Read Masana CAWA'TA TUNITA 47 Bible Online

CAWA'TA TUNITA 47 - Masana bible

CAWA'TA TUNITA 47

¹Yosef kaliya, nam di Farawn ala: Guro-biyonna hiɗi bunu coyawa goy hay nagata Kanaan pa, hiɗi fukunayna visiya, hiɗi luwayna visiya hiɗi sle ma ir visin kafe; nisi ka ɗawni hay nagat Gosen.

²Nam yaw guro-biyom segeni kuɗum vasl, nam marsi vok Farawn.

³Farawn disiya: Nigi lum mi lop mige? Nisi hot dit mi Farawn ala: Sa sunda vaŋu wulum mi farayna, ki sumayma ay nala kaw.

⁴Nisi di tam Farawn lo: Numa co kayni kay li ziy hay nagata vaŋu, kay hatna ma farayna vuma ti'e may ɗawayni hay nagat Kanaan loɗi, kay dalan ka li ŋolo hay nagat Kanaan. Nala naŋ ma malma hagata kay nema ma lak ɗawni hay nagat Gosen.

⁵Farawn di tam Yosef: Buŋu hiɗi guro-biyoŋŋa co kayn kataŋ naŋu.

⁶Nagat Egipte ka vokaŋ hiriŋ-hiriŋ'; naŋ ma lak buŋu hiɗi guro-biyoŋŋa hay liyn ma ŋaana vi nagata. Hinsi lak hay nagat Gosen, la naŋ fi sum sa nagayn jarsiya, naŋ tunsi kay ŋoman farayna van lay.

⁷Yosef mar bulum Yakub, nam tuɗum tam Farawn, Yakub gi bol kay Farawn.

⁸Farawn di tam Yakub: Busata vaŋ liy noŋ pet gaage?

⁹Yakub hot dit mi Farawn ala: Busata van ta nan poy gaa kay nagat noŋ pet co kis hiɗi diram dok-ɦidi. Busata van ta nan la' gaa kay nagat may li ŋolɗi lay na' li joo'o lay, na' may ŋra hiɗi busata ta sumiyan la' gaa kay nagat tan noŋɗi.

¹⁰Yakub gi bol kay Farawn mara lo, bugolda nam vi tuwam goy vok ir Farawn.

¹¹Yosef vul liyn ma lakka mi bulum hiɗi guro-biyomna hay nagat Egipte, nam vulsi liyn ma ir visiya hay nagat Egipte, hay gal ma ŋaana vi nagata, hay galla vi Ramses, kayni ki Farawn vul hagat nala.

¹²Yosef vul sle ma tina mi bulumu hiɗi guro-biyomna, hiɗi sa fi bulumna noŋ kafe, nam vulum kuɗ ŋaɓta vi gurosgurayna.

¹³Hay nagat noŋ kaf sle ma tin mayɗi, kay dalan ka li ŋolo; sum sa hay nagat Egipte hiɗi sum sa hay nagat Kanaan noŋ kaf donota visi vatay goyo kay mayta.

¹⁴Yosef tok gurjuta ta ka hay nagat Kanaan hiɗi nagat Egipte kafe, nam toka' hiɗi wa-alkamare ma sumun ka gusumna; gurju na'ta nam kala' vo hay ziyna vi Farawn.

¹⁵Hay li ma gurjuta vi sum sa hay Egipte hiɗi sum sa hay Kanaan kaf vatawa goyo, sum sa Egipten kaf co tam Yosef, nisi dumu: Vulma fuwa, naŋ hinma mit vok iraŋ ɗawn nanige? Kay gurjut tay loɗi.

¹⁶Yosef di'e: La gurjut tay kigi loɗi, nigi maran farayna vigiyaya, nan min gusum hiɗi wa-alkamarena.

¹⁷Nisi mar farayna visi mi Yosef, Yosef vulsi sle ma tin baŋal kulumayna visiya, baŋal fukunayna hiɗi luwayna, hiɗi kurona. Hay busat na'ta kaf nisi gus sle ma tin kalamu hiɗi farayna visiya.

