Read Masana CAWA'TA TUNITA 45 Bible Online

CAWA'TA TUNITA 45 - Masana bible

CAWA'TA TUNITA 45

¹Yosef as a vi dikam kir sum sa dakay vokom kafna loɗi. Nala nam siwela: Hin sumun kaf cuk goyo; hay li ma nam ɗek tuwam kir ɓosiyomna kayni, sa mara ma diram valam may jarsi loɗi.

²Nam tiy hiɗi delem kulo ŋolo, sum sa Egiptena hiɗi sum sa hay ziyna vi Farawn kaf humum delem ma tiyna.

³Yosef di tam guro-biyomna: Nanu mi Yosef! Bunu ka iriya su? May guro-biyomna fi va ma nisi hotom dit hiɗi namɗi, kay tuwsi muɗi visi vokom bat-bat'.

⁴Yosef disiya: Nigiyay tan goboyo. Nisi co talam goboyo. Nam disiya: Nan zawn mi goor-bugina Yosef ma nigi gusum goyo kay sumun naram hay Egiptena.

⁵Wulin kayni ligi nar loɗi, muɗgi ɦiy tam tuwgiya kay gus ma nigi gusani goyo kay maran tannaɗi, kay Lawn ganay vokgi tan kayni kay suɗgi irita vigiya.

⁶Wulin kayn dalan laawa hay nagat ir busat ma'; busat hini vasl lo kayni, sa as zumɗi, sa as fe'ɗi kaw.

⁷Lawn ganay vokgi kayni kay nigi ma lak iriya hay nagat tani, nam min hingi lak iriya hiɗi butta-goyta ŋolda valamu.

⁸Gan iranay goy tan kayni may si nigiɗi, may gan iranay mi Lawna, tunan bum Farawn kayn mi Lawna, nam muɗan mi sa ma di law ziyna valam kafna, nam tunan guverner kay nagat Egipte kafe.

⁹Nigi ma li gosoyo kay tuɗ kat bunu, nigi ma dum ala: Goora vaŋ Yosef ka daŋ ala: Lawn tunumawa mi sa ma ŋolla vi nagat Egipte kafe. Naŋ ma co tan talam ɗawni, naŋ ma vi yaŋ noŋɗi.

¹⁰Naŋ ma li ziy hay nagat Gosen, nala naŋ ma mus goboy hiɗi nanu: Naŋ hiɗi gurona vaŋu, hiɗi guro-ŋolona vaŋu, fokŋa vaŋu hiɗi luwayna vaŋ kaw, hiɗi slena vaŋ noŋ kafe.

¹¹Tani nan min vulaŋ sle ma tina, kay busata vi mayt hini vasl lo nala naŋ hiɗi ziyna vaŋu hiɗi slena vaŋ noŋ kaf dalan ma vatgiɗi.

¹²Nigi kaf ka wan hiɗi irgiya, ɓasunna Benyamin kaw ka wi ala lawgi zawn mi nanu.

¹³Nigi ma vi labar mi bunu kay gajijita van hay nagat Egipte tan noŋ kafe, slen ma nigi wum hiɗi irgin noŋ kafe; bunu nigi ma maram tani gosoyo.

¹⁴Nam bow Benyamin kelemu, tiya, Benyamin kaw tiya.

¹⁵Guro-biyom segen kaf nam bowsiya, tiy kaw. Bugol kayni nisi lak gaa'a ka kasla hiɗi namu.

¹⁶Labara meray goy hay ziyna vi Farawn ala guro-biyom Yosefna coowa. Lawt kayni firi dik Farawn hiɗi sa sunda valamu.

¹⁷Farawn di tam Yosef: Naŋ ma di tam guro-biyoŋŋa ala nisi ma yaw jakŋa visi ay kay kurona, nisi ma yaway goy hay nagat Kanaan pa,

¹⁸nisi ma yaw busiya hiɗi jafna visi ay kafe kay co tan tani. Slen ma ŋaana ma hay nagat Egiptena nan min vulsita, nisi ma ti sle ma jibetna vi nagata.

¹⁹Hagat ka kaŋ naŋ Yosef a disi ala: Nisi ma yaw keke ma hay nagat Egiptena kay mar gurona visiya hiɗi boyna visiya, kay mar busi kaw. Hinsi co'o.

²⁰Nisi ma yor tuwsi kay sle ma nisi ma hinimay goy bugolsinɗi, kay slen ma ŋaana vi nagat Egipte nam ma muɗ visiya.

²¹Gurona vi Israyel li ki kayn nala, Yosef vulsi keken kuɗsiya ki Farawn vul hagat nala; nam vulsi sle ma nisi ma tum hay hagatna kaw.

²²Nisi kaf nam vulsi sligara kay muɗ hena kisi kep, nam vul mi Benyamin gurjuta sikel* kis-ɦidi, sligar ma muɗ hena vasl kaw.

²³Nam yaw kuron doogo, hobom hiɗi sle ma ŋaana vi nagat Egipte, nam yaw guro-kuron doogo kaw, hobom hiɗi wa-alkamarena, hiɗi funa, hiɗi sle ma tin mara'a, jokom mi bulumu kay rogoy ta nisi ma la'ay hay hagata.

²⁴Bugol kayni nam gat guro-biyomna, nam disi ala: Nefgi tuwgi hay hagatɗi, nala nisi kaliya.

²⁵Nisi yaways hay Egipte pa co hay nagat Kanaan, tam Yakub busiya.

²⁶Nisi dumu: Yosef ka iri tuwa, nagat Egipte noŋ kaf ti mul ka' kayn mi namu. May Yakub dikam ka ɓiris-ɓiris' tuwa, kay nam may vi dita visiɗi.

²⁷Law ma Yosef disitna nisi maramta kafe. Nam wi keke ma Yosef jokomay kay yawamna hiɗi iramu. Ki kayn nala dikam tun caw zliy kulo'o.

²⁸Israyel hot di'e: Law may loɗi yo, goora van Yosef ka iriya kayn tuta, nan min tuɗa, kay iran ma ŋaf hiɗi namu jew mitta vanu.