Read Masana CAWA'TA TUNITA 50 Bible Online

CAWA'TA TUNITA 50 - Masana bible

CAWA'TA TUNITA 50

¹Yosef gi tuwam gaa kay bulumu, nam tiya, ŋaf vunam gaa kalamu.

²Nam vul hagat tam doktorayna sa sunumna kay nisi ma setem hiɗi mul ma nam as buwɗina.

³Nisi kotom tuwam ir buur dok-fiɗi, nisi setem mul namna talamu. Sum sa Egipten tiyim ir buur dok-siɗiya.

⁴Hay li ma buur ma tiyn vatawa, Yosef di tam sum sa hay ziyna vi Farawn ala: La nan fi slugotawa vok irgiya ni, nan siɗawgiya kay nigi ma tuɗ di lawt kayni mi Farawn:

⁵Bun dan ala: Wulin kayn nam mit ɗawn mitiya, nala nan ma tuɗ pum hay zulda ta nam gusa' hay nagat Kanaanta, nan yi va kan vokomu. Kuɗ kayni nan min tuɗa kay pumu, nan ma hotiya may.

⁶Farawn hot dita: Tuɗaŋ paŋ buŋu, ki naŋ yi va kaŋ vokom nala.

⁷Yosef kali ɗawni, kay pi bulumu. Sunda sa hay ziyna vi Farawn pat kuɗum noŋ kafe, sa maariyana hay ziyna valam noŋ kafe, sa maariyana hay nagat Egipte noŋ kaf kaw.

⁸Sum sa hay ziyna vi Yosef noŋ kafe, guro-biyomna hiɗi sa hay ziyna vi bulumu. Hay nagat Gosen hin vo kayn si gurosgurayna, fukunayna hiɗi luwayna tuta.

⁹Keke ma duura hiɗi sa ɓe kay kulumayna ka tapay kuɗ Yosef ŋolo.

¹⁰Hay li ma nisi co hay muɗakŋa vi Atad, ma goy bugol niy-lumna Yordan, nisi mun tiyn giti-giti, nisi tiy tiyn ma yorta ŋolo, Yosef ti do'ol bulum ir buur siɗiya.

¹¹Sum sa Kanaaniyana sa sumay nagata, wi tiy namna ma hay muɗakŋa vi Atadna hiɗi irsiya, nisi di'e: Kayn mi tiy ma ŋolo jar sum sa Egiptena. Kuɗ kayni muɗak namna nisi tunum selem ala Abel-Misrayim, nam ka goy bugol niy-lumna Yordan.

¹²Ki kayn nala gurona vi Yakub vi vun busiya.

¹³Nisi tuɗum hay nagat Kanaan. Nisi pum hay zul-hiɗiyna vi sinen ma hay Makpela, ma Abraham gusum hay ɓam Efron ma Hetiyena, kay pi sumuna valam haya, nam ka ɗiger vok Mamre.

¹⁴Hay li ma Yosef pi bulum pina, nam hot hay Egipte, hiɗi guro-biyomna hiɗi sumun kaf sa tap kuɗumu kay pi bulumna.

¹⁵Hay li ma guro-biyom Yosefna wi ala busi mitawa, nisi di'e: Yosef ka gaw hiɗi nay klasige, nam min hot joo ta nay la' talamta klasige.

¹⁶Nisi gi sunda tam Yosef kay dum ala: Jew a buŋ mita, nam hin ditis ala:

¹⁷Numa ma daŋ ala: Naŋ ma vul gida kay jiw-zlata hiɗi sulukŋa vi guro-biyoŋŋa, kay nisi lum taŋ kayn mi law ma joona. Wulin kayni naŋ ma vul gida mi sa sunda vi Lawna vi buŋ lakŋi. Hay li ma Yosef hum lawt kayni, nam tiya.

¹⁸Guro-biyomna kay tuwsiya co'o dab voksi gaa vokomu, nisi di'e: Numa si gorvona vaŋu.

¹⁹Yosef disiya: Ligi nar noŋ ne'ɗi. Nan vurnay baŋal Lawn su?

²⁰Nigi vari hay dikgi kay lan joo'o, may joo na'ta Lawn muɗa' goy ŋaata, kay suɗ jaf-sumun ŋolo goyo ki nigi ka wi wulin kayn nala.

²¹Nigi ma li nar noŋ ne'ɗi, nan ma ŋomgiya, nigi hiɗi gurona vigi noŋ kafe. Nam teŋsi irsiya, disi law ma hay dikamna goy kafe.

²²Yosef ka musi hay Egipte, nam hiɗi ziyna vi bulum noŋ kafe. Nam li busat kis hiɗi diram doogo.

²³Yosef wi gurona vi Efrayim ta-ta tam jaf ma ɦidina. Gurona vi Makir, gurona vi Manase kaw vuɗ kayn wulsi mi namu.

²⁴Yosef di tam guro-biyomna. Wulin kayn mitta vanawa. May Lawn humam ma gum kigiya, nam ma yawgi goy hay nayat tani kay hotgi hay nagata ta nam yi va kalamu kay vula' mi Abraham, Isaak hiɗi Yakub.

²⁵Yosef di gurona vi Israyel ala: Lawn humam ma gum kigiya. May nigi ma yi va kigi ala nigi ma yawan zokan kigiya.

²⁶Yosef mita. Busata valam coy kis hiɗi dira' doogo. Nisi set mul ma buwɗin talamu, nisi cum hay kesna, hay nagat Egipte.