¹⁸Hay li ma busata na'ta kalawa, nisi co tam Yosef hay busata vokka lo, nisi dumu: Sam-ŋolla, wulin kayn numa as ŋayaŋ loɗi, gurju tay kuma loɗi, farayna numa kalaŋgiyawa goy kafe, wulin hini hay ɓuma kayn ti nagata hiɗi tuwma vuɗin may tuta.

¹⁹Naŋ hinma mit vok iraŋ na ɗawn kay mige? Numa hiɗi nagata vuma noŋ kaf naŋ gusma hiɗi sle ma tina, hinma muɗ goy guro-fukunayna vi Farawn, numa hiɗi nagata vuma noŋ kafe. Vulma wa ma jafi, kay numa ma lak iriya, kay sinena vuma ma hin goy busaya ɦawaɗi.

²⁰Yosef gus nagat Egipte mi Farawn kafe; kay sum sa Egiptena gigekaw gus sinena valam goyo, kay mayt ka lisi dono ŋolo. Nagat fariya' muɗ goy vi Farawn kafe.

²¹Nam jok sumun goy hay hoyok-ziy ma ŋulona tun cawi hay vun nagat Egipte gal hen pa ta-ta hay vuna' hen goŋ'.

²²May muliyan-sa-ɗifinna nam may gus liyna visiɗi, kay gatta vi Farawn ta tuni kay lisi slugota, tina visi ma nisi tumna vulsit kayn mi Farawn, kuɗ kayni nam may gus liyna visiɗi.

²³Yosef di tam sumuna: Vaydi nigi hiɗi nagata vigi noŋ kaf nan gusgiyawa mi Farawn; Heɗe, nan vulgi wa ma jafna kayni, nigi as a cuk jafna gaa kay nagata.

²⁴Hay feɗn ɗawni, nigi ma vul gal ma vaslna vi Farawn, gal ma hin goy fiɗina nam vigi may, kay nigi ma cuk jafn gaa hay sinena, kay nigiya hiɗi gurona vigiya hiɗi sum sa ka hay ziyna vigi kaf ma fi tina.

²⁵Nisi dumu: Naŋ suɗma irita vuma'awa, sa ma ŋolla, numa fi slugotawa vok iraŋu, numa min li gorvo vi Farawn muma'a.

²⁶Lawt na'ta kayni Yosef muɗa' goy vun-ma-gati, ta-ta vaydi gat na'ta ka waŋ', kayn di ala gala ma vaslna vi nagata vi sum sa Egipten kaf nam vi Farawn. May valamɗi kayn mi liyna vi muliyan-sa-ɗifinna tuta.

²⁷Israyel cuk ziyna valamu hay Egipte, hay nagat Gosen. Nisi fi liyn ŋolo, nisi vuɗ ŋolo, biya ŋol kaw.

²⁸Yakub li busat doogo yam siɗiya hay nagat Egipte. Busata valam hay nagat noŋ kaf co kis hiɗi diram dok-fiɗi yam siɗiya.

²⁹Hay li ma Israyel co goboy vun mitta, nam yi goora valam Yosef dumu: Nan siɗawaŋu, tunaŋ ɓaŋay kay ɓalanu. La nan fi slugotawa hay vok iraŋu ni, naŋ ma li ŋaat tanu, naŋ ma vi lawta vanu: Naŋ ma pan hay Egipte tanɗi.

³⁰Hay li ma nan mitawa kuɗ sumiyanu, naŋ ma naran goy gine hiɗi Egipte, naŋ ma pan hay zulda vi sumiyanu. Yosef hot dita: Nan ma li kuɗ dita vaŋu.

³¹Yakub di'e: Naŋ ma yi va kaŋu; nam yi va kalamu may. Bugolda Israyel dab vokom gaa'a kay yam va ma buura valamu.