋaɓ suluk namna kayn kanu ta-ta hay vatɗita.

¹⁰La yuma vi viyɗi ni, wulin numa hoti sem ma' ɗisu?

¹¹Busi Israyel di tisiya, la ki kayn nala, sle ma ŋaana vi nagata nigi ma yawam kigiya hay birimna vigiya, kay nigi ma tuɗ vulum mi sa namna, yawgi mul ma kor tuwn kigi neɗe, gargi yumda neɗe, gargi urdi ma hisna ma yum aromat hiɗi ma yum mirr, hiɗi vuɗna vi kardumna hiɗi amandena.

¹²Yawgi gurjut kigi sem ma', gurjut ta nigi fa' cuki hay birimna yawa' kigi lo, la yisi jok joki klasige.

¹³Vigi goor-bugin kuɗgiya, yawgi kulo'o, hotgi kat san kayni.

¹⁴Lawn ma gaŋeraŋ-petna hin san kayni ligi slugot lige, a nam ma hin goor-bugi hena hiɗi Benyamin kaw hoti hotge. May nanu, la a nan hin goy bay guro kaw, nan hin manu.

¹⁵Nisi yaw sle ma nisi min tuɗ vulumtina, nisi yaw gurjut kisi sem ma', nisi vi Benyamin kuɗsiya, yaway kulo'o, kali hay Egipte, nisi co vok ir Yosef.

¹⁶Hay li ma Yosef wi Benyamin kuɗsiya, nam di tam sa ma sunda valamu: Sumun kayni naŋ narsi kalaf hay ziyna, ŋatsi va'a, kotomu, kay sumun kayni ma ti hiɗi nan falayni.

¹⁷San kayni li ki Yosef vulum hagatis nala: Nam tuɗsi kalaf hay ziyna vi Yosef.

¹⁸Nisi tun caw li nari hay li ma san ka tuɗsi kalaf hay ziyna vi Yosef; nisi di'e: Nisi naray kayni kuɗ gurjuta ta nisi cuka'ays hay birimna vaya hay buur hena klasige; nisi min kayn kay bowoya, kay lasaya, kay yaway gorvo'o, kay yaw kurona vay lay klasige.

¹⁹Nisi co goboy tam sa ma li sunda hay ziyna vi Yosefna, goy hay vun-ziyda, nisi sli dita:

²⁰Nisi di'e: Numa siɗawaŋu sam-ŋolla, numa ays tani sem kep kay gus sle ma tina.

²¹Bugol kayni, hay li ma numa co hay liy ma buur kayni, numa mal vun birimna vuma goy kayni, gigekaw ɗuw kayni gurjuta valam ka hay birimna valam waŋ waŋi, hiɗi juna' waŋ waŋi, nala numa hota'ay kuma'a.

²²Numa mar gurju tara kuma lay kay gus sle ma tina, sa ma hot cuk gurjuta vuma kay birimna kayn gige kla numa wiɗi.

²³Sa ma sunda vi Yosef disiya: Toyt tigiya, ligi narɗi, Lawna vigiya ma Lawna vi bugina, vulgi gurjut hay birim kayn mi namu. Gurjuta vigi nan wa' wi'. Nam marsi Simeyon goy tisiya.

²⁴San kayni cuksi kalaf hay ziyna vi Yosef, nam vulsi niyo, nisi muz sesi goyo, nam vul hatna mi kurona visiya kaw.

²⁵Nisi kot sle ma nisi maram kisina, kay cub ala hay falayta Yosef ma co'o kay nisi humi ala nam ka co ti hiɗi nisiya.

²⁶Hay li ma Yosef co vo hay ziyna, nisi vulum sle ma nisi maram hay ɓisina, nisi girif gaa kay nagat vokomu.

²⁷Nam jobsi ala nisi ka ŋaa'a su? Nam hot disiya: Bugi ma maara ma nigi di kalamna ka ŋaa'a su? Nam ka iri dok-dok su?

²⁸Nisi hot dit ala: Buma ma sunda vaŋu ka ŋaa'a, nam ka iri dok-doko, nisi her gaa'a, dab voksi gaa vokomu.

²⁹Yosef poŋ iram kulo'o, nam cuk iram kay Benyamin ɓasulumna, goora vi sulumu, nam di'e: Damni mi goor-bugi goora ma nigi dan kalamna su? Nam dumu: Lawn Laŋ slugota, goora vanu.

³⁰Tuwam muɗ vum leŋ-leŋ' kay ɓasulumna, iram tun caw kus zimiya, nam fok kulo gosoyo kali hay ziyt ta goota, ɗawni nam tiya.

³¹Bugolda nam muz iram goyo, hotay goy jiy tisiya. Nam vi dikam dono'o, nam di'e tam sa li tina ala: Margi tina.

³²Yosef nisi vulum tina valam goy valamu, vul fi guro-biyomna goy valamu kaw, sum sa Egiptena sa ti hiɗi namna kaw vulsi fisin goy valam lay, kay sum sa Egiptena as ti hiɗi sum sa Hebrenɗi, kay kayni kirsi liwis ŋolo.

³³Guro-biyom Yosefna zlar gaa vokomu, nisi zlar kayni tun cawi tam ma ŋolla pa ta-ta tam ma goora, kuɗ busana visiya visiya, nisi ka ci porlay mi tuwsiya, kay nisi muɗi ɦuyum'.

³⁴Yosef joksi tin ma ka dakay gaa vokomna, Benyamin nam vulum suw segen sem vasl. Nisi ci'e kaw, ta-ta nisi li firi hiɗi namu.