Read Masana CAWA'TA TUNITA 6 Bible Online

CAWA'TA TUNITA 6 - Masana bible

CAWA'TA TUNITA 6

¹Hay li ma sumun tun caw biya ŋolo gaa kay nagata, hay li ma guro-boyn vuɗis jarsi kaw,

²gurona vi Lawna wi kayni guro-boyna vi sumuna ay jifiy ŋaa ŋolo, nisi vilek sa kirsi ŋaana yawsi boyo.

³Ma-Vatɗin di'e: Ŋusta vanu ma mus hiɗi sana ta-ta loɗi, kay nam mi sliw ɦawa'a, kay na'ta nan min hotom busata valam goy kiɗay ir kis kalam dok-ma'.

⁴Hay li namna sum sa fiyokŋa sa donona ay gaa kay nagata. Kay gurona vi Lawna tap hiɗi guro-boyna vi sumuna, vuɗ guro nisin kisi kaw, sum nisin kayni si sum sa dono ŋolo, sa sesi ay tiy ŋolo hay liyn ma ɓa-ɓana.

⁵Wulini Ma-Vatɗina sar kayni, joota vi sumuna muɗi ŋol suwa gaa kay nagata, hay buurta kaf diksi ka vara kay li joota tuta.

⁶Ma-Vatɗina gi hama mi tuwamu kay kot ma nam kot san gaa kay nagatna, nam yor tuwam ŋolo.

⁷Ma-Vatɗin di'e: Wulin kayn sum sa nan kotsi gaa kay nagata nan min vatsi goy kafe. Tun cawis tam sumun pa ta-ta tam muuriyana tam sle ma ɦarmatna, tam layayn ma dukalawn kaw. Kay sle namn cani lali nan lum liyɗin ŋaa suwa.

⁸May Nuwa Ma-Vatɗin lum slugota.

⁹Tani mi labara kay jafna vi Nuwa. Sum sa ay hay liy namna kaf Nuwa jarsi ɗigere, nam may min jootɗi. Nam poy kuɗ tuwsi hiɗi Lawna.

¹⁰Nuwa vuɗ guron hiɗi: Sem, Kam hiɗi Yafet.

¹¹Nagata muɗi liwisi vok ir Lawna, sum sa haya'na hobay ŋolo hiɗi waskayta.

¹²Lawna ɗuw gaa kay nagat na kayni, na' muɗi liwis ŋolo, kay sumun kaf sa gaa kay nagata ɓulak hagata visiyawa.

¹³Ma-Vatɗin di tam Nuwa: wulin kayni nan col buur ma nan min ɓulak sumun goynawa, kay nisi ɓulak yam nagatawa hiɗi waskayta, humaŋu, nan min ɓulaksi goy kay nagata,

¹⁴Naŋ ma ceɗ lumna hiɗi gu-gofer,[3] naŋ ma kaam hayam ziy ɗoh' ɗoh', hayam hiɗi ŋorom kaf naŋ ma korom hiɗi dubaŋŋa.

¹⁵Naŋ ma lum ɗawni, fiyokom goldoŋ kis-hiɗi, buɗugam goldoŋ dok-vasl, fiyokom ma kulon goldoŋ dok-hiɗi.

¹⁶Naŋ ma ka baŋa kir lum namna, fiyokŋa vi baŋa namna ir goldoŋ ɗaw, naŋ ma kot vun lum namna hay hoyokomu; naŋ ma kot ma kulo kalamna ir gooro, naŋ ma kot ma ma'na, ma ɦidiina may.

¹⁷May nanu, nan min hin niyn si ŋolo gaa kay nagata sle ma irina hiɗi ma sukka hayamna kaf ma gaa kay nagatna nan min ɓulakam goyo, sle ma gaa kay nagat kafna nan min hinim vat goyo.

¹⁸May nan min jun bonot hiɗi naŋu. Naŋ ma kal hay lumna, naŋu hiɗi gurona vaŋu, cata vaŋu hiɗi boyna vi gurona vaŋ lay. Nisi kaf ma cuk hiɗi naŋ hay lumna.

¹⁹Jar sle ma ka irin kaf, naŋ ma yaw kuɗ jaf ma kepn ma' ma', kay nam ma lak iri hiɗi naŋu. Naŋ ma vi ma juf kulo kuɗaŋ kepe, ta ca kulo kuɗaŋ kep lay.

²⁰Layayn kuɗ jafamu jafamu, muuriyan kuɗ jafamu jafamu, sle ma harmat gaa kay nagat noŋ kaf kuɗ jafamu jafamu, kuɗ jaf ma kepna naŋ ma yaw ma' ma', nam ma co taŋu, kay a jafam ma vat goyɗi.

²¹Naŋu, sle ma tin kuɗ jafam kaf naŋ ma yawamu, naŋ ma kot tin kulo kuɗaŋu, kay nam ma lin mi sle ma tina vaŋ hiɗi sle ma kulo kuɗaŋ hay lumna kafe.

²²Nuwa li ki kayn nala, slen ma Lawn dumtin kaf nam lumu.