Read Masana CAWA'TA TUNITA 49 Bible Online

CAWA'TA TUNITA 49 - Masana bible

CAWA'TA TUNITA 49

¹Yakub yi gurona valamu, nam disiya: Tokgiyaya, nan min digi slen ma min li tigiya hay buur ma vokŋa.

²Tokgi tuwgiya, humgiya nigi gurona vi Yakub! Humgi dita vi bugi Israyel:

³Ruben, naŋu, goora van ma vuɗi jewna, donota vanu hiɗi vun-jaf ma jewna vi gaŋeraŋa vanu, naŋ suw kafe hiɗi gaŋeraŋa, naŋ suw kafe hiɗi donota,

⁴naŋ gi tirwisi ki niyn nala, may ŋolda vaŋ ma suw segenɗi, kay naŋ jik kulo'o hay liyn ma buura vi buŋu, naŋ muɗ liyn ma buura van liwisi hay li ma naŋ jik kulo hayamu.

⁵Simeyon hiɗi Levi si ɓosiyom tuwsina; nisi li law ma ɦawlan ŋolo hiɗi kew-gaferaŋa visiya,

⁶hin ciwta van tap hay ŋra-vunda visi ta ŋayaytɗige, hin ŋusta van tap hay tokŋa visiɗige. Kay hay ɦiyda visiya nisi ci sumun goyo, hay dikga joota visiya, nisi ka sutay ma gaa tiŋtiŋ luwayn gujun goyo.

⁷ɦiyda visiya na' beɗay goyo, kay na' suwi ŋolo, purcakka visi kaw, kay na' ci mati. Nan min poŋsi irsi goyo jar jafna vi Yakub, nan min mersi goyo hay Israyel.

⁸Yuda, guro-biyoŋŋa ma tiyaŋ seŋu. Sa gaw kaŋŋa naŋ ma tun ɓaŋ kuɗ jaksiya, gurona vi buŋ ma girif gaa vokaŋu.

⁹Yuda nam mi zlon ma joriyo'o, naŋ may goy digiɗ muur pa, goora vanu; nam kus ŋulofom gaa'a, bur gaa'a ki zlon nala, ki zlo tancat nala, sa ma as fokom kulo'o mi gige?

¹⁰Zugulda-mulda jara' as ja goy hiɗi Yuda loɗi, zugulda-mulda ka jakay gaa selem dok-doko, ta-ta hay li ma nam ma yum «Silo» ma co'o, ta-ta sumun ma hum gaa kuɗumu.

¹¹Nam jun kurona valam tam gulda-guldana, nam ma jun goor-kurona valamu tam so'ol gu gulda-guldana ma ŋaana; nam muz sligara valamu hay vinna, nam cor sligar-tuwna valamu hay niy gulda-gulda ma slawna.

¹²Iram cori slaw kay vinna, siyam ɓoy haɓ tel-tel' kay miira.

¹³Zabulon ma li ziy kulo kel niy-lum ma ŋolla, nam ma mus vun niyn ma lumayn dak hayna, vun nagata valam ma co ta-ta hay Sidon.

¹⁴Isakar mi kuro ma dono'o, nam bur hay ciŋana vi farayna.

¹⁵Nam wi ala liyn ma nam tum suk hayamna nam jifiy ŋolo, liyn ma goy galamna jifiyam suwiya, nam her pelem gaa kuɗ jak ma nekŋa, nam hin taar tun kalamu.

¹⁶Dan ma ka kitat kay sumuna valamu, ki kep jar jafna vi Israyel nala.

¹⁷Dan ma muɗ ki guy ma hay hagat nala, ki guy-makayda hay hagat gurayt nala, cal kulumni dubukamu, kay sa ma ɓey kay kulumna nig goy gaa danani.

¹⁸Nan ka cub gutda vaŋu, naŋ Ma-Vatɗina.

¹⁹Gad vok-ma-duur ŋolo ma ŋuyumu, may nam ma ŋuysiya, digiɗsi kaw.

²⁰Aser ma mar tin ma ŋaana; tin ma fi lop ŋolla muliyan fum ɗawn kuɗum namu.

²¹Neftali ŋray ca ki dukka ta ka goy butiya nala, nam di law ma ŋaan goyo.

²²Yosef nam ŋray ca ki gu ma goɗna ma san gum goyo nala, gu ma goɗna ma ka goboy tam liyn ma niyn riŋ goyna; ɓalam dab ta-ta kulo bugol gulmunna.

²³Nisi nefemu, nisi gum hiɗi ɓarawta, sa dur ɓarawta kaam gawi.

²⁴May diŋ-diŋ ɓarawta valam may geɗ noŋɗi, nam fi donotawa ŋolo kuɗ Ma Gaŋeraŋa vi Yakub, nala nam muɗi mi ma ŋomda, hiɗiyna vi Israyel.

²⁵Gut kuɗaŋ ɗawni mi lopna vi Lawna vi buŋu, Gi bol kaŋ ɗawni mi lopna vi ma Gaŋeraŋ-Petna. Bolda vi dukalawn kulo'o, Bolda vi niyn gaa'a, bolda kay pona vi boyna hiɗi ziy-goorsiya.

²⁶Bolda vi buŋu na' suw bolda vi sumiyan nanu, ta-ta kulo yam boŋoloŋŋa ma vat goyɗina. Hin bolda mus kay Yosef, hina' mus kulo kay yam nam ma ti mulda kay guro-biyomna.

²⁷Benyamin ŋray ca hiɗi keŋ ma jet muur goyna; hay graw culumta, nam mut sliwna, vulatita, nam ɓuraw sle ma yawam ay vun duura.

²⁸Nisi lakŋi si sa jafna vi Israyel doogo yam ma' may goy haysi pana, kayni mi slen ma busi disitna, hay li ma nam gisi bolo. Gigekaw nam gum bol hiɗi bolda valamu valamu.

²⁹Bugolda nam hin dit kayni ala: Nan min mit kuɗ sumiyanu, nigi ma pan gaa tam sumiyanu, hay zul-hiɗiyna ma ka hay sinena vi Efron ma Hetiyena.

³⁰Hay zul-hiɗiyna vi sine ma hay Makpelana, ɗiger vok Mamre, hay nagat Kanaan. Kayni mi sinen ma Abraham gusum hay ɓam Efron ma Hetiyena, kay pi sumuna valam haya.

³¹Abraham hiɗi cata valam Sara pisi kayn hay zul namna; Isaak hiɗi cata valam Rebekka pisi kayn haya, Leya kaw nan pa' kayn haya.

³²Sinena hiɗi zul hiɗiyna ma hay liy namna Abraham gusum kay gurona vi Het.

³³Hay li ma Yakub di vunam goy mi gurona valam kaf dina, nam hot cuk selem kulo kay va ma buura, sukam kal goyo, nam tap kuɗ sumiyam sa hay zulla.