Read Masana CAWA'TA TUNITA 46 Bible Online

CAWA'TA TUNITA 46 - Masana bible

CAWA'TA TUNITA 46

¹Israyel kaliya, hiɗi slen ma ir valamna kafe. Nam co hay Ber-Seba, nam li ɗifin tam Lawna vi bulum Isaak hay liy namna.

²Lawna vul tuwam kir Israyel hay henjeta, nam dumu: Yakub, Yakub, Yakub! Israyel hot dita: Nanis zawni.

³Lawn di'e: Nanu mi Lawna, Lawna vi buŋu. Laŋ nari kay kal hay nagat Egipteɗi, kay ɗawni nan min muɗaŋ jafaŋ ŋolo.

⁴Nan kay tuwanu ka kuɗaŋ ɗawni hay Egipte, nan kay tuwanu ma hotaŋay goy hay Egipte pa, Yosef ma paŋu.

⁵Yakub hin Ber-Seba, gurona valam musum namu hiɗi boyna hiɗi gurosgurayna kaf kulo hay keke ma Farawn jokomiya kay yawsina.

⁶Farayna visiya hiɗi sle ma nisi fum hay nagat Kanaan kaf nisi yawam kuɗsiya. Yakub kali hay Egipte hiɗi jafna valam noŋ kaf.

⁷Gurona valam sa jufayna hiɗi gurona visiya hiɗi guro-ŋolona visiya, gurona valam sa boyna hidi gurona visiya, hiɗi guro-ŋolona visiya, hiɗi jafna valam kaf nam yawsi kuɗumu.

⁸Kayni mi semda vi gurona vi Israyel sa co hay Egipte: Yakub hiɗi gurona valamu: Ruben goora valam ma vuɗi jewna.

⁹Gurona vi Ruben: Henok, Pallu, Hesron, hiɗi Karmi.

¹⁰Gurona vi Simeyon: Yemuwel, Yamin, Ohad, Yakin, hiɗi Cosar, hiɗi Sawul goora vi cata Kanaaniyata.

¹¹Gurona vi Levi: Gerson, Kehat hiɗi Merari.

¹²Gurona vi Yuda: Er, Onan, Sela, Peres, hiɗi Zarak. May Er hiɗi Onan miti hay nagat Kanaan. Gurona vi Peres kayni si Hesron hiɗi Hamul.

¹³Gurona vi Isakar: Tola, Puva, Job, hiɗi Simron.

¹⁴Gurona vi Zabulon: Sered, Elon, hiɗi Yahleel.

¹⁵Nisi kayni si gurona sa Leya vuɗsi mi Yakub hay Padan-Aram, hiɗi goota va' Dina. Gurona va' sa jufayna hiɗi sa boyna li noŋ pet dok-ɦidi yam ɦidi.

¹⁶Gurona vi Gad: Sifyon, Haggi, Suni, Esbon, Eri, Arodi hiɗi Areeli.

¹⁷Gurona vi Aser: Yimna, Yisva, Yikvi hiɗi Beriya hiɗi Serak ta ɓasusita. Gurona vi Beriya kayn Heber hiɗi Malkiyel.

¹⁸nisi kayni si gurona vi Zilpa, ta Laban vula' mi goota valam Leyata, kayn si guro sa na' vuɗsi mi Yakubna, nisi noŋ pet sumun doogo yam karkiya.

¹⁹Rakel cata vi Yakub gurona va' kayni, Yosef hiɗi Benyamin.

²⁰Gurona sa Yosef vuɗsi hay Egipten kayni: Manase hiɗi Efrayim, vuɗum guro nisin kayn ti Asnat, goota vi Poti-Fera, mul ma-ɗifinna hay On.

²¹Gurona vi Benyamin kayni: Bela, Beker, Asbel, Gera, Naaman, Ehi, Ros, Muppim, Huppim hiɗi Ard.

²²Nisi kayni si guron sa Rakel vuɗsi mi Yakubna. Nisi noŋ pet sumun doogo yam fiɗi.

²³Gurona vi Dan: Husim.

²⁴Gurona vi Neftali: Yatseel, Guni, Yeser, hiɗi Silem.

²⁵Nisi kayni si gurona vi Bilha, ta Laban vula' mi goota valam Rakelta, kayn si guro sa na' vuɗsi mi Yakubna. Nisi noŋ pet sumun siɗiya.

²⁶Sum sa co hiɗi Yakub hay Egipte, nisi sa may goy hayam nam pana noŋ pet sumun dok-karkiya yam karkiya, boyna vi gurona vi Yakub may hayɗi.

²⁷Gurona vi Yosef sa nam vuɗsi hay Egipten ka ma' lo. Sum sa hay jafna vi Yakub sa co hay Egipten noŋ kaf dok-siɗiya.

²⁸Yakub gi Yuda vokomu kat Yosef, kay dum ala nam ka tuɗis hay Gosen.

²⁹Yosef kot kekena valamu, ɓe kalamu, kay tuɗ hay Gosen, kay ŋaf ir bulum Israyel. Hay li ma iram wi bulumu, nam bowom kelemu, nam tiy ŋolo.

³⁰Israyel di tam Yosef: Wulin kayn nan waŋ iraŋawa, naŋ ka iriya kayn tuta, mitta co ma' kan yo.

³¹Yosef di tam guro-biyomna hiɗi jafna vi bulumu: Nan min tuɗ di tam Farawn ala: Guro-biyonna hiɗi sum sa hay jafna vi bunu sa ay hay nagata Kanaan coowa tan tani.

³²Nisi si sum sa ŋom fokŋa, nisi wul farayna; nisi co kayn hiɗi fukunayna visiya hiɗi luwayna visiya, hiɗi slena visi noŋ kafe.

³³Hay li ma Farawn, yigiyawa, la nam jobgiyawa ala:

³⁴lopna vigi mi mige ni, nigi ma hotom dit ala: Sa sunda vaŋ wulum mi farayna, tun cawi tam goorta vuma pa ta-ta wulini, numa hiɗi sumayma kafe. Ki kayn nala, nigi ma li ziy hay nagat Gosen, kay sum sa ŋom farayn kayn nisi liwisi kir sum sa Egiptena.